ନୂଆଦିଲ୍ଲୀ:
2019 Pulwama attackର ମାଷ୍ଟରମାଇଣ୍ଡ ବୋଲି ଅଭିଯୁକ୍ତ ଆତଙ୍କବାଦୀ ହମଜା ବୁରହାନ ପାକିସ୍ତାନରେ ନିହତ ହୋଇଥିବା ନେଇ ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି। ସୂଚନା ଅନୁସାରେ, ପାକିସ୍ତାନ ଅଧୀକୃତ କଶ୍ମୀରର Muzaffarabadରେ ଅଜଣା ଦୁର୍ବୃତ୍ତମାନେ ତାଙ୍କୁ ଗୁଳି କରିଥିଲେ। ଆକ୍ରମଣରେ ସେ ଘଟଣାସ୍ଥଳରେ ମୃତ୍ୟୁବରଣ କରିଥିବା କୁହାଯାଉଛି।
ରିପୋର୍ଟ ଅନୁଯାୟୀ, ହମଜା ବୁରହାନଙ୍କ ପୂର୍ଣ୍ଣ ନାମ ଅରଜୁମନ୍ଦ ଗୁଲଜାର ଡାର ଥିଲା। ସେ ‘ହମଜା ବୁରହାନ’ ନାମରେ ଅଧିକ ପରିଚିତ ଥିଲେ ଏବଂ ‘ଡାକ୍ତର’ ନାମରେ ମଧ୍ୟ ସ୍ଥାନୀୟ ଅଞ୍ଚଳରେ ଜଣାଶୁଣା ଥିବା କୁହାଯାଉଛି। ୨୦୧୭ରେ ସେ Al-Badr ସଂଗଠନରେ ଯୋଗ ଦେଇଥିଲେ ଏବଂ ପରେ କମାଣ୍ଡର ଭାବେ କାମ କରୁଥିଲେ।
ସୂଚନା ମିଳିଛି ଯେ, ହମଜା ପାକିସ୍ତାନରେ ନିଜକୁ ଜଣେ ଶିକ୍ଷକ ଭାବେ ପରିଚୟ ଦେଉଥିଲେ ଏବଂ ଏକ ସ୍କୁଲର ପ୍ରିନ୍ସିପାଲ ଭାବେ କାର୍ଯ୍ୟ କରୁଥିଲେ। ଏହା ମାଧ୍ୟମରେ ସେ ନିଜର ପରିଚୟ ଲୁଚାଇ ରଖିଥିବା କୁହାଯାଉଛି।
୨୦୧୯ ଫେବ୍ରୁଆରି ୧୪ରେ ଜମ୍ମୁ-କଶ୍ମୀରର ପୁଲୱାମାରେ ସିଆରପିଏଫ୍ କାଫିଲା ଉପରେ ଆତ୍ମଘାତୀ ଆକ୍ରମଣ ହୋଇଥିଲା। ଏହି ଆକ୍ରମଣରେ ୪୦ରୁ ଅଧିକ ଯବାନ ସହିଦ ହୋଇଥିଲେ। ଏହା ପରେ ଭାରତ-ପାକିସ୍ତାନ ସମ୍ପର୍କରେ ତୀବ୍ର ଉତ୍ତେଜନା ସୃଷ୍ଟି ହୋଇଥିଲା।
ରିପୋର୍ଟ ଅନୁସାରେ, ହମଜା ବୁରହାନ ନିଜ ଅଫିସରେ ଥିବାବେଳେ କିଛି ଅଜଣା ବ୍ୟକ୍ତି ସେଠାରେ ପହଞ୍ଚି ତାଙ୍କ ଉପରେ ଅତର୍କିତ ଗୁଳିଚାଳନା କରିଥିଲେ। ତାଙ୍କ ମୁଣ୍ଡରେ ନିକଟରୁ ଗୁଳି ଲାଗିଥିବା କୁହାଯାଉଛି। ସେ ପିଓକେ ଅଞ୍ଚଳରେ ଆତଙ୍କବାଦୀ ସଂଗଠନ ପରିଚାଳନା କରିବା ସହ ସୀମା ଅଞ୍ଚଳରେ ଅନୁପ୍ରବେଶକୁ ସହଯୋଗ କରୁଥିବା ଅଭିଯୋଗ ଥିଲା।