ଦିଲ୍ଲୀ କାର ବୋମା ବିସ୍ଫୋରଣରେ ୪୦ କିଲୋଗ୍ରାମ ବିସ୍ଫୋରକ ବ୍ୟବହୃତ, ଷଡ଼ଯନ୍ତ୍ର ପୂର୍ବରୁ ଧ୍ୱଂସ କରାଯାଇଥିଲା: ଅମିତ ଶାହ

ନୂଆଦିଲ୍ଲୀ: ଦିଲ୍ଲୀର ଲାଲକିଲ୍ଲା ସମ୍ମୁଖରେ ଘଟିଥିବା କାର ବୋମା ବିସ୍ଫୋରଣକୁ ନେଇ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏକ ଗୁରୁତ୍ୱପୂର୍ଣ୍ଣ ଖୁଲାସା କରିଛନ୍ତି। ସେ କହିଛନ୍ତି ଯେ, ଏହି ବିସ୍ଫୋରଣରେ ପ୍ରାୟ ୪୦ କିଲୋଗ୍ରାମ ବିସ୍ଫୋରକ ବ୍ୟବହାର କରାଯାଇଥିଲା। ଏହା ସହିତ, ଆକ୍ରମଣ ପୂର୍ବରୁ ସୁରକ୍ଷା ଏଜେନ୍ସିମାନେ ପ୍ରାୟ ୩ ଟନ୍ ବିସ୍ଫୋରକ ଜବତ କରିଥିବା ସୂଚନା ମଧ୍ୟ ସେ ଦେଇଛନ୍ତି।

ଶୁକ୍ରବାର ନୂଆଦିଲ୍ଲୀରେ ଆୟୋଜିତ ଆତଙ୍କବାଦ ବିରୋଧୀ ସମ୍ମିଳନୀ–୨୦୨୫କୁ ଉଦଘାଟନ କରି ଗୃହମନ୍ତ୍ରୀ କହିଥିଲେ ଯେ, ବିସ୍ଫୋରଣ ପଛରେ ଥିବା ସମ୍ପୂର୍ଣ୍ଣ ଷଡ଼ଯନ୍ତ୍ର ନେଟୱାର୍କକୁ ଆକ୍ରମଣ ଘଟିବା ପୂର୍ବରୁ ଚିହ୍ନଟ କରି ଗିରଫ କରାଯାଇଥିଲା। ଦେଶର ସମସ୍ତ ସୁରକ୍ଷା ଓ ଗୁପ୍ତଚର ଏଜେନ୍ସି ମିଶି ସମନ୍ୱିତ ଭାବେ ଏହି ଅଭିଯାନ ଚାଲାଇଥିବା ସେ ଉଲ୍ଲେଖ କରିଥିଲେ।

ଗୃହମନ୍ତ୍ରୀ ଏହି ସମ୍ମିଳନୀରେ ଜମ୍ମୁ ଓ କାଶ୍ମୀରର ପହଲଗାମ ଅଞ୍ଚଳର ବୈସାରନ ଉପତ୍ୟକାରେ ଘଟିଥିବା ଆତଙ୍କବାଦୀ ଆକ୍ରମଣକୁ ସ୍ମରଣ କରି କହିଥିଲେ ଯେ, ସେହି ଘଟଣା ସମଗ୍ର ଦେଶକୁ ନଡ଼ାଇ ଦେଇଥିଲା। ଆତଙ୍କବାଦୀଙ୍କ ଲକ୍ଷ୍ୟ ଥିଲା ଦେଶର ସାମ୍ପ୍ରଦାୟିକ ସମନ୍ୱୟକୁ ଭାଙ୍ଗିବା ସହ କାଶ୍ମୀରରେ ଆରମ୍ଭ ହୋଇଥିବା ବିକାଶ ଓ ପର୍ଯ୍ୟଟନର ନୂତନ ଯାତ୍ରାକୁ ବାଧା ଦେବା।

NIA ତଦନ୍ତରେ ୯ ଗିରଫ

ଦିଲ୍ଲୀ କାର ବୋମା ବିସ୍ଫୋରଣ ମାମଲାର ତଦନ୍ତ କରୁଥିବା ଜାତୀୟ ତଦନ୍ତ ଏଜେନ୍ସି (NIA) ଏପର୍ଯ୍ୟନ୍ତ ୯ ଜଣଙ୍କୁ ଗିରଫ କରିଛି। ଗିରଫ ହୋଇଥିବାମାନଙ୍କ ମଧ୍ୟରେ ମୁଜାମ୍ମିଲ, ଆଦିଲ ରାଥର ଓ ଶାହିନ ସଇଦ ନାମକ ତିନିଜଣ ଡାକ୍ତର ସହ ଜଣେ ମୌଲବୀ ଇରଫାନ ମଧ୍ୟ ଅଛନ୍ତି। ଏହି ମାମଲା ଜମ୍ମୁ ଓ କାଶ୍ମୀର ପୁଲିସ ଧରାପଡ଼ାଇଥିବା ‘ହ୍ୱାଇଟ୍ କଲର’ ଆତଙ୍କବାଦୀ ମଡ୍ୟୁଲ ସହ ସଂପୃକ୍ତ ବୋଲି NIA କହିଛି।

ତଦନ୍ତ ସଂସ୍ଥା ଅନୁଯାୟୀ, ମୁଜାମ୍ମିଲଙ୍କ ବନ୍ଧୁ ଉମର ନଭେମ୍ବର ୧୦ ତାରିଖରେ ବିସ୍ଫୋରକ ଭର୍ତ୍ତି ହୁଣ୍ଡାଇ i-20 କାର ଚଳାଉଥିଲେ। ସେହି କାରରେ ବିସ୍ଫୋରଣ ଘଟି ୧୫ ଜଣଙ୍କର ମୃତ୍ୟୁ ହୋଇଥିବା ବେଳେ, ଉମରକୁ ଏହି ଆକ୍ରମଣର ମୁଖ୍ୟ ଷଡ଼ଯନ୍ତ୍ରକାରୀ ବୋଲି ଚିହ୍ନଟ କରାଯାଇଛି।