‘ନିର୍ବାଚନ ବିଳମ୍ବ କରିବା ପାଇଁ ହତ୍ୟା’: ୟୁନୁସ ସରକାରଙ୍କ ବିରୋଧରେ ଗୁରୁତର ଅଭିଯୋଗ ଆଣିଲେ ହାଦିଙ୍କ ଭାଇ

ଢାକା, ୨୪।୧୨: ଛାତ୍ର ନେତା ସରିଫ ଓସମାନ ହାଦିଙ୍କ ହତ୍ୟା ପରେ ବାଂଲାଦେଶର ରାଜନୈତିକ ପରିବେଶ ଆହୁରି ଉତ୍ତେଜିତ ହୋଇଉଠିଛି। ଢାକାରେ ଗୁଳିକାଣ୍ଡରେ ହାଦିଙ୍କ ମୃତ୍ୟୁ ଘଟିବା ପରେ ତାଙ୍କ ଭାଇ ସରିଫ ଓମର ହାଦି, ମହମ୍ମଦ ୟୁନୁସଙ୍କ ନେତୃତ୍ୱାଧୀନ ମଧ୍ୟବର୍ତ୍ତୀକାଳୀନ ସରକାର ଉପରେ ଗୁରୁତର ଅଭିଯୋଗ ଆଣିଛନ୍ତି। ତାଙ୍କ ଅଭିଯୋଗ ଅନୁସାରେ, ଆସନ୍ତା ଫେବୃଆରୀରେ ହେବାକୁ ଥିବା ଜାତୀୟ ନିର୍ବାଚନକୁ ବାଧା ଦେବା ପାଇଁ ଏହି ହତ୍ୟା ଷଡ଼ଯନ୍ତ୍ରମୂଳକ ଭାବେ କରାଯାଇଛି।

ସରିଫ ଓସମାନ ହାଦି ‘ଇନକିଲାବ ମଞ୍ଚ’ର ମୁଖପାତ୍ର ଥିଲେ। ଗତବର୍ଷ ଶେଖ ହାସିନା ସରକାର ବିରୋଧରେ ହୋଇଥିବା ଆନ୍ଦୋଳନ ସମୟରେ ଏହି ସଂଗଠନ ଚର୍ଚ୍ଚାରେ ଆସିଥିଲା। ହାଦିଙ୍କ ହତ୍ୟା ପରେ ଦେଶର ବିଭିନ୍ନ ଅଞ୍ଚଳରେ ହିଂସାତ୍ମକ ପ୍ରତିବାଦ ଆରମ୍ଭ ହୋଇଛି। ଏହି ପ୍ରତିବାଦ ସମୟରେ କିଛି ଭିଡ଼ ପ୍ରମୁଖ ଖବରକାଗଜ ଓ ସାଂସ୍କୃତିକ ସଂଗଠନଙ୍କ କାର୍ଯ୍ୟାଳୟକୁ ଲକ୍ଷ୍ୟ କରି ଆକ୍ରମଣ କରିଥିବା ଖବର ମିଳିଛି।

ଶାହବାଗରେ ଆୟୋଜିତ ଏକ ପ୍ରତିବାଦ ସଭାରେ ସରିଫ ଓମର ହାଦି ସିଧାସଳଖ ସରକାରକୁ ଟାର୍ଗେଟ କରି କହିଥିଲେ, “ତୁମେ ଓସମାନ ହାଦିଙ୍କୁ ହତ୍ୟା କରିଛ, ଏବଂ ଏବେ ଏହି ଘଟଣାକୁ ଆଧାର କରି ନିର୍ବାଚନ ବିଳମ୍ବ କରିବାର ଚେଷ୍ଟା କରୁଛ।” ସେ ଦାବି କରିଥିଲେ ଯେ ତାଙ୍କ ଭାଇ ଫେବୃଆରୀ ମାସ ମଧ୍ୟରେ ଜାତୀୟ ନିର୍ବାଚନ ହେବା ପକ୍ଷରେ ସ୍ପଷ୍ଟ ମତ ରଖିଥିଲେ।

ଓମର ହାଦି ହତ୍ୟାକାରୀମାନଙ୍କୁ ତୁରନ୍ତ ଚିହ୍ନଟ କରି କଠୋର ଶାସ୍ତି ଦିଆଯିବାକୁ ଦାବି କରିଛନ୍ତି। ନ୍ୟାୟ ନମିଳିଲେ ଦେଶର ରାଜନୈତିକ ପରିସ୍ଥିତି ଆହୁରି ବିଗଡ଼ିବ ବୋଲି ସେ ଚେତାବନୀ ଦେଇଛନ୍ତି। ତାଙ୍କ ଅଭିଯୋଗ ଅନୁସାରେ, ଓସମାନ ହାଦି କୌଣସି ‘ବିଦେଶୀ ଶକ୍ତି’ କିମ୍ବା ଏଜେନ୍ସିଙ୍କ ଆଗରେ ମୁଣ୍ଡ ନୁଆଁଇବାକୁ ଅସ୍ୱୀକାର କରିଥିବାରୁ ତାଙ୍କୁ ଲକ୍ଷ୍ୟ କରାଯାଇଥିଲା।

ଏହି ଘଟଣାକୁ କେନ୍ଦ୍ର କରି ବାଂଲାଦେଶରେ ନିର୍ବାଚନୀ ପରିବେଶ ଉପରେ ଗଭୀର ପ୍ରଶ୍ନ ଉଠିଛି ଏବଂ ଦେଶ ଆଗାମୀ ଦିନରେ ଆହୁରି ରାଜନୈତିକ ଅସ୍ଥିରତା ଦେଖିବାର ଆଶଙ୍କା କରାଯାଉଛି।