ଭୁବନେଶ୍ୱର: ରାଜ୍ୟର ବରିଷ୍ଠ ନାଗରିକମାନଙ୍କ ପାଇଁ ଏକ ଖୁସି ଖବର। ଓଡ଼ିଶା ସରକାର ନିଜର ପ୍ରତିଷ୍ଠିତ ଏବଂ ଲୋକପ୍ରିୟ କାର୍ଯ୍ୟକ୍ରମ ‘ବରିଷ୍ଠ ନାଗରିକ ତୀର୍ଥଯାତ୍ରା ଯୋଜନା ୨୦୨୬-୨୭’ (Baristha Nagarik Tirtha Yatra Yojana) ପାଇଁ ନୂତନ ମାର୍ଗଦର୍ଶିକା ଉନ୍ମୋଚନ କରିଛନ୍ତି। ଏହାଦ୍ୱାରା ରାଜ୍ୟର ବୟୋଜ୍ୟେଷ୍ଠ ବ୍ୟକ୍ତିମାନେ ସରକାରୀ ସହାୟତାରେ ଦେଶର ବିଭିନ୍ନ ପ୍ରମୁଖ ତୀର୍ଥସ୍ଥାନ ପରିଭ୍ରମଣ କରିବାର ସୁଯୋଗ ପାଇପାରିବେ।ପର୍ଯ୍ୟଟନ ଭବନଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ରାଜ୍ୟର ଉପମୁଖ୍ୟମନ୍ତ୍ରୀ ତଥା ପର୍ଯ୍ୟଟନ ମନ୍ତ୍ରୀ ପ୍ରଭାତୀ ପରିଡ଼ା ଏହି ନୂତନ ଗାଇଡ୍ଲାଇନ୍ ଜାରି କରିଛନ୍ତି।
ବରିଷ୍ଠ ନାଗରିକମାନଙ୍କୁ ସମ୍ମାନଜନକ, ସୁରକ୍ଷିତ ଏବଂ ସୁବିଧାଜନକ ଯାତ୍ରା ପ୍ରଦାନ କରିବା ସରକାରଙ୍କ ମୁଖ୍ୟ ଲକ୍ଷ୍ୟ ବୋଲି ସେ ପ୍ରକାଶ କରିଛନ୍ତି।
ଆବେଦନ ସମୟସୀମା ଓ ପ୍ରକ୍ରିୟା:
ଆବେଦନ ତାରିଖ: ଚଳିତ ବର୍ଷ ଜୁଲାଇ ୧୫ରୁ ଆରମ୍ଭ ହୋଇ ଅଗଷ୍ଟ ୧୪, ୨୦୨୬ ପର୍ଯ୍ୟନ୍ତ ଆବେଦନ ପ୍ରକ୍ରିୟା ଚାଲିବ
ଆବେଦନ ମାଧ୍ୟମ: ଆଶାୟୀ ବରିଷ୍ଠ ନାଗରିକମାନେ ସରକାରଙ୍କ ସ୍ୱତନ୍ତ୍ର ପୋର୍ଟାଲ [yatra.odisha.gov.in](https://yatra.odisha.gov.in/) ଜରିଆରେ ଅନଲାଇନ୍ ଆବେଦନ କରିପାରିବେ। ଏହାଛଡ଼ା ନିର୍ଦ୍ଧାରିତ ଅଫଲାଇନ୍ ପ୍ରକ୍ରିୟାରେ ମଧ୍ୟ ଆବେଦନ ଫର୍ମ ଦାଖଲ କରିହେବ।ପର୍ଯ୍ୟଟନ ବିଭାଗର ସୂଚନା ଅନୁଯାୟୀ, ଏହି ଯୋଜନା ଆରମ୍ଭ ହେବା ଦିନଠାରୁ ଏପର୍ଯ୍ୟନ୍ତ ପ୍ରାୟ ୪୫,୫୫୫ ରୁ ଅଧିକ ବରିଷ୍ଠ ନାଗରିକ ଏହାର ଲାଭ ଉଠାଇ ସାରିଛନ୍ତି।ଏହି ଯୋଜନାରେ ବରିଷ୍ଠ ନାଗରିକମାନଙ୍କୁ ରେଳ ଯାତ୍ରା, ରହିବା, ଖାଇବା ଏବଂ ସେମାନଙ୍କ ସ୍ୱାସ୍ଥ୍ୟ ସୁରକ୍ଷା ପାଇଁ ଆଇଆରସିଟିସି (IRCTC) ସହଯୋଗରେ ସମସ୍ତ ପ୍ରକାର ମାଗଣା ବ୍ୟବସ୍ଥା ଯୋଗାଇ ଦିଆଯାଏ।
ବିଶେଷ ସୂଚନା: ସମ୍ପୂର୍ଣ୍ଣ ଯୋଗ୍ୟତା, ଆବଶ୍ୟକୀୟ ଦସ୍ତାବିଜ ଏବଂ ଆବେଦନ ଶୈଳୀର ସବିଶେଷ ବିବରଣୀ ପର୍ଯ୍ୟଟନ ବିଭାଗର ଅଫିସିଆଲ୍ ୱେବସାଇଟ୍ରେ ଉପଲବ୍ଧ କରାଯାଇଛି। ଆଜିର ଏହି ପ୍ରେସ୍ କନଫରେନ୍ସରେ ପର୍ଯ୍ୟଟନ ସଚିବ ବଲୱନ୍ତ ସିଂ, ନିର୍ଦ୍ଦେଶକ ଦୀପଙ୍କର ମହାପାତ୍ର ଏବଂ IRCTC ର ଆଞ୍ଚଳିକ ଅଧିକାରୀ ଅନୁଜ ଦତ୍ତ ପ୍ରମୁଖ ଉପସ୍ଥିତ ଥିଲେ।