୨୨ ବର୍ଷ ପରେ ନିର୍ଦ୍ଦୋଷ ସାବ୍ୟସ୍ତ ଅର୍ଜୁନ ଜାନୀ; ଓଡ଼ିଶା ହାଇକୋର୍ଟଙ୍କ ରାୟକୁ ଭର୍ସନା କଲେ ସୁପ୍ରିମ୍କୋର୍ଟ
ନୂଆଦିଲ୍ଲୀ: ଦୀର୍ଘ ୨୨ ବର୍ଷ ଧରି କାରାଗାରରେ ରହିବା ପରେ ଓଡ଼ିଶାର କୋରାପୁଟ ଜିଲ୍ଲାର ଅର୍ଜୁନ ଜାନୀ ଓରଫ ଟୁନଟୁନଙ୍କୁ ସମ୍ପୂର୍ଣ୍ଣ ନିର୍ଦ୍ଦୋଷ ଘୋଷଣା କରିଛନ୍ତି ସୁପ୍ରିମ୍କୋର୍ଟ। ଏହା ସହ ଓଡ଼ିଶା ହାଇକୋର୍ଟଙ୍କ ପୂର୍ବ ରାୟକୁ ରଦ୍ଦ କରି ସର୍ବୋଚ୍ଚ ଅଦାଲତ ଦେଶର ଆପରାଧିକ ନ୍ୟାୟ ବ୍ୟବସ୍ଥାର ତ୍ରୁଟି ଓ ବିଳମ୍ବିତ ନ୍ୟାୟ ପ୍ରକ୍ରିୟାକୁ ନେଇ କଡ଼ା ଟିପ୍ପଣୀ କରିଛନ୍ତି।
ଜଷ୍ଟିସ୍ ଜେ.ବି. ପାର୍ଦିୱାଲା ଓ ଜଷ୍ଟିସ୍ କେ. ବିନୋଦ ଚନ୍ଦ୍ରନଙ୍କ ଖଣ୍ଡପୀଠ କହିଛନ୍ତି, ନ୍ୟାୟ ବ୍ୟବସ୍ଥାର ମିଳିତ ବିଫଳତା ଯୋଗୁଁ ଜଣେ ନିରୀହ ବ୍ୟକ୍ତିଙ୍କ ଜୀବନର ୨୨ ବର୍ଷ ଅନ୍ୟାୟ ଭାବେ ନଷ୍ଟ ହୋଇଯାଇଛି। କେବଳ ସନ୍ଦେହ ଆଧାରରେ ଗିରଫ ହୋଇ ଦୃଢ଼ ପ୍ରମାଣ ବିନା ଏତେ ଦୀର୍ଘ ସମୟ ଜେଲ୍ରେ ରହିବା ଅତ୍ୟନ୍ତ ଦୁଃଖଦ ଏବଂ ଚିନ୍ତାଜନକ ବୋଲି ଅଦାଲତ ମତ ଦେଇଛନ୍ତି।
ହାଇକୋର୍ଟଙ୍କ ଆଭିମୁଖ୍ୟ ଉପରେ ସୁପ୍ରିମ୍କୋର୍ଟଙ୍କ କଡ଼ା ଅସନ୍ତୋଷ
ମାମଲା ଅନୁଯାୟୀ, କୋରାପୁଟ ଜିଲ୍ଲାର ଅର୍ଜୁନ ଜାନୀଙ୍କୁ ତିନି ଜଣ ମହିଳାଙ୍କ ହତ୍ୟା ମାମଲାରେ ନିମ୍ନ ଅଦାଲତ ଆଜୀବନ କାରାଦଣ୍ଡ ଦେଇଥିଲେ। ଏହି ରାୟକୁ ଚ୍ୟାଲେଞ୍ଜ କରି ସେ ଜେଲ୍ରୁ ଓଡ଼ିଶା ହାଇକୋର୍ଟରେ ଅପିଲ୍ କରିଥିଲେ। କିନ୍ତୁ ସେତେବେଳେ ସେ ପ୍ରାୟ ୧୨ ବର୍ଷ ଜେଲ୍ରେ ରହିସାରିଥିଲେ ମଧ୍ୟ, ଅପିଲ୍ରେ ୩,୧୫୭ ଦିନ ବିଳମ୍ବ ହୋଇଥିବା ଦର୍ଶାଇ ହାଇକୋର୍ଟ ମାମଲାର ମୂଳ ବିଷୟ ଉପରେ ବିଚାର ନକରି ଆବେଦନ ଖାରଜ କରିଦେଇଥିଲେ।
ସୁପ୍ରିମ୍କୋର୍ଟ ଏହାକୁ ଅତ୍ୟନ୍ତ ସମ୍ବେଦନହୀନ ଆଭିମୁଖ୍ୟ ବୋଲି କହିବା ସହ, କେବଳ ବିଳମ୍ବ ଆଧାରରେ ଜଣେ ବନ୍ଦୀଙ୍କ ଅପିଲ୍କୁ ଖାରଜ କରିବା ନ୍ୟାୟର ମୂଳ ଉଦ୍ଦେଶ୍ୟ ବିରୋଧୀ ବୋଲି ମନ୍ତବ୍ୟ କରିଛନ୍ତି।
ଦୁର୍ବଳ ସାକ୍ଷ୍ୟ ଉପରେ ଦଣ୍ଡାଦେଶ ଅଗ୍ରହଣଯୋଗ୍ୟ
ସର୍ବୋଚ୍ଚ ଅଦାଲତ ମାମଲାର ସମସ୍ତ ପ୍ରମାଣ ଓ ସାକ୍ଷ୍ୟର ପୁନଃପରୀକ୍ଷା କରି ଦେଖିଥିଲେ ଯେ, ଅଭିଯୋଗ ପକ୍ଷର ମୂଳ ଭିତ୍ତି ଥିବା ଏକମାତ୍ର ପ୍ରତ୍ୟକ୍ଷଦର୍ଶୀଙ୍କ ବୟାନ ବିଶ୍ୱସନୀୟ ନଥିଲା। ଘଟଣାସ୍ଥଳ, ସମୟ ଓ ପରିସ୍ଥିତି ଅନୁଯାୟୀ ସେହି ସାକ୍ଷ୍ୟରେ ଅନେକ ଅସଙ୍ଗତି ଓ ସନ୍ଦେହ ଥିବାରୁ କେବଳ ସେହି ଆଧାରରେ ଦଣ୍ଡାଦେଶ ଦେବା ଉଚିତ ନୁହେଁ ବୋଲି ଅଦାଲତ ସ୍ପଷ୍ଟ କରିଛନ୍ତି।
ଅଦାଲତ କହିଛନ୍ତି, ଜଣେ ସାକ୍ଷୀଙ୍କ ବୟାନ ଆଧାରରେ ଦୋଷୀ ସାବ୍ୟସ୍ତ କରାଯାଇପାରେ, କିନ୍ତୁ ସେହି ସାକ୍ଷ୍ୟ ନିର୍ଭରଯୋଗ୍ୟ, ସ୍ପଷ୍ଟ ଓ ପରିସ୍ଥିତି ସହ ସମ୍ପୂର୍ଣ୍ଣ ସମଞ୍ଜସ ହେବା ଆବଶ୍ୟକ। ଏହି ମାମଲାରେ ସେପରି କୌଣସି ଦୃଢ଼ ପ୍ରମାଣ ମିଳିନଥିଲା।
ପୁନର୍ବାସ ପାଇଁ ମଧ୍ୟ ନିର୍ଦ୍ଦେଶ
ସୁପ୍ରିମ୍କୋର୍ଟ କେବଳ ଅର୍ଜୁନ ଜାନୀଙ୍କୁ ନିର୍ଦ୍ଦୋଷ ଘୋଷଣା କରିନାହାନ୍ତି, ବରଂ ୨୨ ବର୍ଷ ପରେ ସମାଜକୁ ଫେରୁଥିବା ତାଙ୍କର ପୁନର୍ବାସ ପାଇଁ ମଧ୍ୟ ବିଶେଷ ନିର୍ଦ୍ଦେଶ ଜାରି କରିଛନ୍ତି। କୋରାପୁଟ ଜିଲ୍ଲା ଆଇନ ସେବା ପ୍ରାଧିକରଣ (DLSA) ଓ ଜିଲ୍ଲା ପ୍ରଶାସନକୁ ତାଙ୍କୁ ଆର୍ଥିକ, ସାମାଜିକ ଓ ଆଇନଗତ ସହାୟତା ଯୋଗାଇ ସମାଜରେ ସମ୍ମାନର ସହ ପୁନଃ ପ୍ରତିଷ୍ଠିତ କରିବାକୁ ନିର୍ଦ୍ଦେଶ ଦିଆଯାଇଛି।
ଏହି ରାୟକୁ ଦେଶର ଆପରାଧିକ ନ୍ୟାୟ ବ୍ୟବସ୍ଥା ପାଇଁ ଏକ ଗୁରୁତ୍ୱପୂର୍ଣ୍ଣ ଦିଗନିର୍ଦ୍ଦେଶ ଭାବେ ଦେଖାଯାଉଛି। ବିଶେଷକରି ଗରିବ ଓ ଆଇନଗତ ସହାୟତାରୁ ବଞ୍ଚିତ ବ୍ୟକ୍ତିଙ୍କ ଅଧିକାର ସୁରକ୍ଷା ନେଇ ସୁପ୍ରିମ୍କୋର୍ଟଙ୍କ ଏହି ରାୟ ଭବିଷ୍ୟତରେ ନଜିର ସୃଷ୍ଟି କରିପାରେ।