ନୂଆଦିଲ୍ଲୀ: କଂଗ୍ରେସ କାର୍ଯ୍ୟକାରିଣୀ କମିଟି (CWC) ବୈଠକ ପୂର୍ବରୁ ବରିଷ୍ଠ କଂଗ୍ରେସ ନେତା ଦିଗବିଜୟ ସିଂହଙ୍କ ଏକ ସୋସିଆଲ ମିଡିଆ ପୋଷ୍ଟ ଦଳୀୟ ରାଜନୀତିରେ ଭାରି ଚର୍ଚ୍ଚା ସୃଷ୍ଟି କରିଛି। ଏକ୍ସ (ପୂର୍ବତନ ଟ୍ୱିଟର) ରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଆରଏସଏସ ସଂଗଠନକୁ ପ୍ରଶଂସା କରିଥିବା ପୋଷ୍ଟ ପରେ ରାଜନୈତିକ ମହଳରେ ବିବାଦ ଆରମ୍ଭ ହୋଇଥିଲା।
ନିଜ ଦଳର ନେତା ଓ କର୍ମୀମାନଙ୍କ ତୀବ୍ର ପ୍ରତିକ୍ରିୟା ପରେ ଦିଗବିଜୟ ସିଂହ ଏହି ପ୍ରସଙ୍ଗରେ ସ୍ପଷ୍ଟୀକରଣ ଦେଇଛନ୍ତି। ସେ କହିଛନ୍ତି ଯେ, ତାଙ୍କର ପୋଷ୍ଟକୁ ଭୁଲ ବୁଝାଯାଇଛି ଏବଂ ସେ କେବଳ ସଂଗଠନର ଶକ୍ତିକୁ ଉଲ୍ଲେଖ କରିଥିଲେ, ପ୍ରଧାନମନ୍ତ୍ରୀଙ୍କୁ ନୁହେଁ।
“ମୁଁ ପ୍ରଧାନମନ୍ତ୍ରୀଙ୍କ ବିରୋଧୀ ଥିଲି ଓ ରହିବି”
ନିଜ ଟ୍ୱିଟ୍ ଉପରେ ସ୍ପଷ୍ଟୀକରଣ ଦେଇ ଦିଗବିଜୟ ସିଂହ କହିଛନ୍ତି, “ମୁଁ ସଂଗଠନର କାର୍ଯ୍ୟକୁ ଉଲ୍ଲେଖ କରିଥିଲି। କିନ୍ତୁ ମୁଁ RSS, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ସେମାନଙ୍କର ନୀତିର ଘୋର ବିରୋଧୀ ଥିଲି, ଅଛି ଏବଂ ଆଗକୁ ମଧ୍ୟ ରହିବି।”
ଦଳ ଭିତରେ ତୀବ୍ର ସମାଲୋଚନା ହେବା ପରେ ଏହି ସ୍ପଷ୍ଟୀକରଣ ଆସିଥିବାରୁ ରାଜନୈତିକ ମହଳରେ ଏହାକୁ ‘ୟୁ-ଟର୍ଣ୍ଣ’ ଭାବେ ଦେଖାଯାଉଛି।
କ’ଣ ଲେଖିଥିଲେ ଦିଗବିଜୟ?
ଦିଗବିଜୟ ସିଂହ ଏକ ପୁରୁଣା ଫଟୋ ସେୟାର କରିଥିଲେ, ଯେଉଁଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଲାଲକୃଷ୍ଣ ଆଡଭାନୀଙ୍କ ପାଦତଳେ ବସିଥିବା ଦେଖାଯାଇଥିଲା। ଫଟୋ ସହିତ ସେ ଲେଖିଥିଲେ ଯେ, ଆରଏସଏସର ଜଣେ ସାଧାରଣ ସ୍ୱୟଂସେବକ କିପରି ଦେଶର ପ୍ରଧାନମନ୍ତ୍ରୀ ପଦ ପର୍ଯ୍ୟନ୍ତ ପହଞ୍ଚିପାରନ୍ତି, ଏହା ସଂଗଠନର ଶକ୍ତିକୁ ପ୍ରମାଣ କରେ।
ଏହି ପୋଷ୍ଟ ହିଁ ପରେ କଂଗ୍ରେସ ଭିତରେ ଅସନ୍ତୋଷ ସୃଷ୍ଟି କରିଥିଲା ଓ ଦିଗବିଜୟ ସିଂହଙ୍କୁ ସ୍ପଷ୍ଟୀକରଣ ଦେବାକୁ ବାଧ୍ୟ କରିଥିଲା।