ନୂଆଦିଲ୍ଲୀ: କେନ୍ଦ୍ର ସରକାର ଭାରତୀୟ ଜୀବନ ବୀମା ନିଗମ (ଏଲ୍ଆଇସି)ର ୬.୫ ପ୍ରତିଶତ ଅଂଶଧନ ବିକ୍ରି କରିବାକୁ ଘୋଷଣା କରିଛନ୍ତି। ଏହି ବିକ୍ରି ଅଫର ଫର୍ ସେଲ୍ (OFS) ପ୍ରକ୍ରିୟାରେ ମଙ୍ଗଳବାରଠାରୁ ଆରମ୍ଭ ହେବ ବୋଲି ନିବେଶ ଓ ସରକାରୀ ସମ୍ପତ୍ତି ପରିଚାଳନା ବିଭାଗ (DIPAM)ର ସଚିବ ଆରୁନିଷ ଚାୱଲା ସୂଚନା ଦେଇଛନ୍ତି।
ପ୍ରଥମ ପର୍ଯ୍ୟାୟରେ ସରକାର ୨.୫ ପ୍ରତିଶତ ଅଂଶଧନ ବିକ୍ରି କରିବେ। ବଜାରରେ ଭଲ ଚାହିଦା ରହିଲେ ଅତିରିକ୍ତ ୪ ପ୍ରତିଶତ ଅଂଶଧନ ମଧ୍ୟ ବିକ୍ରି କରାଯିବ। ମଙ୍ଗଳବାର ନନ୍-ରିଟେଲ୍ ନିବେଶକମାନେ ସେୟାର କିଣିପାରିବେ, ଯେତେବେଳେ ବୁଧବାର ରିଟେଲ୍ ନିବେଶକଙ୍କ ପାଇଁ ଓଏଫ୍ଏସ୍ ଖୋଲା ରହିବ।
ସୋମବାର ବଜାର ବନ୍ଦ ବେଳକୁ ଏଲ୍ଆଇସିର ଏକ ସେୟାରର ମୂଲ୍ୟ ୪୨୪ ଟଙ୍କା ଥିଲା। ସରକାର ଏହା ଉପରେ ୧୦ ପ୍ରତିଶତ ରିହାତି ଦେଇ ପ୍ରତି ସେୟାର ୩୮୨ ଟଙ୍କା ଦରରେ ବିକ୍ରି କରିବେ। ସମ୍ପୂର୍ଣ୍ଣ ୬.୫ ପ୍ରତିଶତ ଅଂଶଧନ ବିକ୍ରି ହେଲେ ସରକାରଙ୍କ ପାଖକୁ ପ୍ରାୟ ୩୧,୪୦୦ କୋଟି ଟଙ୍କା ଆସିବ ବୋଲି ଆକଳନ କରାଯାଇଛି।
ବର୍ତ୍ତମାନ ଏଲ୍ଆଇସିରେ କେନ୍ଦ୍ର ସରକାରଙ୍କର ୯୬.୫ ପ୍ରତିଶତ ଅଂଶଧନ ରହିଛି। ଏହି ବିକ୍ରି ପରେ ସରକାରଙ୍କ ଅଂଶ ୯୦ ପ୍ରତିଶତକୁ ଖସି ଆସିବ। ସେହିପରି ସାଧାରଣ ଅଣ-ପ୍ରମୋଟର ନିବେଶକଙ୍କ ଅଂଶଧନ ୩.୫ ପ୍ରତିଶତରୁ ବୃଦ୍ଧି ପାଇ ୧୦ ପ୍ରତିଶତରେ ପହଞ୍ଚିବ।
ଉଲ୍ଲେଖଯୋଗ୍ୟ, ୨୦୨୨ରେ ସରକାର ଏଲ୍ଆଇସିର ଆଇପିଓ ଜରିଆରେ ୩.୫ ପ୍ରତିଶତ ଅଂଶଧନ ବିକ୍ରି କରିଥିଲେ। ସେବି (SEBI) ନିୟମ ଅନୁଯାୟୀ ୨୦୨୭ ମେ ସୁଦ୍ଧା ଏଲ୍ଆଇସିର ଅତି କମରେ ୧୦ ପ୍ରତିଶତ ଏବଂ ୨୦୩୨ ସୁଦ୍ଧା ୨୫ ପ୍ରତିଶତ ଅଂଶଧନ ସାଧାରଣ ନିବେଶକଙ୍କ ହାତରେ ରହିବା ଆବଶ୍ୟକ।
ଚଳିତ ଆର୍ଥିକ ବର୍ଷରେ ସରକାର ପୁଞ୍ଜି ପ୍ରତ୍ୟାହାର ଓ ସମ୍ପତ୍ତି ମୁଦ୍ରୀକରଣ ମାଧ୍ୟମରେ ୮୦ ହଜାର କୋଟି ଟଙ୍କା ସଂଗ୍ରହ କରିବାର ଲକ୍ଷ୍ୟ ରଖିଛନ୍ତି। ଏପର୍ଯ୍ୟନ୍ତ ୨୧,୨୦୧ କୋଟି ଟଙ୍କା ସଂଗ୍ରହ ହୋଇଥିବାବେଳେ ଏଲ୍ଆଇସି ଅଂଶଧନ ବିକ୍ରି ପରେ ଏହି ରାଶି ୫୨ ହଜାର କୋଟି ଟଙ୍କାରୁ ଅଧିକକୁ ପହଞ୍ଚିବ।