ମସ୍କୋ/ଲଣ୍ଡନ: ରୁଷ୍ର ବିରୋଧୀ ଦଳ ନେତା ଆଲେକ୍ସେଇ ନାଭାଲନିଙ୍କ ମୃତ୍ୟୁକୁ ନେଇ ବ୍ରିଟେନ ସମେତ ପାଞ୍ଚଟି ୟୁରୋପୀୟ ଦେଶ ଗୁରୁତର ଅଭିଯୋଗ ଆଣିଛନ୍ତି। ସେମାନଙ୍କ ଦାବି ଅନୁସାରେ, ୨୦୨୪ରେ ଜେଲରେ ମୃତ୍ୟୁ ପୂର୍ବରୁ ନାଭାଲନିଙ୍କୁ ବିଷ ପ୍ରୟୋଗ କରାଯାଇଥିଲା ଏବଂ ଲାବୋରେଟୋରୀ ପରୀକ୍ଷାରେ ‘ଏପିବାଟିଡିନ୍’ ନାମକ ବିଷର ଉପସ୍ଥିତି ଚିହ୍ନଟ ହୋଇଥିବା କୁହାଯାଇଛି।
ବ୍ରିଟେନ, ଫ୍ରାନ୍ସ, ଜର୍ମାନୀ, ସ୍ବିଡେନ ଓ ନେଦରଲ୍ୟାଣ୍ଡର ବିଦେଶମନ୍ତ୍ରୀମାନେ ଏକ ଯୁଗ୍ମ ବାର୍ତ୍ତାରେ କହିଛନ୍ତି ଯେ, ନାଭାଲନିଙ୍କୁ ବିଷ ଦେଇ ହତ୍ୟା କରିବାର ସମସ୍ତ କାରଣ ଓ ସୁଯୋଗ ରୁଷ୍ ପାଖରେ ଥିଲା। ସେମାନେ ଏହି ମାମଲାକୁ ରାସାୟନିକ ଅସ୍ତ୍ର ନିଷେଧ ସଂଗଠନ (OPCW) ସମ୍ମୁଖରେ ଉଠାଇବେ ବୋଲି ଜଣାଇଛନ୍ତି।
ବ୍ରିଟେନର ବିଦେଶମନ୍ତ୍ରୀ Yvette Cooper କହିଛନ୍ତି ଯେ, ନାଭାଲନି ରୁଷ୍ ସରକାର ପାଇଁ ଏକ ଚାଲେଞ୍ଜ୍ ଥିଲେ। ସେ ଦୁର୍ନୀତି ବିରୋଧରେ ଆନ୍ଦୋଳନ କରିଥିଲେ ଏବଂ ରାଷ୍ଟ୍ରପତି Vladimir Putinଙ୍କ ଦୃଢ଼ ବିରୋଧୀ ଭାବେ ପରିଚିତ ଥିଲେ।
ଫେବ୍ରୁଆରି ୨୦୨୪ରେ ଆର୍କଟିକ ପେନାଲ କଲୋନୀରେ ତାଙ୍କର ମୃତ୍ୟୁ ହୋଇଥିଲା। ସେ ୧୯ ବର୍ଷର କାରାଦଣ୍ଡ ଭୋଗୁଥିଲେ, ଯାହାକୁ ତାଙ୍କ ସମର୍ଥକମାନେ ରାଜନୈତିକ ପ୍ରେରଣାଦାୟକ ଦଣ୍ଡ ବୋଲି ଦାବି କରିଥିଲେ।
ନାଭାଲନିଙ୍କ ପତ୍ନୀ Yulia Navalnaya ପୂର୍ବରୁ କହିଥିଲେ ଯେ, ଦୁଇଟି ସ୍ୱାଧୀନ ଲାବୋରେଟୋରୀ ପରୀକ୍ଷାରେ ବିଷ ପ୍ରୟୋଗର ପ୍ରମାଣ ମିଳିଥିଲା। ସେ ତାଙ୍କ ସ୍ବାମୀଙ୍କ ମୃତ୍ୟୁ ପାଇଁ ପୁଟିନଙ୍କୁ ଦାୟୀ କରିଥିଲେ। ଯଦିଓ ରୁଷ୍ କର୍ତ୍ତୃପକ୍ଷ ଏହି ସମସ୍ତ ଅଭିଯୋଗକୁ ଖଣ୍ଡନ କରି ନାଭାଲନିଙ୍କ ମୃତ୍ୟୁ ସ୍ୱାଭାବିକ ଥିବା କହିଛନ୍ତି।
ଉଲ୍ଲେଖଯୋଗ୍ୟ ଯେ, ୨୦୨୦ରେ ମଧ୍ୟ ନାଭାଲନିଙ୍କୁ ବିଷ ପ୍ରୟୋଗ ଘଟଣା ଆସିଥିଲା। ପରେ ସେ ଜର୍ମାନୀରେ ଚିକିତ୍ସା ନେଇଥିଲେ ଓ ରୁଷ୍କୁ ଫେରିବା ସହିତ ଗିରଫ ହୋଇଥିଲେ। ତାଙ୍କ ମୃତ୍ୟୁକୁ ନେଇ ଆନ୍ତର୍ଜାତୀୟ ମଞ୍ଚରେ ଏବେ ବି ତୀବ୍ର ଚର୍ଚ୍ଚା ଚାଲିଛି।