ନୂଆଦିଲ୍ଲୀ: ଗତ କିଛି ଦିନ ହେବ ସୁନା ମୂଲ୍ୟ ନିରନ୍ତର ହ୍ରାସ ପାଇଚାଲିଛି। ବିଶ୍ୱ ବୁଲିଅନ୍ ବଜାରରେ ଚାପ ଦେଖାଯାଇଥିବାରୁ ଭାରତୀୟ ବଜାରରେ ମଧ୍ୟ ସୁନା ଦର ତଳକୁ ଗଡ଼ିଛି। ୧୮ ଅକ୍ଟୋବର ଧନତେରସରୁ ୩୦ ଅକ୍ଟୋବର ପର୍ଯ୍ୟନ୍ତ ସୁନା ଦର ପ୍ରାୟ ₹10,370 ପର୍ଯ୍ୟନ୍ତ ହ୍ରାସ ପାଇଛି। ବିଶେଷଜ୍ଞମାନଙ୍କ ଅନୁମାନ ଅନୁଯାୟୀ, ଆସନ୍ତା ସପ୍ତାହଗୁଡ଼ିକରେ ଏହି ହ୍ରାସ ଆଉ ୫ ରୁ ୧୦% ପର୍ଯ୍ୟନ୍ତ ହୋଇପାରେ।
ଧନତେରସରେ ସୁନା ଦର:
୧୮ ଅକ୍ଟୋବରରେ ୨୪ କ୍ୟାରେଟ୍ ସୁନାର ମୂଲ୍ୟ ୧୦ ଗ୍ରାମ ପିଛା ₹1,32,780 ଥିଲା। ୨୨ କ୍ୟାରେଟ୍ ସୁନା ₹1,21,710 ଓ ୧୮ କ୍ୟାରେଟ୍ ସୁନା ₹99,590 ରେ ଉପଲବ୍ଧ ଥିଲା। କିନ୍ତୁ ୩୦ ଅକ୍ଟୋବରରେ ୨୪ କ୍ୟାରେଟ୍ ସୁନା ଦର ଗଡ଼ି ₹1,22,410, ୨୨ କ୍ୟାରେଟ୍ ₹1,12,210 ଏବଂ ୧୮ କ୍ୟାରେଟ୍ ₹91,810 ହୋଇଯାଇଛି।
ସୁନା ମୂଲ୍ୟ ହ୍ରାସର ପ୍ରମୁଖ କାରଣଗୁଡ଼ିକ:
- ଆମେରିକା-ଚୀନ୍ ବାଣିଜ୍ୟ ଚୁକ୍ତିର ସମ୍ଭାବନା: ଟ୍ରମ୍ପ ଓ ସି ଜିନପିଙ୍ଗଙ୍କ ବେଠକ ପରେ ଦୁଇ ଦେଶ ମଧ୍ୟରେ ବାଣିଜ୍ୟ ସମ୍ପର୍କ ସୁଧାର ହେବାର ଆଶା ବଢ଼ିଛି।
- ଆନ୍ତର୍ଜାତୀୟ ବ୍ୟାପାରରେ ସକାରାତ୍ମକ ପରିବେଶ: ଆମେରିକା ଭାରତ, କୋରିଆ ଓ ଅନ୍ୟ ଦେଶ ସହ ନୂତନ ବାଣିଜ୍ୟ ଚୁକ୍ତି ପ୍ରତି ସକାରାତ୍ମକ ଭାବ ନେଇଛି।
- ନିବେଶକମାନଙ୍କ ‘ପ୍ରୋଫିଟ୍ ବୁକିଂ’: ଚଳିତ ବର୍ଷ ସୁନା ଦର ୫୦% ବଢ଼ିଥିବାରୁ ଅନେକ ନିବେଶକ ଲାଭ ଗ୍ରହଣ କରି ବିକ୍ରୟ କରୁଛନ୍ତି।
- ସୁଧ ହାର ହ୍ରାସର ଆଶା: ଆମେରିକା ଫେଡେରାଲ ରିଜର୍ଭ ପରେ ଜାପାନ ଓ ୟୁରୋପିୟ ବ୍ୟାଙ୍କମାନେ ମଧ୍ୟ ସୁଧ ହାର କମାଇପାରନ୍ତି।
- ପାର୍ବଣ ଶେଷ ପରେ ଚାହିଦା ହ୍ରାସ: ଧନତେରସ ଓ ଦୀପାବଳି ପରେ ଗହଣା ଚାହିଦା ହ୍ରାସ ପାଇଛି, ଯାହା ଯୋଗାଣ ଉପରେ ଚାପ ସୃଷ୍ଟି କରିଛି।
- କେନ୍ଦ୍ରୀୟ ବ୍ୟାଙ୍କ ତରଫରୁ ସୁନା କ୍ରୟ ସ୍ଥିରତା: ପୂର୍ବବତୀ ମାସମାନଙ୍କ ତୁଳନାରେ ବିଶ୍ୱର କେନ୍ଦ୍ରୀୟ ବ୍ୟାଙ୍କମାନେ ବର୍ତ୍ତମାନ ସୁନା କିଣିବା ଗତିକୁ କମାଇଛନ୍ତି।