ଭୁବନେଶ୍ୱର: ସାତ ବର୍ଷ ପୂର୍ବର ବାତ୍ୟା ତିତଲି ଯେଉଁ ଦୁଃଖ ଓ ଭୟ ଛାଡ଼ି ଯାଇଥିଲା, ସେହି ଆଘାତ ଆଜିବି ଗଜପତି ଜିଲ୍ଲାର ମନରୁ ମିଛିନାହିଁ। ୨୦୧୮ରେ ଘଟିଥିବା ସେହି ଭୟାବହ ଭୂସ୍ଖଳନ ଓ ବନ୍ୟାର ସ୍ମୃତି ଏବେ ପୁଣି ତାଜା ହୋଇଯାଇଛି। ଏହି ଅକ୍ଟୋବରରେ ଅବିରତ ବର୍ଷାରେ ଗଜପତି ପୁଣି ଭୂସ୍ଖଳନ ଓ ଜଳବିପର୍ଯ୍ୟୟର ସମ୍ମୁଖୀନ ହୋଇଛି।
ଲଘୁଚାପ ପ୍ରଭାବରେ ହୋଇଥିବା ଏହି ବାଦଲଫଟା ବର୍ଷା ଯୋଗୁଁ ଗଜପତି ଜିଲ୍ଲାର ଚାରିଟି ବ୍ଲକରେ ପାହାଡ଼ ଧସି ପଡ଼ିଛି, ମାଟି ଧସି ଆସିଛି ଏବଂ ପ୍ରବଳ ପାଣିରେ ଚାଷଭୂମି, ଘର, ଏବଂ ଗୃହପାଳିତ ପଶୁ ନଷ୍ଟ ହୋଇଯାଇଛି। ଅନେକ ସ୍ଥାନରେ ବନ୍ଧ ଭାଙ୍ଗିଯାଇଛି, ରାସ୍ତା ବୁଡ଼ିଛି, ନଦୀ ଫୁଲି ଜନବସତି ମୁହାଁ ହୋଇଛି। ପାହାଡ଼ ଧସି ପଡ଼ିବା ଫଳରେ କେତେକ ଅଞ୍ଚଳ ଧୁଆଁମୟ ହୋଇଗଲା, ନଦୀର ଗତିପଥ ବଦଳି ସବୁ ଧୋଇ ନେଲା।
୨୦୧୮ ର ‘ତିତଲି’ ବାତ୍ୟା ସମୟରେ ଗଜପତିରେ ଘଟିଥିବା ସେହି ଦୁଃସ୍ମୃତି ଏବେ ପୁଣି ମନେ ପଡ଼ିଛି। ସେତେବେଳେ ପାହାଡ଼ରୁ ମାଟି ଏବଂ ପାଣି ମିଶି ଗୁମ୍ଫା ଭିତରେ ଆଶ୍ରୟ ନେଇଥିବା ଲୋକମାନଙ୍କୁ ଆବରଣ କରିଦେଇଥିଲା, ଯେଉଁ ଦୁର୍ଘଟନାରେ ପ୍ରାୟ ୧୨ ଜଣ ମଣିଷ ଜୀବନ ହାରାଇଥିଲେ। ସେ କାଳରାତି ଆଜିବି ଗଜପତିବାସୀଙ୍କ ମନରେ ଗଭୀର ଆଘାତ ରଖିଛି।
ତଥ୍ୟ ଅନୁସାରେ, ଗଜପତିରେ ୧୨୯ଟି ଭୂସ୍ଖଳନ ପ୍ରବଣ ସ୍ଥାନ ରହିଛି ଏବଂ ୨୦୧୮ ରୁ ୨୦୨୨ ମଧ୍ୟରେ ଏହି ଅଞ୍ଚଳଗୁଡ଼ିକରେ ହୋଇଥିବା ଭୂସ୍ଖଳନରେ ୪୮ ଜଣ ମୃତ୍ୟୁ ହୋଇଛି। ସେହି ସମୟରେ ୭୧,୮୩୪ରୁ ଅଧିକ ଘର କ୍ଷତିଗ୍ରସ୍ତ ହୋଇଥିଲା ଓ ୧୦୩୦ ଗୃହପାଳିତ ପଶୁ ଜୀବନ ହାରାଇଥିଲେ।
ସରକାର ପୂର୍ବରୁ ଏହି ସମ୍ବେଦନଶୀଳ ସ୍ଥାନଗୁଡ଼ିକରୁ ଲୋକମାନଙ୍କୁ ସମତଳ ଅଞ୍ଚଳକୁ ସ୍ଥାନାନ୍ତର କରିବା ପ୍ରଚେଷ୍ଟା କରିଥିଲେ। କିନ୍ତୁ ବର୍ତ୍ତମାନ ସେହି ପଦକ୍ଷେପ ଅନୁତ୍ସାହିତ ହୋଇଥିବାରୁ ଗଜପତିବାସୀ ପୁଣି ଭୟରେ ଅଛନ୍ତି, କାରଣ ଲଘୁଚାପ ଏବଂ ବର୍ଷା ଏବେବି ଜାରି ରହିଛି।