ନୂଆଦିଲ୍ଲୀ: H-1B ଭିସା ନୀତି ଉପରେ ଚାଲିଥିବା ତିବ୍ର ବିତର୍କ ମଧ୍ୟରେ, ଟେସଲା ସିଇଓ ଏଲନ୍ ମସ୍କ୍ ଭାରତୀୟ ପ୍ରତିଭାଙ୍କ ଭୂମିକାକୁ ଉଚ୍ଚ ସ୍ତୁତି କରିଛନ୍ତି। ଏକ ପଡକାଷ୍ଟ ସାକ୍ଷାତ୍କାରରେ ସେ କହିଛନ୍ତି ଯେ ଭାରତୀୟମାନେ ଆମେରିକାର ପ୍ରଯୁକ୍ତି ଉନ୍ନତି, ନବସୃଜନ ଏବଂ ବିଶ୍ୱ ସ୍ତରୀୟ କର୍ପୋରେଟ୍ ନେତୃତ୍ୱରେ ବିଶେଷ ଅବଦାନ ରଖିଛନ୍ତି।
ମସ୍କ୍ କହିଥିଲେ, “ଆମେରିକା ଦୀର୍ଘ ସମୟ ଧରି ବିଶ୍ୱର ସଠିକ୍ ପ୍ରତିଭାକୁ ଆକର୍ଷିତ କରିଆସିଛି। ଭାରତୀୟ ପ୍ରତିଭା ଦ୍ୱାରା ଆମେରିକା ବିପୁଳ ଭାବରେ ଲାଭବାନ ହୋଇଛି।” ସେ ଯୋଗ କରିଥିଲେ ଯେ ଅନେକ ବିଶ୍ୱସ୍ତରୀୟ କମ୍ପାନୀରେ ଭାରତୀୟ ବଂଶୋଦ୍ଭବ ସିଇଓ ଉପସ୍ଥିତି ଏହାର ସ୍ପଷ୍ଟ ପ୍ରମାଣ।
H-1B ଭିସା ଏବଂ ଟ୍ରମ୍ପ ପ୍ରଶାସନର ଆଭିମୁଖ୍ୟ
H-1B ଭିସା ନୀତି ସନ୍ଦର୍ଭରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ କଠୋର ଅବସ୍ଥାନ ନେଇ ଆମେରିକାରେ ଚର୍ଚ୍ଚା ଚାଲିଛି। ଗତ ୨୫ ନଭେମ୍ବରେ ହ୍ୱାଇଟ୍ ହାଉସ୍ ଟ୍ରମ୍ପଙ୍କ ମତକୁ ସମର୍ଥନ କରି କୁହିଥିଲା ଯେ ସେମାନଙ୍କ ନୀତି ସନ୍ତୁଳିତ ଏବଂ ଚାକିରି ସୁଯୋଗରେ ଆମେରିକୀୟମାନଙ୍କୁ ପ୍ରାଥମିକତା ଦେବାକୁ କେନ୍ଦ୍ରିତ।
ହ୍ୱାଇଟ୍ ହାଉସ୍ ପ୍ରେସ୍ ସଚିବ କାରୋଲିନ୍ ଲେଭିଟ୍ କହିଥିଲେ ଯେ ଟ୍ରମ୍ପଙ୍କ ଯୋଜନା ଅନୁସାରେ ଆରମ୍ଭିକ ଅବଧି ପାଇଁ ବିଦେଶୀ କର୍ମଚାରୀମାନଙ୍କୁ ଅନୁମତି ମିଳିପାରେ, କିନ୍ତୁ ପରେ ସେହି ଉଦ୍ୟୋଗଗୁଡ଼ିକରେ କେବଳ ଆମେରିକୀୟମାନେ ଚାକିରି କରିବେ।