ୱାସିଙ୍ଗଟନ: ଗାଜାରେ ଦୀର୍ଘକାଳୀନ ଦ୍ୱନ୍ଦ୍ୱ ପରେ ଶାନ୍ତି ଫେରିବାର ଆଶା ସୃଷ୍ଟି ହୋଇଛି। ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ସହ ବୈଠକ ସମୟରେ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, କତର ତାଙ୍କୁ ଆଶ୍ୱାସନା ଦେଇଛି ଯେ ସେମାନେ ହମାସକୁ ଅସ୍ତ୍ରତ୍ୟାଗ କରିବା ପାଇଁ ପ୍ରେରିତ କରିବେ।
କତର ସ୍ପଷ୍ଟ କରିଛି ଯେ ସେମାନଙ୍କର ମଧ୍ୟସ୍ଥତାରେ ହମାସକୁ ଏକ ଶାନ୍ତି ଚୁକ୍ତିରେ ରାଜି କରାଯିବ, ଯାହାରେ ସଶସ୍ତ୍ର କାର୍ଯ୍ୟକଳାପ ସମାପ୍ତ କରିବା ଓ ଅସ୍ତ୍ର ସମର୍ପଣ କରିବା ପାଇଁ ସର୍ତ୍ତାବଳୀ ଅନ୍ତର୍ଭୁକ୍ତ ହେବ। ଏହି ପଦକ୍ଷେପ ମଧ୍ୟପ୍ରାଚ୍ୟରେ ଉତ୍ତେଜନା କମେଇବା ସହିତ ପାଲେଷ୍ଟାଇନୀ ପକ୍ଷକୁ ଆଲୋଚନାରେ ଆଣିବାକୁ ସାହାଯ୍ୟ କରିବ ବୋଲି କୁହାଯାଇଛି।
ଦି ଜେରୁଜାଲେମ୍ ପୋଷ୍ଟ ରିପୋର୍ଟ ଅନୁଯାୟୀ, ୱାସିଙ୍ଗଟନରେ ଅନୁଷ୍ଠିତ ଏହି ବୈଠକରେ କତରର ବରିଷ୍ଠ ଅଧିକାରୀମାନେ ମଧ୍ୟ ଯୋଗ ଦେଇଥିଲେ। ବୈଠକ ପୂର୍ବରୁ ନେତାନ୍ୟାହୁ କତର ପ୍ରଧାନମନ୍ତ୍ରୀ ଶେଖ ମହମ୍ମଦ ବିନ୍ ଅବଦୁଲ୍ ରେହମାନ ଅଲ୍-ଥାନିଙ୍କୁ ଫୋନ କରି ଦୋହାରେ ହୋଇଥିବା ଇସ୍ରାଏଲୀ ଆକ୍ରମଣ ପାଇଁ ଦୁଃଖ ପ୍ରକାଶ କରିଥିଲେ।