ୱାସିଂଟନ: ବିଶ୍ୱର ସର୍ବାଧିକ ତୈଳ ଭଣ୍ଡାର ଥିବା ଦେଶ ଭେନେଜୁଏଲା ଉପରେ ସାମରିକ ଆକ୍ରମଣ ପାଇଁ ଆମେରିକା ପ୍ରସ୍ତୁତି ଆରମ୍ଭ କରିଛି ବୋଲି ଖବର ପ୍ରକାଶ ପାଇଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିର୍ଦ୍ଦେଶରେ ଆମେରିକା ନୌସେନା ଭେନେଜୁଏଲା ଉପକୂଳ ନିକଟରେ ଯୁଦ୍ଧ ଜାହାଜ ମୁତୟନ କରିଛି। ଏହି ପଦକ୍ଷେପକୁ ଆନ୍ତର୍ଜାତୀୟ ମଞ୍ଚରେ ଭେନେଜୁଏଲା ବିରୋଧରେ ସମ୍ଭାବ୍ୟ ସାମରିକ ରଣନୀତିର ଏକ ଅଂଶ ବୋଲି ବିଶ୍ଳେଷକମାନେ ଦେଖୁଛନ୍ତି।
ଭେନେଜୁଏଲାର ରାଷ୍ଟ୍ରପତି ନିକୋଲାସ୍ ମାଦୁରୋ ସ୍ପଷ୍ଟ କରିଛନ୍ତି ଯେ ଆମେରିକୀୟ ସେନାଙ୍କୁ କୌଣସି ପରିସ୍ଥିତିରେ ଦେଶର ସୀମାରେ ପ୍ରବେଶ କରିବାକୁ ଦିଆଯିବ ନାହିଁ। ସେ କହିଛନ୍ତି, “ଭେନେଜୁଏଲା ଶାନ୍ତି, ସାର୍ବଭୌମତ୍ୱ ଓ ଆଞ୍ଚଳିକ ଅଖଣ୍ଡତା ରକ୍ଷା ପାଇଁ ପୂର୍ଣ୍ଣ ପ୍ରସ୍ତୁତ।”
ମିଳିତ ଜାତିସଂଘରେ ଭେନେଜୁଏଲାର ରାଷ୍ଟ୍ରଦୂତ ସାମୁଏଲ୍ ମୋନକାଡା, ଆମେରିକାଙ୍କ ସାମରିକ ମୁତୟନକୁ ବିରୋଧ କରି ଜାତିସଂଘ ମହାସଚିବଙ୍କୁ ଅଭିଯୋଗ କରିଛନ୍ତି। ସେ କହିଛନ୍ତି, “ନିଶା କାରବାର ବିରୋଧରେ ଲଢ଼ିବା ନାମରେ ଆମେରିକା ପରମାଣୁ ବୁଡ଼ାଜାହାଜ ପଠାଇବା ହାସ୍ୟାସ୍ପଦ। ଏହା କେବଳ ଯୁଦ୍ଧ ପ୍ରସ୍ତୁତିକୁ ଯୁକ୍ତିସହିତ କରିବାର ଚେଷ୍ଟା।”
ଆମେରିକୀୟ ନୌସେନା ସୂଚନା ଅନୁଯାୟୀ, ଭେନେଜୁଏଲା ସମୀପରେ ସାତଟି ଯୁଦ୍ଧ ଜାହାଜ, ଗୋଟିଏ ପରମାଣୁଚାଳିତ ବୁଡ଼ାଜାହାଜ ଓ ୪,୫୦୦ରୁ ଅଧିକ ସୈନିକ ମୁତୟନ କରାଯାଇଛି। ଏହି କାର୍ଯ୍ୟଚାରୀତାକୁ ଡ୍ରଗ୍ କାର୍ଟେଲ୍ ବିରୋଧୀ ଅପରେସନ୍ ଭାବେ ଦାବି କରୁଥିବାବେଳେ, ଆନ୍ତର୍ଜାତୀୟ ବିଶ୍ଳେଷକମାନେ ଏହାକୁ ଭେନେଜୁଏଲା ଉପରେ ଆକ୍ରମଣର ପୂର୍ବଭୂମିକା ବୋଲି ଦେଖୁଛନ୍ତି।
ଏହାର ଜବାବରେ ଭେନେଜୁଏଲା ମଧ୍ୟ ନିଜ ସୀମାରେ ଯୁଦ୍ଧ ଜାହାଜ, ଡ୍ରୋନ୍ ଓ ୧୫,୦୦୦ରୁ ଅଧିକ ସେନା ମୁତୟନ କରିଛି। ଉଲ୍ଲେଖନୀୟ, ଭେନେଜୁଏଲାରେ ୩୦୦ ବିଲିୟନ୍ ବ୍ୟାରେଲରୁ ଅଧିକ ତୈଳ ଭଣ୍ଡାର ରହିଛି, ଯାହା ସାଉଦି ଆରବ, ରୁଷ୍ ଓ ଇରାନ୍ଠାରୁ ମଧ୍ୟ ଅଧିକ। କିନ୍ତୁ ଆମେରିକୀୟ ପ୍ରତିବନ୍ଧ ଓ ଅର୍ଥନୈତିକ ସଙ୍କଟରେ ପଛଲା କିଛି ବର୍ଷରେ ଏହାର ଉତ୍ପାଦନ ଭାରି ପ୍ରଭାବିତ ହୋଇଛି।