ନୂଆଦିଲ୍ଲୀ: ଉତ୍ତର ଭାରତର ପର୍ବତାଞ୍ଚଳଗୁଡିକରେ ପ୍ରକୃତିର କୋପ ଆବାରେ ତାଣ୍ଡବ ଚାଲିଛି। କାଶ୍ମୀରରୁ ହିମାଚଳ ପ୍ରଦେଶ ଯାଏଁ ବନ୍ୟା, ପାହାଡ଼ ଧସିବା ଓ ଭୂସ୍ଖଳନରେ ଲୋକଙ୍କ ଜୀବନ-ଜୀବିକା ସଙ୍କଟରେ ପଡ଼ିଛି।
ହିମାଚଳ ପ୍ରଦେଶର ଚାମ୍ବା, ଉଦୟପୁର ଓ କୁଲ୍ଲୁ ଅଞ୍ଚଳରେ ପ୍ରବଳ ବର୍ଷାରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ପାହାଡ଼ରୁ ବହିଆସୁଥିବା ବଡ଼ ପଥର ଓ କାଦୁଆ ପାଣି ଗାଁ, ଘର ଓ ରାସ୍ତାକୁ ପ୍ରଭାବିତ କରିଛି। ଏନଏଚ୍–୩ ଓ କୁଲ୍ଲୁ–ମନାଲି ଜାତୀୟ ରାଜପଥର କେତେକ ଅଂଶ ଧୋଇଯାଇଥିବାରୁ ଯୋଗାଯୋଗ ବିଛିନ୍ନ ହୋଇଛି।
ଦିଲ୍ଲୀରେ ମଧ୍ୟ ପ୍ରବଳ ବର୍ଷାରେ ଯମୁନା ନଦୀ ବିପଦ ସଙ୍କେତ ଟପିଯାଇଛି। ତଳିଆ ଅଞ୍ଚଳରେ ବନ୍ୟାର ଆଶଙ୍କା ବଢ଼ିଥିବାରୁ ପ୍ରଶାସନ, ସିଡବ୍ଲୁସି, ଏନ୍ଡିଆର୍ଏଫ୍ ଓ ଏସ୍ଡିଆର୍ଏଫ୍ ଉଦ୍ଧାରକାର୍ଯ୍ୟରେ ଲାଗିଛନ୍ତି।
ଜମ୍ମୁ-କାଶ୍ମୀରର ଉଧମପୁର ଜିଲ୍ଲାରେ ପ୍ରବଳ ବର୍ଷା ଓ ଭୂସ୍ଖଳନରେ ରାଜପଥ ଧସିପଡ଼ିଥିବାରୁ ବଡ଼ ଟ୍ରକ୍ ଓ ଗାଡ଼ି ତଳକୁ ଖସିଗଲା। ଟ୍ରେନ୍ ଲାଇନ୍ କ୍ଷତିଗ୍ରସ୍ତ ହେବାରୁ ଯାତାୟାତ ବନ୍ଦ ରହିଛି। ପଛଲା ଦୁଇ ସପ୍ତାହରେ ବିଭିନ୍ନ ଅଞ୍ଚଳରେ ଘଟିଥିବା ଦୁର୍ଘଟଣାରେ ୪୦ରୁ ଅଧିକ ଲୋକଙ୍କ ମୃତ୍ୟୁ ଓ ୨୧ ଜଣଙ୍କ ଆହତ ହୋଇଛନ୍ତି।
ଏହା ସହିତ, ଭୂସ୍ଖଳନ ଓ ବାଦଲଫଟାରେ ୪୧ ଜଣଙ୍କ ମୃତ୍ୟୁ ଘଟିବା ପରେ ବୈଷ୍ଣୋଦେବୀ ଯାତ୍ରାକୁ ଅସ୍ଥାୟୀଭାବେ ବନ୍ଦ କରାଯାଇଛି। ଶ୍ରୀମାତା ବୈଷ୍ଣୋଦେବୀ ବୋର୍ଡ ଯାତ୍ରୀଙ୍କ ସୁରକ୍ଷା ଦୃଷ୍ଟିରୁ ଏହି ପଦକ୍ଷେପ ନେଇଛି।