ନ୍ୟୁୟର୍କ: ଭେନେଜୁଏଲା ଉପରେ ଆମେରିକାର ସାମରିକ କାର୍ଯ୍ୟାନୁଷ୍ଠାନକୁ ନେଇ ଜାତିସଂଘ (UN) ଗଭୀର ଅସନ୍ତୋଷ ପ୍ରକାଶ କରିଛି। ଜାତିସଂଘର ସେକ୍ରେଟାରୀ-ଜେନେରାଲ ଆଣ୍ଟୋନିଓ ଗୁଟେରେସ୍ ମତ ପ୍ରକାଶ କରିଛନ୍ତି ଯେ, ଭେନେଜୁଏଲା ଉପରେ ଆମେରିକାର ଆକ୍ରମଣ ଓ ରାଷ୍ଟ୍ରପତି ନିକୋଲାସ ମାଦୁରୋଙ୍କୁ ହଟାଇବା ପାଇଁ ନିଆଯାଇଥିବା ପଦକ୍ଷେପ ଅନ୍ତର୍ଜାତୀୟ ସ୍ତରରେ ଏକ “ବିପଜ୍ଜନକ ଉଦାହରଣ” ସୃଷ୍ଟି କରୁଛି।
ଏହି ବିବୃତି ଆସିଛି ଆମେରିକା–ଭେନେଜୁଏଲା ମଧ୍ୟରେ ବଢ଼ୁଥିବା ଉତ୍ତେଜନା ଉପରେ ଆଲୋଚନା କରିବାକୁ ଡାକାଯାଇଥିବା ଜାତିସଂଘ ସୁରକ୍ଷା ପରିଷଦର ଗୁରୁତ୍ୱପୂର୍ଣ୍ଣ ବୈଠକ ପୂର୍ବରୁ। ରୁଷ ଓ ଚୀନର ସମର୍ଥନ ସହ କଲମ୍ବିଆ ପକ୍ଷରୁ ଏହି ବୈଠକ ଆହ୍ୱାନ କରାଯାଇଥିବା ଜଣାପଡ଼ିଛି। ଉଲ୍ଲେଖଯୋଗ୍ୟ ଯେ, ଏହି ମାମଲାକୁ ନେଇ ସୁରକ୍ଷା ପରିଷଦ ପୂର୍ବରୁ ଅକ୍ଟୋବର ଓ ଡିସେମ୍ବରରେ ଦୁଇଥର ବୈଠକ କରିଥିଲା।
ଜାତିସଂଘ ମହାସଚିବଙ୍କ ମୁଖପାତ୍ର ଷ୍ଟିଫାନ୍ ଡୁଜାରିକ୍ କହିଛନ୍ତି ଯେ, ଏପରି ସାମରିକ ହସ୍ତକ୍ଷେପ ଅନ୍ତର୍ଜାତୀୟ ଆଇନକୁ ଉଲ୍ଲଂଘନ କରିପାରେ ଏବଂ ଭବିଷ୍ୟତରେ ଅନ୍ୟ ଦେଶମାନଙ୍କ ପାଇଁ ଭୁଲ୍ ଦୃଷ୍ଟାନ୍ତ ସୃଷ୍ଟି କରିବାର ଆଶଙ୍କା ରହିଛି।
ଅନ୍ୟପକ୍ଷରେ, ଭେନେଜୁଏଲାର ଜାତିସଂଘ ପ୍ରତିନିଧି ସାମୁଏଲ୍ ମୋନକାଡା ଆମେରିକାର କାର୍ଯ୍ୟକଳାପକୁ କଠୋର ଭାଷାରେ ସମାଲୋଚନା କରିଛନ୍ତି। ସେ ଏହାକୁ ଭେନେଜୁଏଲାର ଗଣତାନ୍ତ୍ରିକ ସରକାରକୁ ହଟାଇବା ପାଇଁ ଚାଲିଥିବା ଏକ “ଉପନିବେଶିକ ଯୁଦ୍ଧ” ବୋଲି ଅଭିହିତ କରିଛନ୍ତି। ମୋନକାଡା ଅଭିଯୋଗ କରିଛନ୍ତି ଯେ, ଆମେରିକା ଜାତିସଂଘ ଚାର୍ଟରର ମୌଳିକ ସିଦ୍ଧାନ୍ତ—ଅନ୍ୟ ଦେଶର ଆଞ୍ଚଳିକ ଅଖଣ୍ଡତା ଓ ରାଜନୈତିକ ସ୍ୱାଧୀନତା—କୁ ଉଲ୍ଲଂଘନ କରିଛି।
ଏହି ମଧ୍ୟରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ କହିଛନ୍ତି ଯେ, ଭେନେଜୁଏଲାରେ ଏକ “ନ୍ୟାୟସଙ୍ଗତ ଓ ସୁରକ୍ଷିତ ପରିବର୍ତ୍ତନ” ନ ହେବା ପର୍ଯ୍ୟନ୍ତ ୱାଶିଂଟନ ତାଙ୍କର ଚାପ ଜାରି ରଖିବ। ଏହି ବକ୍ତବ୍ୟ ପରେ ଆମେରିକା ଭେନେଜୁଏଲାର ଆଭ୍ୟନ୍ତରୀଣ ବ୍ୟାପାରରେ ସିଧାସଳଖ ହସ୍ତକ୍ଷେପ କରୁଛି କି ନାହିଁ, ସେନେଇ ଅନ୍ତର୍ଜାତୀୟ ସ୍ତରରେ ତୀବ୍ର ଚର୍ଚ୍ଚା ଆରମ୍ଭ ହୋଇଛି।
ଜାତିସଂଘରେ ଆମେରିକାର ରାଷ୍ଟ୍ରଦୂତ ମାଇକ୍ ୱାଲ୍ଜ ତଥାପି ଏହି ଆକ୍ରମଣକୁ ସମର୍ଥନ କରି କହିଛନ୍ତି ଯେ, ଏହା “ଶାସନ ପରିବର୍ତ୍ତନ ନୁହେଁ, ବରଂ ନ୍ୟାୟ”। ସେ ମାଦୁରୋଙ୍କୁ ଏକଛତ୍ରବାଦୀ ଭାବେ ଅଭିହିତ କରିଥିବା ବେଳେ, ଭେନେଜୁଏଲା ପକ୍ଷରୁ ଏହି ମନ୍ତବ୍ୟକୁ କଡ଼ା ଭାଷାରେ ପ୍ରତ୍ୟାଖ୍ୟାନ କରାଯାଇଛି।