ନୂଆଦିଲ୍ଲୀ: ଦେଶରେ ଏଲ୍ପିଜି ଅଭାବ ନେଇ ଚର୍ଚ୍ଚା ମଧ୍ୟରେ କେନ୍ଦ୍ର ସରକାର ଏହାକୁ ଅସ୍ୱୀକାର କରିଛନ୍ତି। ସରକାରଙ୍କ ନିର୍ଦ୍ଦେଶ ପରେ ଦେଶର ତୈଳ ବିଶୋଧନ କମ୍ପାନିଗୁଡ଼ିକ ଏଲ୍ପିଜି ଉତ୍ପାଦନକୁ ପ୍ରାୟ ୧୦ ପ୍ରତିଶତ ବଢ଼ାଇଥିବା ସୂଚନା ମିଳିଛି। ଏହାଦ୍ୱାରା ସମ୍ଭାବ୍ୟ ନିଅଣ୍ଟିଆ ପରିସ୍ଥିତିକୁ ଟାଳି ଦିଆଯାଇଛି ବୋଲି ସରକାର କହିଛନ୍ତି।
ସୂଚନା ଅନୁଯାୟୀ, ମହଜୁଦ ଓ କଳାବଜାରୀକୁ ରୋକିବା ପାଇଁ ଅତିରିକ୍ତ ପ୍ରଶାସନିକ ପଦକ୍ଷେପ ନିଆଯାଇଛି। ଏହା ସହିତ ଏଲ୍ପିଜି ସିଲିଣ୍ଡର ବୁକିଂ ଅବଧିକୁ ୨୧ ଦିନରୁ ବଢ଼ାଇ ୨୫ ଦିନ କରାଯାଇଛି। ପରିସ୍ଥିତିକୁ ନଜରରେ ରଖି ଅତ୍ୟାବଶ୍ୟକ ସାମଗ୍ରୀ ଆଇନକୁ ମଧ୍ୟ ଲାଗୁ କରାଯାଇଛି।
ଅଧିକାରୀମାନଙ୍କ କହିବା ଅନୁସାରେ, ଭୂ-ରାଜନୈତିକ ଅସ୍ଥିରତା ଓ ଯୋଗାଣ ଶୃଙ୍ଖଳ ଉପରେ ଚାପ ସତ୍ତ୍ୱେ ଶକ୍ତି ଯୋଗାଣ ପରିଚାଳନା କ୍ଷେତ୍ରରେ ଭାରତ ଅନ୍ୟ ଦେଶଙ୍କ ତୁଳନାରେ ଭଲ ସ୍ଥିତିରେ ରହିଛି। ଶକ୍ତି ଉପଲବ୍ଧତା ଓ ଇନ୍ଧନ ଆମଦାନୀରେ ନିରନ୍ତରତା ବଜାୟ ରଖିବା ପାଇଁ ସରକାର ବିଭିନ୍ନ ଦେଶ ସହିତ ନିୟମିତ ଯୋଗାଯୋଗରେ ଅଛନ୍ତି।
ପେଟ୍ରୋଲିୟମ ମନ୍ତ୍ରାଳୟ ଓ ଶକ୍ତି କମ୍ପାନିଗୁଡ଼ିକ ମଧ୍ୟ ସେମାନଙ୍କ ଅନ୍ତର୍ଜାତୀୟ ସହଯୋଗୀମାନଙ୍କ ସହିତ ସମ୍ପର୍କ ରଖି ଶକ୍ତି ଯୋଗାଣକୁ ସୁନିଶ୍ଚିତ କରୁଛନ୍ତି। ଦେଶ ପାଇଁ ପର୍ଯ୍ୟାପ୍ତ ଶକ୍ତି ଉତ୍ସ ଉପଲବ୍ଧ ଥିବା ସହ ଯେକୌଣସି ପରିସ୍ଥିତିକୁ ମୁକାବିଲା କରିବାକୁ ଭାରତ ପ୍ରସ୍ତୁତ ଥିବା ସରକାର କହିଛନ୍ତି।
ଏହା ସହ ସୋସିଆଲ ମିଡିଆରେ ପ୍ରସାରିତ ମିଥ୍ୟା ଖବରକୁ ବିଶ୍ୱାସ ନକରିବାକୁ ସରକାର ଲୋକଙ୍କୁ ଅନୁରୋଧ କରିଛନ୍ତି। ଏଭଳି ଅସତ୍ୟ ସୂଚନା ଅନାବଶ୍ୟକ ଭୟ ସୃଷ୍ଟି କରିପାରେ ବୋଲି କୁହାଯାଇଛି।
ଘରୋଇ ଏଲ୍ପିଜି ଯୋଗାଣକୁ ସରକାର ସର୍ବାଧିକ ଅଗ୍ରାଧିକାର ଦେଇଥିବାବେଳେ କେତେକ ସଂଗଠନ ଉଠାଇଥିବା ଅଭାବ ନେଇ ଉଦ୍ବେଗକୁ ମଧ୍ୟ ଖତିଆନ କରାଯାଉଛି। ତଥାପି ଦେଶରେ କୌଣସି ଏଲ୍ପିଜି ସଙ୍କଟ ନଥିବା ସହ ଯୋଗାଣ ପର୍ଯ୍ୟାପ୍ତ ରହିଛି ବୋଲି ସରକାର ସ୍ପଷ୍ଟ କରିଛନ୍ତି।