ଭୁବନେଶ୍ୱର: ନିର୍ବାଚନ ଆଚରଣ ବିଧି ଉଲଂଘନ ମାମଲାରେ ନିର୍ବାଚନ କମିଶନ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛି। ସୂଚନା ଓ ଲୋକସମ୍ପର୍କ ବିଭାଗର ଲୋକସମ୍ପର୍କ ଅଧିକାରୀ ତନୁଜା ମହାନ୍ତିଙ୍କୁ ନିର୍ବାଚନ କମିଶନ ନିଲମ୍ବିତ କରିଛି। ନିର୍ବାଚନ ପୂର୍ବ ଦିନଗୁଡ଼ିକରେ ଏହି ନିଷ୍ପତ୍ତିକୁ ଏକ କଡ଼ା ସନ୍ଦେଶ ବୋଲି ଦେଖାଯାଉଛି।
ସୂଚନା ଅନୁଯାୟୀ, ନିର୍ବାଚନ କମିଶନଙ୍କ ନିର୍ଦ୍ଦେଶରେ ସୂଚନା ଓ ଲୋକସମ୍ପର୍କ ବିଭାଗ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ନିଲମ୍ବନ ଅବଧି ମଧ୍ୟରେ ତନୁଜା ମହାନ୍ତି ଭୁବନେଶ୍ୱର ମୁଖ୍ୟାଳୟରେ ରହିବେ ଓ ପ୍ରତିଦିନ ବିଭାଗୀୟ ନିର୍ଦ୍ଦେଶକଙ୍କ ସମ୍ମୁଖରେ ରିପୋର୍ଟ କରିବେ। ବିନା ଅନୁମତି ସେ ମୁଖ୍ୟାଳୟ ଛାଡିବାକୁ ପାରିବେ ନାହିଁ ବୋଲି ନିର୍ଦ୍ଦେଶ ମିଳିଛି।
ଏହି ପଦକ୍ଷେପ ନୂଆପଡା ବିଧାନସଭା ଉପ-ନିର୍ବାଚନକୁ ଆଗ ରଖି ଗ୍ରହଣ କରାଯାଇଛି, ଯାହା ନଭେମ୍ବର ୧୧ରେ ହେବାକୁ ଯାଉଛି। ଏହି ସମୟରେ ରାଜ୍ୟର ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡାଙ୍କ ବିରୋଧରେ ଆଦର୍ଶ ଆଚରଣ ସଂହିତା ଉଲଂଘନ ଓ ସରକାରୀ ମିଡିଆ ଉପଯୋଗ ନେଇ କଂଗ୍ରେସ ପକ୍ଷରୁ ଅଭିଯୋଗ ହୋଇଥିଲା।
ଅଭିଯୋଗ ଅନୁସାରେ, ଉପମୁଖ୍ୟମନ୍ତ୍ରୀଙ୍କ ରାଜନୈତିକ ପ୍ରଚାର ସମ୍ବନ୍ଧୀୟ ସାମଗ୍ରୀ ସରକାରୀ “ମିଡିଆ ସେଲ୍” ହ୍ୱାଟସଆପ୍ ଗ୍ରୁପ୍ରେ ତନୁଜା ମହାନ୍ତି ଦ୍ୱାରା ପ୍ରଚାର କରାଯାଉଥିଲା ବୋଲି ଅଭିଯୋଗ ଥିଲା। ତଦନ୍ତ ପରେ ତାଙ୍କ ବିରୋଧରେ ନିଲମ୍ବନ ଆଦେଶ ଜାରି ହୋଇଛି।