ଗୋଟିଏ ସପ୍ତାହରେ ଶେଷ ହେବା ଉଚିତ ଯୁଦ୍ଧ କାହିଁକି ଚାରି ବର୍ଷ ଧରି ଚାଲୁଛି: ପୁଟିନଙ୍କୁ ଟ୍ରମ୍ପଙ୍କ ପ୍ରଶ୍ନ

ୱାଶିଂଟନ, ୮/୧୦: ଯୁକ୍ରେନରେ ଚାଲିଥିବା ଯୁଦ୍ଧକୁ ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ତୀବ୍ର ସମାଲୋଚନା କରିଛନ୍ତି। ସେ କହିଛନ୍ତି, “ଗୋଟିଏ ସପ୍ତାହ ମଧ୍ୟରେ ଶେଷ ହେବାକୁ ଥିବା ଏହି ଯୁଦ୍ଧ ଚାରି ବର୍ଷ ଧରି କାହିଁକି ଚାଲୁଛି, ମୁଁ ବୁଝିପାରୁନି।” ହ୍ୱାଇଟ୍ ହାଉସରେ ଆର୍ଜେଣ୍ଟିନା ରାଷ୍ଟ୍ରପତି ଜାଭିୟର ମେଲିଙ୍କ ସହ ଦ୍ୱିପାକ୍ଷିକ ଭେଟି ସମୟରେ ଟ୍ରମ୍ପ୍ ଏହି ମନ୍ତବ୍ୟ କରିଥିଲେ।

ଆମେରିକା ସରକାର ଆର୍ଜେଣ୍ଟିନା ପାଇଁ ୨୦ ବିଲିୟନ ଡଲାରର ଆର୍ଥିକ ପ୍ୟାକେଜ ଘୋଷଣା କରିବା ପରେ ଏହି ବୈଠକ ଅନୁଷ୍ଠିତ ହୋଇଥିଲା। ଟ୍ରମ୍ପଙ୍କ ଏହି ବିବୃତି ଯୁକ୍ରେନୀୟ ରାଷ୍ଟ୍ରପତି ଜେଲେନ୍ସକିଙ୍କ ସହ ତାଙ୍କ ଆସନ୍ତା ସାକ୍ଷାତ ପୂର୍ବରୁ ଆସିଛି, ଯେଉଁଠାରେ ଯୁକ୍ରେନ ପାଇଁ ଆମେରିକାର ସମର୍ଥନ ଉପରେ ଚର୍ଚ୍ଚା ହେବା ଆଶା ରହିଛି।

ରିପୋର୍ଟ ଅନୁଯାୟୀ, ଟ୍ରମ୍ପ୍ ଆଗାମୀ ଅକ୍ଟୋବର ୧୩ ରେ ଯୁକ୍ରେନକୁ ଟୋମାହକ୍ ଦୂରଗାମୀ କ୍ରୁଜ୍ କ୍ଷେପଣାସ୍ତ୍ର ଯୋଗାଣ ବିଷୟରେ ଚୂଡ଼ାନ୍ତ ନିଷ୍ପତ୍ତି ନେବେ। ସେ କହିଛନ୍ତି, “ମୋତେ ଏହା ନେଇ ରୁଷିଆ ସହିତ କଥା ହେବାକୁ ପଡ଼ିପାରେ।” ଯଦି ଯୁକ୍ରେନ ସମସ୍ୟାର ସମାଧାନ ନ ହୁଏ, ସେ କିଭକୁ ଟୋମାହକ୍ ଯୋଗାଣ କରିବେ ବୋଲି ଟ୍ରମ୍ପ୍ ଚେତାବନୀ ଦେଇଛନ୍ତି।

ନାଟୋ ସହଯୋଗୀ ଇଷ୍ଟୋନିଆ ମନ୍ତ୍ରୀ ମାର୍ଗସ୍ ସାଖନା ମତେ, ଟୋମାହକ୍ ଯୋଗାଣ ରୁଷିଆକୁ ପଛକୁ ଫେରିବାକୁ ବାଧ୍ୟ କରିପାରେ ଏବଂ ମସ୍କୋକୁ ଏକ ଦୃଢ଼ ବାର୍ତ୍ତା ପଠାଇପାରେ।

ସେଣ୍ଟର ଫର୍ ଷ୍ଟ୍ରାଟେଜିକ୍ ଆଣ୍ଡ୍ ଇଣ୍ଟରନ୍ୟାସନାଲ ଷ୍ଟଡିଜ୍‌ (ସିଏସଆଇଏସ) ରିପୋର୍ଟ ଅନୁଯାୟୀ, ଯୁକ୍ରେନ ରୁଷିଆ ସହିତ ଯୁଦ୍ଧ ପାଇଁ ଦୂରଗାମୀ କ୍ଷେପଣାସ୍ତ୍ର ଖୋଜୁଛି। ଜେଲେନ୍ସକି କହିଛନ୍ତି, ଟ୍ରମ୍ପ୍ ସହ ତାଙ୍କ ଆଲୋଚନାରେ ୟୁକ୍ରେନର ପ୍ରତିରକ୍ଷା, ବାୟୁ ପ୍ରତିରକ୍ଷା ଓ ସ୍ଥିରତା ବିଷୟରେ ଚର୍ଚ୍ଚା ହୋଇଛି।

ସେ ଆଶା ବ୍ୟକ୍ତ କରିଛନ୍ତି ଯେ, ଇସ୍ରାଏଲ–ହମାସ୍ ଯୁଦ୍ଧବିରତି ସୁନିଶ୍ଚିତ କରିବାରେ ଟ୍ରମ୍ପଙ୍କ ସଫଳତା ଯୁକ୍ରେନ–ରୁଷିଆ ଯୁଦ୍ଧ ସମାଧାନରେ ଏକ ଉଦାହରଣ ହୋଇପାରିବ।

ଅନ୍ୟପଟେ, ପୁଟିନ ଭାଲଦାଇ ଡିସକସନ କ୍ଲବରେ କହିଥିଲେ ଯେ, ଟୋମାହକ୍ କ୍ଷେପଣାସ୍ତ୍ର ବ୍ୟବହାର ପାଇଁ ଆମେରିକୀୟ ସାମରିକ ଅଧିକାରୀଙ୍କ ଉପସ୍ଥିତି ଆବଶ୍ୟକ। ସେ ସଚେତନ କରିଥିଲେ ଯେ, ଯଦି ଆମେରିକା ଯୁକ୍ରେନକୁ ଏହି କ୍ଷେପଣାସ୍ତ୍ର ଯୋଗାଣ କରେ, ତେବେ ରୁଷ–ଆମେରିକା ସମ୍ପର୍କ ଅଧିକ ତିକ୍ତ ହେବ।