ତେହେରାନ: ମଧ୍ୟପ୍ରାଚ୍ୟରେ ପୁଣି ଯୁଦ୍ଧ ଆଶଙ୍କା ଘନେଇଥିବା ବେଳେ ଇରାନ ହଠାତ୍ ନିଜର ପଶ୍ଚିମ ଆକାଶସୀମାକୁ ବନ୍ଦ କରିଦେଇଛି। ଆମେରିକା ଓ ଇସ୍ରାଏଲ ସହ ଚାଲିଥିବା ତଣାପୋଡ଼ ମଧ୍ୟରେ ଇରାନର ଏହି ପଦକ୍ଷେପ ସାରା ବିଶ୍ୱରେ ଚିନ୍ତା ବଢ଼ାଇଛି। ରକ୍ଷା ବିଶେଷଜ୍ଞମାନେ ଏହାକୁ ସମ୍ଭାବ୍ୟ ସାମରିକ ଅଭିଯାନ କିମ୍ବା ବଡ଼ ଆକ୍ରମଣ ପୂର୍ବର ସୁରକ୍ଷା ପ୍ରସ୍ତୁତି ବୋଲି ଆକଳନ କରୁଛନ୍ତି।
ଇରାନର ବେସାମରିକ ବିମାନ ଚଳାଚଳ କର୍ତ୍ତୃପକ୍ଷ ମେ’ ୨୫ ପର୍ଯ୍ୟନ୍ତ ନୋଟାମ୍ (NOTAM) ଜାରି କରି ପଶ୍ଚିମ ଆକାଶପଥରେ ଉଡ଼ାଣ ଉପରେ କଟକଣା ଲାଗୁ କରିଛନ୍ତି। ଦେଶର ଆଠଟି ପ୍ରମୁଖ ବିମାନବନ୍ଦରକୁ କେବଳ ଦିନବେଳେ ସୀମିତ ଭାବେ ଚଳାଚଳ କରିବାକୁ ଅନୁମତି ମିଳିଛି। ଏହାସହ ପୂର୍ବରୁ ଜାରି ହୋଇଥିବା ସମସ୍ତ ଉଡ଼ାଣ ଅନୁମତିକୁ ମଧ୍ୟ ବାତିଲ କରାଯାଇଛି।
ଏହି ନିଷ୍ପତ୍ତି ପଛରେ ଇରାନ କୌଣସି ସରକାରୀ କାରଣ ଦେଇନଥିଲେ ମଧ୍ୟ, ଫ୍ଲାଇଟ୍ ଟ୍ରାକିଂ ତଥ୍ୟ ଓ ଗୁଇନ୍ଦା ରିପୋର୍ଟରୁ ତେହେରାନର ମେହରାବାଦ ବିମାନବନ୍ଦରରେ ଲଢୁଆ ବିମାନ ଚଳାଚଳ ବଢ଼ିଥିବା ସୂଚନା ମିଳିଛି। ରାଜଧାନୀ ତେହେରାନ ଆକାଶରେ ଯୁଦ୍ଧ ବିମାନର ନିରନ୍ତର ଟହଲ ମଧ୍ୟ ଦେଖାଯାଇଛି।
ଏହି ଉତ୍ତେଜନାର ପ୍ରଭାବ ଆମେରିକା ଉପରେ ମଧ୍ୟ ପଡ଼ିଛି। ରାଷ୍ଟ୍ରପତି Donald Trump ନିଜର ସମସ୍ତ ସରକାରୀ କାର୍ଯ୍ୟସୂଚୀ ଓ ଯାତ୍ରା ବାତିଲ କରି ହ୍ୱାଇଟ୍ ହାଉସକୁ ଫେରିଥିବା ଖବର ମିଳିଛି। ସେ ତାଙ୍କ ପୁଅଙ୍କ ବିବାହ ଅନୁଷ୍ଠାନକୁ ମଧ୍ୟ ଏଡ଼ାଇଥିବା ସୂଚନା ରହିଛି।
ଇରାନ ଓ ଇରାକର ଆକାଶପଥ ବନ୍ଦ ହେବାର ପ୍ରଭାବ ଆନ୍ତର୍ଜାତୀୟ ବିମାନ ଚଳାଚଳ ଉପରେ ସିଧାସଳଖ ପଡ଼ିଛି। ବିଶ୍ୱର ଅନେକ ବାଣିଜ୍ୟିକ ବିମାନ କମ୍ପାନି ଏହି ଅଞ୍ଚଳକୁ ‘ରେଡ୍ ଜୋନ୍’ ଘୋଷଣା କରି ଉଡ଼ାଣ ରୁଟ୍ ପରିବର୍ତ୍ତନ କରୁଛନ୍ତି। ଏଥିରେ ଦୁବାଇ, ଆବୁଧାବି ଓ ଭାରତଗାମୀ ବିମାନ ଯାତ୍ରା ବିଶେଷ ଭାବେ ପ୍ରଭାବିତ ହୋଇଛି।
Emirates ଯାତ୍ରୀମାନଙ୍କ ପାଇଁ ନୂଆ ନିର୍ଦ୍ଦେଶାବଳୀ ଜାରି କରିଛି। ବିମାନ ଉଡ଼ାଣର କମ୍ ସେ କମ୍ ୩ ଘଣ୍ଟା ପୂର୍ବରୁ ବିମାନବନ୍ଦର ପହଞ୍ଚିବା ସହ ୬୦ ମିନିଟ୍ ପୂର୍ବରୁ ବୋର୍ଡିଂ ଗେଟରେ ରିପୋର୍ଟ କରିବାକୁ କୁହାଯାଇଛି। ଦୁବାଇ ବିମାନବନ୍ଦର ଅଞ୍ଚଳରେ ଭାରି ଟ୍ରାଫିକ୍ ଆଶଙ୍କା ଥିବାରୁ ଯାତ୍ରୀଙ୍କୁ ମେଟ୍ରୋ ବ୍ୟବହାର କରିବାକୁ ପରାମର୍ଶ ଦିଆଯାଇଛି।
ଅନ୍ୟପକ୍ଷରେ Air India ଓ Air India Express ପଶ୍ଚିମ ଏସିଆ ଓ ୟୁଏଇ ମାର୍ଗରେ ଉଡ଼ାଣ ଜାରି ରଖିବାକୁ କହିଥିଲେ ମଧ୍ୟ, ସେଗୁଡ଼ିକ ସ୍ଥାନୀୟ ନିୟାମକ ଅନୁମତି ଓ ସ୍ଲଟ୍ ଉପଲବ୍ଧତା ଉପରେ ନିର୍ଭର କରିବ ବୋଲି ସ୍ପଷ୍ଟ କରିଛନ୍ତି।
ଏହି ଘଟଣା ମଧ୍ୟପ୍ରାଚ୍ୟରେ ଚାଲିଥିବା ଅସ୍ଥାୟୀ ଅସ୍ତ୍ରବିରତିକୁ ମଧ୍ୟ ସଙ୍କଟରେ ପକାଇଛି। ତୈଳ ଓ ଗ୍ୟାସ୍ ଯୋଗାଣ ଶୃଙ୍ଖଳ ପୂର୍ବରୁ ପ୍ରଭାବିତ ହୋଇଥିବା ବେଳେ ଏହି ଆକାଶପଥ ବନ୍ଦ ହେବା ଆସନ୍ତା ଦିନରେ ଆଉ ବଡ଼ ଧରଣର ସଂଘର୍ଷର ସଙ୍କେତ ଦେଉଛି।