କୋର୍ଟରେ ଟ୍ରମ୍ପଙ୍କ ଟାରିଫ୍ ବେଆଇନ ଘୋଷିତ, ରାଷ୍ଟ୍ରପତି କହିଲେ– “ଏହି ନିଷ୍ପତ୍ତି ଆମେରିକାକୁ ବର୍ବାଦ କରିଦେବ”
ନୂଆଦିଲ୍ଲୀ: ବିଶ୍ୱବ୍ୟାପୀ ଟାରିଫ୍ (ଶୁଳ୍କ) ନୀତିକୁ ନେଇ ସଦା ଆଲୋଚନାରେ ଥିବା ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏଥର ଆଇନଗତ ଝଟକାରେ ପଡ଼ିଛନ୍ତି। ଆମେରିକାର କୋର୍ଟ ନିଷ୍ପତ୍ତି ଦେଇଛି ଯେ, ଟ୍ରମ୍ପଙ୍କ ଦ୍ୱାରା ଲାଗୁ କରାଯାଇଥିବା ଅଧିକାଂଶ ଶୁଳ୍କ ବେଆଇନ। କିନ୍ତୁ, ଏଥିରେ ତୁରନ୍ତ କୌଣସି ରୋକ୍ ଲଗାଯାଇନାହିଁ।
କୋର୍ଟ ସ୍ପଷ୍ଟ କରିଛି ଯେ, ଟ୍ରମ୍ପ ଜରୁରୀକାଳୀନ କ୍ଷମତାର ଅପବ୍ୟବହାର କରିଥିବାରୁ, ସେ ବିଶ୍ୱର କୌଣସି ଦେଶରେ ଇଚ୍ଛାମତେ ଶୁଳ୍କ ଲଗାଇବାର ଅଧିକାର ନାହିଁ। ରାଷ୍ଟ୍ରପତିଙ୍କୁ ଅସୀମ ଟାରିଫ୍ କ୍ଷମତା ଦିଆଯାଇପାରିବ ନାହିଁ ବୋଲି କୋର୍ଟ ନିଜ ରାୟରେ କହିଛି। ତେବେ, ଆମେରିକାର ଅର୍ଥନୀତିକୁ ଧ୍ୟାନରେ ରଖି, କୋର୍ଟ ତୁରନ୍ତ ଟାରିଫ୍ ବାତିଲ୍ କରିନାହାଁନ୍ତି, ବରଂ ଟ୍ରମ୍ପ ପ୍ରଶାସନକୁ ସୁପ୍ରିମକୋର୍ଟରେ ଆପିଲ୍ କରିବା ପାଇଁ ସମୟ ଦେଇଛନ୍ତି।
ପୂର୍ବରୁ, ନ୍ୟୁୟର୍କ ଫେଡେରାଲ୍ ଟ୍ରେଡ୍ କୋର୍ଟ ମଧ୍ୟ ସମାନ ମତ ଦେଇଥିଲା, ଯାହାକୁ ୟୁଏସ୍ କୋର୍ଟ ଅଫ୍ ଅପିଲ୍ସ୍ ସମର୍ଥନ କରିଛି। ବର୍ତ୍ତମାନ, ଟ୍ରମ୍ପଙ୍କୁ ଅକ୍ଟୋବର ପର୍ଯ୍ୟନ୍ତ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିବା ପାଇଁ ସୁବିଧା ଦିଆଯାଇଛି।
ଏହି ରାୟ ପରେ ଟ୍ରମ୍ପ ପ୍ରତିକ୍ରିୟା ଦେଇ କହିଛନ୍ତି, “ଯଦି ଏହି ନିଷ୍ପତ୍ତିକୁ କାର୍ଯ୍ୟକାରୀ କରାଯାଇଥାନ୍ତା, ଆମେରିକା ପ୍ରକୃତରେ ବର୍ବାଦ ହେଇଯାଇଥାନ୍ତା।” ଏନେଇ ହ୍ୱାଇଟ୍ ହାଉସ୍ର ମୁଖପାତ୍ର କୁଶ ଦେଶାଇ କହିଛନ୍ତି, “ଟ୍ରମ୍ପ ଆଇନଗତ ଭାବେ ଟାରିଫ୍ ଲଗାଇଛନ୍ତି ଏବଂ ଶେଷରେ ଏହି ମାମଲାରେ ଆମେ ଜିତିବୁ।”