କଟକ: ଜାତୀୟ କ୍ରୀଡ଼ା ଦିବସ ଏବଂ ହକି ମହାନାୟକ ମେଜର ଧ୍ୟାନଚାନ୍ଦଙ୍କ ଜନ୍ମଦିନ ଅବସରରେ ଓଡ଼ିଶା ପୋଲିସର ୪୧ଜଣ ଶ୍ରେଷ୍ଠ କ୍ରୀଡ଼ାବିତଙ୍କୁ ଡିଜିପି ଯୋଗେଶ ବାହାଦୁର ଖୁରାନିଆ ସମ୍ବର୍ଦ୍ଧିତ କରିଛନ୍ତି। କଟକର ଆଇପିଏସ ମେସ ସ୍ଥିତ ଆର.କେ. ପାଢ଼ୀ ମେମୋରିଆଲ ହଲରେ ଆୟୋଜିତ ସମ୍ବର୍ଦ୍ଧନା ସମାରୋହରେ ଡିଜିପି ମୁଖ୍ୟ ଅତିଥି ଭାବେ ଯୋଗଦେଇ, ପୋଲିସ କ୍ରୀଡ଼ାବିତମାନଙ୍କ ପ୍ରତିଭା, ସାଧନା ଓ ସଫଳତାର ଉଚ୍ଚ ପ୍ରଶଂସା କରିଥିଲେ।
ସେ କହିଥିଲେ, ଓଡ଼ିଶା ପୋଲିସ କ୍ରୀଡ଼ାବିତମାନଙ୍କ ଦକ୍ଷତାରେ ଦେଶମାନ୍ୟ ସୁନାମ ପାଇଛି। ବିଶ୍ଵ ପୋଲିସ ଏବଂ ଅଗ୍ନିଶମ କ୍ରୀଡ଼ାରେ ଓଡ଼ିଶା ପୋଲିସର ୭ ଜଣ ଖେଳାଳି ୧୩ଟି ସ୍ଵର୍ଣ୍ଣ, ୩ଟି ରୌପ୍ୟ ଓ ୪ଟି କାଂସ୍ୟ ପଦକ ଜିତି ନୂଆ ଇତିହାସ ଗଢ଼ିଥିବାରୁ ସେମାନଙ୍କୁ ବିଶେଷ ଭାବରେ ସ୍ମରଣ କରାଗଲା।
ଡିଜିପି ୪୧ କ୍ରୀଡ଼ାବିତଙ୍କୁ ଉତ୍ତରୀୟ ଓ ନଗଦ ପୁରସ୍କାର ପ୍ରଦାନ କରି, ସେମାନଙ୍କ ଭବିଷ୍ୟତରେ ଜାତୀୟ ଓ ଅନ୍ତର୍ଜାତୀୟ ମାନଚିତ୍ରରେ ଅଧିକ ସଫଳତାର ଆଶୀର୍ବାଦ କଲେ।
ଏହି ଅବସରରେ ବହୁ ବରିଷ୍ଠ ପୋଲିସ ଅଧିକାରୀଙ୍କ ଉପସ୍ଥିତି ରହିଥିଲା। କାର୍ଯ୍ୟକ୍ରମର ଆୟୋଜନ ଓ ପରିଚାଳନା ରାଜ୍ୟ ପୋଲିସ ମୁଖ୍ୟାଳୟର କ୍ରୀଡ଼ା ଅଧିକାରୀ ନୀଳମାଧବ ସ୍ୱାଇଁ କରିଥିଲେ।