ନୂଆଦିଲ୍ଲୀ ଷ୍ଟେସନରେ ବନ୍ଦେ ଭାରତ ସ୍ଲିପର ଟ୍ରେନର ନିରୀକ୍ଷଣ କଲେ କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ

ନୂଆଦିଲ୍ଲୀ: ଦେଶର ରାତ୍ରୀକାଳୀନ ଦୀର୍ଘଦୂର ରେଳ ଯାତ୍ରାକୁ ନୂଆ ଦିଗ ଦେବାକୁ ଯାଉଥିବା ବନ୍ଦେ ଭାରତ ସ୍ଲିପର ଟ୍ରେନକୁ ଆଜି ନୂଆଦିଲ୍ଲୀ ରେଳ ଷ୍ଟେସନରେ କେନ୍ଦ୍ର ରେଳ, ସୂଚନା ଓ ପ୍ରସାରଣ, ସହିତ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରୀ ଅଶ୍ୱିନୀ ବୈଷ୍ଣବ ନିରୀକ୍ଷଣ କରିଛନ୍ତି।

ନିରୀକ୍ଷଣ ସମୟରେ କେନ୍ଦ୍ରମନ୍ତ୍ରୀ ସ୍ଲିପର କୋଚଗୁଡ଼ିକର ଆସନ ଓ ବର୍ଥ ବ୍ୟବସ୍ଥା, ଆଧୁନିକ ଭିତର ସାଜସଜ୍ଜା, ସୁରକ୍ଷା ବ୍ୟବସ୍ଥା ଏବଂ ଯାତ୍ରୀ ସୁବିଧା ସମ୍ପର୍କରେ ସୂକ୍ଷ୍ମ ଯାଞ୍ଚ କରିଥିଲେ। ଯାତ୍ରୀଙ୍କ ସୁରକ୍ଷା, ସୁବିଧା ଓ ସ୍ୱଚ୍ଛତାକୁ ପ୍ରାଥମିକତା ଦେଇ ଟ୍ରେନକୁ କିପରି ଡିଜାଇନ୍ କରାଯାଇଛି, ସେନେଇ ସେ ରେଳ ଅଧିକାରୀମାନଙ୍କ ସହ ଆଲୋଚନା କରିଥିଲେ।

ଟ୍ରେନର ପ୍ରମୁଖ ବୈଶିଷ୍ଟ୍ୟ:

ବନ୍ଦେ ଭାରତ ସ୍ଲିପର ଟ୍ରେନର ସମସ୍ତ କୋଚରେ ସ୍ୱୟଂଚାଳିତ ଦ୍ୱାର ବ୍ୟବସ୍ଥା ରହିଛି। ଏହା ସହ କବଚ ସୁରକ୍ଷା ପ୍ରଣାଳୀ, ଉନ୍ନତ ଅଗ୍ନିନିର୍ବାପନ ବ୍ୟବସ୍ଥା, ସିସିଟିଭି ନିରୀକ୍ଷଣ ଏବଂ ଜୀବାଣୁନାଶକ ପ୍ରଯୁକ୍ତି ଯୋଡ଼ାଯାଇଛି। ଶୌଚାଳୟଗୁଡ଼ିକୁ ଅଧିକ ସ୍ୱଚ୍ଛତା ଓ ପାଣି ଛିଟା ରୋକିବା ପାଇଁ ନୂଆ ଢଂଗରେ ତିଆରି କରାଯାଇଛି।

ଏହି ସ୍ଲିପର ଟ୍ରେନରେ ମୋଟ ୧୬ଟି କୋଚ ରହିଛି। ସେଥିରେ ୧୧ଟି ଏସି ଥ୍ରୀ-ଟାୟର, ୪ଟି ଏସି ଟୁ-ଟାୟର ଏବଂ ୧ଟି ଏସି ପ୍ରଥମ ଶ୍ରେଣୀ କୋଚ ସାମିଲ। ଏଥିରେ ଏକକାଳୀନ ପ୍ରାୟ ୮୨୩ ଜଣ ଯାତ୍ରୀ ଯାତ୍ରା କରିପାରିବେ। ଉନ୍ନତ ସସପେନସନ୍ ସିଷ୍ଟମ୍, ଏର୍ଗୋନୋମିକ୍ ଇଣ୍ଟେରିୟର ଓ ଉଚ୍ଚ ସ୍ୱଚ୍ଛତା ମାନଦଣ୍ଡ ଏହାକୁ ଅଧିକ ଆରାମଦାୟକ କରିଛି।

ପ୍ରଥମ ବନ୍ଦେ ଭାରତ ସ୍ଲିପର ଟ୍ରେନ ଆସାମର ଗୌହାଟୀ ଓ ପଶ୍ଚିମବଙ୍ଗର ହାଓଡା ମଧ୍ୟରେ ଚଳାଚଳ କରିବ। ଟ୍ରେନର ସମସ୍ତ ପରୀକ୍ଷଣ ଓ ପ୍ରମାଣିକରଣ ପ୍ରକ୍ରିୟା ସଫଳ ଭାବେ ସମାପ୍ତ ହୋଇଥିବା କେନ୍ଦ୍ରମନ୍ତ୍ରୀ କହିଛନ୍ତି। ଚଳିତ ମାସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ମାର୍ଗରେ ଟ୍ରେନକୁ ଆନୁଷ୍ଠାନିକ ଭାବେ ଶୁଭାରମ୍ଭ କରିବେ।

ଏହି ସେମି-ହାଇସ୍ପିଡ୍ ଟ୍ରେନ ଘଣ୍ଟା ପ୍ରତି ୧୮୦ କିଲୋମିଟର ପର୍ଯ୍ୟନ୍ତ ବେଗରେ ଚଳାଚଳ କରିପାରିବ। ଯାତ୍ରା ସମୟରେ ଯାତ୍ରୀମାନଙ୍କୁ ସ୍ଥାନୀୟ ଅଞ୍ଚଳର ପାରମ୍ପରିକ ଖାଦ୍ୟ ମଧ୍ୟ ପରିବେଷଣ କରାଯିବ। ଏହା ମାଧ୍ୟମରେ ଦ୍ରୁତ, ସୁରକ୍ଷିତ ଏବଂ ସାଂସ୍କୃତିକ ଭାବେ ସମୃଦ୍ଧ ଯାତ୍ରା ଅନୁଭୂତି ଦେବାକୁ ଭାରତୀୟ ରେଳବାଇ ଲକ୍ଷ୍ୟ ରଖିଛି।