ନୂଆଦିଲ୍ଲୀ, ୩୦।୯: ଏସିଆ କପ୍ ୨୦୨୫ ଫାଇନାଲ ପରେ ଟ୍ରଫି ହସ୍ତାନ୍ତରକୁ ନେଇ ସୃଷ୍ଟି ହୋଇଥିବା ବିବାଦ ମଙ୍ଗଳବାର ଏସିଆନ୍ କ୍ରିକେଟ୍ କାଉନସିଲ୍ (ଏସିସି) ବୈଠକରେ ପ୍ରମୁଖ ଅଜେଣ୍ଡା ହୋଇଥିଲା। ବୈଠକରେ ବିସିସିଆଇ ପକ୍ଷରୁ ପିସିବି ଓ ଏସିସି ଅଧ୍ୟକ୍ଷ ମୋହସିନ ନାକଭିଙ୍କୁ କଟୁ ପ୍ରଶ୍ନ କରାଯାଇଥିଲା।
ଫାଇନାଲ ପରେ ଭାରତୀୟ ଦଳ ନାକଭିଙ୍କ ହାତରୁ ଟ୍ରଫି ନେବାକୁ ଅସ୍ୱୀକାର କରିଥିଲା। ପରେ ନାକଭି ଟ୍ରଫିକୁ ନିଜ ହୋଟେଲ୍ କକ୍ଷକୁ ନେଇଥିବା ଖବର ଆସିଥିଲା।
ବୈଠକରେ ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଲା ସଂକେତ କରିଥିଲେ, ଟ୍ରଫି ଏସିସିର ସମ୍ପତ୍ତି, ବ୍ୟକ୍ତିଗତ ନୁହେଁ। ଏହାକୁ ବିଜେତା ଦଳକୁ ସମ୍ମାନର ସହ ହସ୍ତାନ୍ତର କରାଯିବା ଦରକାର।
ତୀବ୍ର ତର୍କ-ବିତର୍କ ପରେ ମଧ୍ୟ ନାକଭି ଟ୍ରଫି ହସ୍ତାନ୍ତର କରିବାରେ ପଛୁଆଇଥିଲେ। ସେଥିପାଇଁ ଭାରତୀୟ ଦଳକୁ ବିଜୟ ପାଇଁ ଅଭିନନ୍ଦନ ଜଣାଇବାକୁ ମଧ୍ୟ ପ୍ରଥମେ ଅସ୍ୱୀକାର କରିଥିଲେ। କିନ୍ତୁ, ବିସିସିଆଇ ପ୍ରତିନିଧି ଆଶିଷ ଶେଲାରଙ୍କ ଚାପରେ ଶେଷରେ ଅଭିନନ୍ଦନ ଦେବାକୁ ବାଧ୍ୟ ହୋଇଥିଲେ।
ବିସିସିଆଇ ଏହି ଘଟଣାକୁ ନେଇ ଆଇସିସିଙ୍କୁ ଔପଚାରିକ ଅଭିଯୋଗ ଦାୟର କରିବାକୁ ସୂଚନା ଦେଇଛି। ଅନ୍ୟପଟେ, ଭାରତୀୟ ଖେଳାଳିମାନେ ଏହି ବିବାଦକୁ ଉପେକ୍ଷା କରି ବିଜୟ ଉତ୍ସବ ପାଳନ କରିଥିଲେ।