ମୁମ୍ବାଇ: ବମ୍ବେ ହାଇକୋର୍ଟ ଅକ୍ଷୟ କୁମାର ଓ ଅରଶଦ ୱାର୍ସି ଅଭିନୀତ ଜଲି ଏଲଏଲବି-୩ ଫିଲ୍ମ ଉପରେ ଥିବା ସ୍ଥଗିତାଦେଶ ଆବେଦନକୁ ଖାରଜ କରିଛନ୍ତି। ଆବେଦନରେ ଅଭିଯୋଗ କରାଯାଇଥିଲା ଯେ, ଫିଲ୍ମଟି ନ୍ୟାୟପାଳିକା ଓ ଆଇନଜୀବୀମାନଙ୍କୁ ଉପହାସ କରୁଛି।
ଆସୋସିଏସନ୍ ଫର ଏଡିଂ ଜଷ୍ଟିସ୍ ପକ୍ଷରୁ ଦାଏର ହୋଇଥିବା ଆବେଦନରେ ଫିଲ୍ମର ମୁକ୍ତିଲାଭ ରୋକିବା ସହିତ “ଭାଇ ୱକୀଲ ହୈ” ଗୀତକୁ ହଟାଇବା ଦାବି କରାଯାଇଥିଲା। ଆବେଦନକାରୀଙ୍କ ଆଇନଜୀବୀ ଦର୍ଶାଇଥିଲେ ଯେ, ଫିଲ୍ମରେ ବିଚାରପତିଙ୍କୁ “ମାମୁ” ବୋଲି କୁହାଯାଇଥିବା ଦୃଶ୍ୟ ନ୍ୟାୟପାଳିକା ପ୍ରତି ଅପମାନଜନକ।
ମୁଖ୍ୟ ବିଚାରପତି ଚନ୍ଦ୍ରଶେଖର ଏବଂ ବିଚାରପତି ଗୌତମ ଆଙ୍ଖରଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି—
“ଆମକୁ ଉପହାସ କରାଯାଉଛି, କିନ୍ତୁ ଏଥିରେ କୌଣସି ଫରକ ପଡ଼େ ନାହିଁ। ଲଗାତାର ଉପହାସ ହେଉଛି, ସେହିପାଇଁ ଆମ ବିଷୟରେ ଚିନ୍ତା କରନ୍ତୁ ନାହିଁ।”
ଫିଲ୍ମ ନିର୍ମାତାମାନେ କୋର୍ଟକୁ ଜଣାଇଥିଲେ ଯେ, ଆଲ୍ଲାହାବାଦ ହାଇକୋର୍ଟରେ ସମାନ ଆବେଦନ ପୂର୍ବରୁ ଖାରଜ ହୋଇଛି। ବମ୍ବେ ହାଇକୋର୍ଟର ଏହି ନିଷ୍ପତ୍ତି ପରେ ଜଲି ଏଲଏଲବି-୩ ମୁକ୍ତିଲାଭରେ କୌଣସି ପ୍ରତିବନ୍ଧକ ରହିଲା ନାହିଁ।
ଫିଲ୍ମଟି ସେପ୍ଟେମ୍ବର ୧୯ରେ ସିନେମା ହଲରେ ମୁକ୍ତିଲାଭ କରିବ। ସୁଭାଷ କପୁରଙ୍କ ନିର୍ଦ୍ଦେଶନାରେ ପୂର୍ବରୁ ଥିବା ଜଲି ଏଲଏଲବି ସିରିଜର ଦୁଇଟି ଫିଲ୍ମ ବିଶେଷ ସଫଳତା ପାଇଥିଲା। ଏହିଥରେ ମଧ୍ୟ ଦର୍ଶକମାନଙ୍କ ଆଶା ବହୁତ ଅଧିକ ରହିଛି।