ଶାନ୍ତି ବୋର୍ଡ ନେଇ ଫ୍ରାନ୍ସକୁ ଟ୍ରମ୍ପଙ୍କ କଡା ଚେତାବନୀ: ଯୋଗ ନଦେଲେ ମଦ ଓ ସାମ୍ପେନ ଉପରେ ୨୦୦% ଶୁଳ୍କ ଧମକ
ୱାସିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରସ୍ତାବିତ ‘ଶାନ୍ତି ବୋର୍ଡ’ରେ ଯୋଗଦେବାକୁ ଫ୍ରାନ୍ସ ଅସ୍ୱୀକୃତି ଜଣାଇବା ପରେ ଦୁଇ ଦେଶ ମଧ୍ୟରେ କୂଟନୀତିକ ତଣାତଣି ବଢ଼ିଛି। ଏହାକୁ ନେଇ ଟ୍ରମ୍ପ ଫ୍ରାନ୍ସ ଉପରେ କଡା ଭାଷାରେ ଚେତାବନୀ ଦେଇ, ଫ୍ରାନ୍ସର ମଦ ଓ ସାମ୍ପେନ ଉତ୍ପାଦ ଉପରେ ୨୦୦ ପ୍ରତିଶତ ଶୁଳ୍କ ଲଗାଇବାର ଧମକ ଦେଇଛନ୍ତି।
ଟ୍ରମ୍ପ ‘ଟ୍ରୁଥ୍ ସୋସିଆଲ୍’ ମାଧ୍ୟମରେ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରୋନ୍ଙ୍କ ସହ ହୋଇଥିବା ଏକ ବ୍ୟକ୍ତିଗତ ବାର୍ତ୍ତାକୁ ସେୟାର କରିଛନ୍ତି। ସେହି ବାର୍ତ୍ତାରେ ଗ୍ରିନ୍ଲାଣ୍ଡ ସମ୍ପର୍କିତ ପ୍ରସଙ୍ଗ ଉଲ୍ଲେଖ ଥିବା କୁହାଯାଇଛି। ଟ୍ରମ୍ପ କହିଛନ୍ତି ଯେ, ଯଦି ଫ୍ରାନ୍ସ ଶାନ୍ତି ବୋର୍ଡରେ ସାମିଲ ହୁଏ, ତେବେ ଏପରି ଶୁଳ୍କ ଲଗାଇବାର ଆବଶ୍ୟକତା ପଡ଼ିବ ନାହିଁ।
ଏହି ‘ଶାନ୍ତି ବୋର୍ଡ’ ପ୍ରଥମେ ଯୁଦ୍ଧବିଧ୍ୱସ୍ତ ଗାଜା ଷ୍ଟ୍ରିପର ପୁନଃନିର୍ମାଣ ଲକ୍ଷ୍ୟରେ ଗଠନ କରାଯାଇଥିଲା। କିନ୍ତୁ ନିକଟରେ ଏହାର କାର୍ଯ୍ୟକ୍ଷେତ୍ର କେବଳ ଗାଜାରେ ସୀମିତ ନଥାଇ, ବିଶ୍ୱ ଶାନ୍ତି ପାଇଁ ଏକ ବୃହତ ମଞ୍ଚ ଭାବେ ବିକଶିତ ହେଉଥିବା ସୂଚନା ମିଳୁଛି।
ବ୍ୟକ୍ତିଗତ ବାର୍ତ୍ତାରେ ମାକ୍ରୋନ୍ ଉଲ୍ଲେଖ କରିଛନ୍ତି ଯେ, ଇରାନ୍ ଓ ସିରିଆ ପ୍ରସଙ୍ଗରେ ଦୁଇ ନେତାଙ୍କ ମତ ମିଳିଥିଲେ ମଧ୍ୟ, ଗ୍ରିନ୍ଲାଣ୍ଡ ନେଇ ଟ୍ରମ୍ପଙ୍କ ଅଭିଗମ୍ୟତା ତାଙ୍କ ପାଇଁ ଅସ୍ପଷ୍ଟ। ସେ ଡାଭୋସରେ ହେବାକୁ ଥିବା ବିଶ୍ୱ ଅର୍ଥନୈତିକ ଫୋରମ୍ ଅବସରରେ ଟ୍ରମ୍ପଙ୍କୁ ସାକ୍ଷାତ୍ କରିବା ସହ ଏକ ରାତ୍ରୀଭୋଜନରେ ଅନ୍ୟ ଜି-୭ ନେତା ଓ ବିଭିନ୍ନ ଦେଶର ପ୍ରତିନିଧିମାନଙ୍କୁ ଆମନ୍ତ୍ରଣ କରିବା ପ୍ରସ୍ତାବ ମଧ୍ୟ ଦେଇଥିଲେ।