ନୂଆଦିଲ୍ଲୀ: ପରୀକ୍ଷାରେ ଅନିୟମିତତା ଓ ପ୍ରଶ୍ନପତ୍ର ଲିକ୍ ଘଟଣାକୁ ବିରୋଧ କରି ଦିଲ୍ଲୀର ଜନ୍ତରମନ୍ତରରେ ଚାଲିଥିବା ଆନ୍ଦୋଳନ ମଧ୍ୟରେ ପରିବେଶବିତ୍ ସୋନମ ୱାଙ୍ଗଚୁକଙ୍କ ଅନିର୍ଦ୍ଦିଷ୍ଟକାଳୀନ ଅନଶନ ୧୭ତମ ଦିନରେ ପହଞ୍ଚିଛି। ତାଙ୍କ ସ୍ୱାସ୍ଥ୍ୟ ଅବନତି ଘଟୁଥିବା ପରିପ୍ରେକ୍ଷୀରେ ବିଭିନ୍ନ ବିରୋଧୀ ଦଳର ନେତାମାନେ ତାଙ୍କୁ ଅନଶନ ଶେଷ କରିବାକୁ ଅନୁରୋଧ କରିଛନ୍ତି।
ଆମ୍ ଆଦ୍ମୀ ପାର୍ଟିର ଜାତୀୟ ସଂଯୋଜକ ଅରବିନ୍ଦ କେଜ୍ରିୱାଲ ଘୋଷଣା କରିଛନ୍ତି ଯେ, ସେ ଜୁଲାଇ ୧୬ ତାରିଖ ସନ୍ଧ୍ୟା ୫ଟାରେ ଜନ୍ତରମନ୍ତରରେ ପହଞ୍ଚି ଆନ୍ଦୋଳନକାରୀଙ୍କ ସହ ଏକାତ୍ମତା ପ୍ରକାଶ କରିବେ। ସାମ୍ବାଦିକ ସମ୍ମିଳନୀରେ ସେ କହିଛନ୍ତି, ସୋନମ ୱାଙ୍ଗଚୁକ ଦେଶର ଏକ ଅମୂଲ୍ୟ ସମ୍ପଦ। ତାଙ୍କ ସ୍ୱାସ୍ଥ୍ୟକୁ ଦୃଷ୍ଟିରେ ରଖି ସେ ଅନଶନ ଶେଷ କରିବା ଉଚିତ। ଗଣତାନ୍ତ୍ରିକ ଉପାୟରେ ସଂଗ୍ରାମକୁ ଆଗକୁ ବଢ଼ାଇବାର ଅନେକ ବିକଳ୍ପ ରହିଛି ବୋଲି ସେ କହିଛନ୍ତି।
କେଜ୍ରିୱାଲ ଆହୁରି କହିଛନ୍ତି ଯେ, ତାଙ୍କ ଦଳ ପରୀକ୍ଷା ବ୍ୟବସ୍ଥାରେ ସ୍ୱଚ୍ଛତା ଏବଂ ପ୍ରଶ୍ନପତ୍ର ଲିକ୍ ରୋକିବା ପାଇଁ ସଂସ୍କାର ଦାବିକୁ ସମର୍ଥନ କରୁଛି। ଏହା ସହ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପଦତ୍ୟାଗ ଦାବିକୁ ମଧ୍ୟ ସେ ପୁନର୍ବ୍ୟକ୍ତ କରିଛନ୍ତି। ଏହାପୂର୍ବରୁ ଆପ୍ ନେତ୍ରୀ ତଥା ପୂର୍ବତନ ଦିଲ୍ଲୀ ମୁଖ୍ୟମନ୍ତ୍ରୀ ଆତିଶୀ ୱାଙ୍ଗଚୁକଙ୍କୁ ଭେଟି ତାଙ୍କ ପ୍ରତି ସମର୍ଥନ ଜଣାଇଥିଲେ।
ଏହାଛଡ଼ା ଶିବସେନା (ୟୁବିଟି) ନେତା ଉଦ୍ଧବ ଠାକ୍ରେ, ତୃଣମୂଳ କଂଗ୍ରେସ ସାଂସଦ ମହୁଆ ମୈତ୍ର, ସମାଜବାଦୀ ପାର୍ଟି ନେତା ଅଖିଳେଶ ଯାଦବଙ୍କ ସମେତ ବହୁ ବିରୋଧୀ ନେତା ୱାଙ୍ଗଚୁକଙ୍କୁ ଅନଶନ ଶେଷ କରିବାକୁ ଅନୁରୋଧ କରିଛନ୍ତି। ସେମାନଙ୍କ କହିବା ଅନୁସାରେ, ୱାଙ୍ଗଚୁକଙ୍କ ଜୀବନ ଦେଶ ପାଇଁ ଗୁରୁତ୍ୱପୂର୍ଣ୍ଣ। ଆନ୍ଦୋଳନ ଜାରି ରହୁ, କିନ୍ତୁ ତାଙ୍କ ସ୍ୱାସ୍ଥ୍ୟକୁ ବିପଦରେ ପକାଇ ନୁହେଁ।
ସ୍ୱାସ୍ଥ୍ୟ ଅବସ୍ଥା ନେଇ ବଢ଼ୁଛି ଚିନ୍ତା
ଲେଖିକା ଅରୁନ୍ଧତୀ ରାୟ, ଅଭିନେତା ନାସିରୁଦ୍ଦିନ ଶାହ ଏବଂ ରତ୍ନା ପାଠକ ଶାହଙ୍କ ସମେତ ଅନେକ ବିଶିଷ୍ଟ ବ୍ୟକ୍ତି ମଧ୍ୟ ୱାଙ୍ଗଚୁକଙ୍କୁ ଅନଶନ ଭାଙ୍ଗିବାକୁ ଅପିଲ୍ କରିଛନ୍ତି। ୱାଙ୍ଗଚୁକ ୨୮ ଜୁନ୍ରୁ ଅନିର୍ଦ୍ଦିଷ୍ଟକାଳୀନ ଅନଶନରେ ବସିଥିବା ବେଳେ ସର୍ବଶେଷ ସ୍ୱାସ୍ଥ୍ୟ ବୁଲେଟିନ୍ ଅନୁସାରେ ତାଙ୍କର ପ୍ରାୟ ୮.୫ କିଲୋଗ୍ରାମ ଓଜନ କମିଯାଇଛି। ରକ୍ତରେ ଶର୍କରା ପରିମାଣ ହ୍ରାସ ପାଇବା ସହ ଶାରୀରିକ ଦୁର୍ବଳତା ବଢ଼ିଥିଲେ ମଧ୍ୟ ସେ ଦାବି ପୂରଣ ନହେବା ପର୍ଯ୍ୟନ୍ତ ଅନଶନ ଜାରି ରଖିବେ ବୋଲି ସ୍ପଷ୍ଟ କରିଛନ୍ତି।