ନଭି ମୁମ୍ବାଇ: ମହିଳା ଦିନିକିଆ ବିଶ୍ୱକପ 2025 (ICC Women’s World Cup 2025)ର ଫାଇନାଲରେ ଭାରତ ଦକ୍ଷିଣ ଆଫ୍ରିକାକୁ ୫୨ ରନରେ ପରାସ୍ତ କରି ଇତିହାସ ଗଢ଼ିଛି। ଡା. ଡି.ଯୋ. ପାଟିଲ ଷ୍ଟାଡିୟମରେ ରବିବାର ଖେଳାଯାଇଥିବା ଏହି ମ୍ୟାଚରେ ଭାରତ ନିଜର ସ୍ଥିର ପ୍ରଦର୍ଶନ ଦ୍ୱାରା ପ୍ରଥମେ ବ୍ୟାଟିଂ କରି ୨୯୮ ରନ କରିଥିଲା ଏବଂ ଦକ୍ଷିଣ ଆଫ୍ରିକାକୁ ୨୪୬ ରନରେ ଅଲଆଉଟ କରିଥିଲା।
ଦିପ୍ତି ଶର୍ମାଙ୍କ ଦାଦାଗିରି – ୫ଟି ୱିକେଟ୍ ସହିତ ଚାମ୍ପିୟନସିପ୍ ସୁନିଶ୍ଚିତ
ଦିପ୍ତି ଶର୍ମା ଏହି ମ୍ୟାଚରେ ଅସାଧାରଣ ବୋଲିଂ ପ୍ରଦର୍ଶନ କରି ୫ଟି ୱିକେଟ୍ ନେଇଥିଲେ, ଯାହା ଭାରତର ବିଜୟରେ ନିର୍ଣ୍ଣାୟକ ଭୂମିକା ନେଇଥିଲା। ଦକ୍ଷିଣ ଆଫ୍ରିକା ପକ୍ଷରୁ ଲୌରା ଓଲଭାର୍ଟ ୧୦୧ ରନ କରିଥିଲେ, କିନ୍ତୁ ଅନ୍ୟ ବ୍ୟାଟରମାନେ ସେତେ ସହଯୋଗ କରିପାରିନଥିଲେ। ଆନରି ଡର୍କସେନ ୩୫ ରନ କରିଥିଲେ।
ଭାରତୀୟ ଇନିଂସ – ଓପନିଂରେ ଶେଫାଳି ଓ ସ୍ମୃତିଙ୍କ ଭଲ ଭିତି
ଭାରତୀୟ ଓପନର ସ୍ମୃତି ମାନ୍ଧାନା ଓ ଶେଫାଳି ବର୍ମା ପ୍ରଥମ ୱିକେଟରେ ୧୦୪ ରନ ଯୋଗ କରି ଦଳକୁ ଭଲ ଆରମ୍ଭ ଦେଇଥିଲେ। ସ୍ମୃତି ୪୫ ରନ କରିଥିବାବେଳେ ଶେଫାଳି ୮୭ ରନର ଅତ୍ୟନ୍ତ ମୁଲ୍ୟବାନ ଇନିଂସ ଖେଳିଥିଲେ। ଜେମିମା ରୋଡ୍ରିଗୁଜ ୨୪ ରନ କରିଥିଲେ।
ମଧ୍ୟକ୍ରମରେ ଦିପ୍ତି ଶର୍ମାଙ୍କ ୫୮ ରନର ପାଳି
ମଧ୍ୟକ୍ରମରେ ଦିପ୍ତି ଶର୍ମା ୫୮ ରନ କରି ଦଳକୁ ସ୍ଥିରତା ଦେଇଥିଲେ। ଅଧିନାୟିକା ହରମନପ୍ରିତ କୌର ୨୦ ରନ ଓ ରିଚା ଘୋଷ ୩୪ ରନ ଯୋଗଦାନ କରିଥିଲେ। ଭାରତ ୫୦ ଓଭରରେ ୭ ୱିକେଟ୍ ହରାଇ ୨୯୮ ରନ କରିଥିଲା।
ଦକ୍ଷିଣ ଆଫ୍ରିକା ବୋଲରମାନଙ୍କ ପ୍ରଦର୍ଶନ
ଆୟୋବୋଙ୍ଗା ଖାକା ୩ଟି ୱିକେଟ୍ ନେଇଥିଲେ, ଯେଉଁଠାରେ ନନ୍କୁଲୁଲେକୋ ମ୍ଲାବା, ନାଡାଇନ ଡିକ୍ଲର୍କ ଓ ଛ୍ଲୋଏ ଟ୍ରାୟନ ପ୍ରତ୍ୟେକ ଗୋଟିଏ ୱିକେଟ୍ ହାସଲ କରିଥିଲେ।
ଏହି ବିଜୟ ସହିତ ଭାରତୀୟ ମହିଳା ଦଳ ପ୍ରଥମ ଥର ପାଇଁ ବିଶ୍ୱ ଚାମ୍ପିୟନ ହୋଇ ଦେଶବାସୀଙ୍କୁ ଗର୍ବିତ କରିଛି।