ଭୁବନେଶ୍ୱର: ଓଡ଼ିଶା କଂଗ୍ରେସରେ ପୁଣି ଥରେ ନେତୃତ୍ୱ ସଂକଟ ପରିଲକ୍ଷିତ ହେଉଛି। ପିସିସି ସଭାପତି ଭକ୍ତ ଚରଣ ଦାସଙ୍କ ନେତୃତ୍ୱକୁ ପ୍ରତ୍ୟକ୍ଷ ଚ୍ୟାଲେଞ୍ଜ କରିଛନ୍ତି ବରିଷ୍ଠ କଂଗ୍ରେସ ନେତା ମହମ୍ମଦ ମୋକିମ୍। ସେ ଅଭିଯୋଗ କରିଛନ୍ତି ଯେ, ଭକ୍ତ ଦାସ ଦଳର ସ୍ୱାର୍ଥ ନୁହେଁ, ବରଂ ଶାସକ ଦଳକୁ ସୁହାଇବାଭଳି କାର୍ଯ୍ୟ କରିଛନ୍ତି।
ମୋକିମ୍ ସୋନିଆ ଗାନ୍ଧୀଙ୍କୁ ପ୍ରତ୍ୟକ୍ଷ ଚିଠି ଲେଖି ଯୋଗାଯୋଗ କରିଥିବା ସହ, ଭକ୍ତ ଦାସଙ୍କ ପରିଚାଳନାଗତ ତୃଟିରେ ନୂଆପଡ଼ାରେ କଂଗ୍ରେସ ହାରିଥିବା ଅଭିଯୋଗ ଉଠାଇଛନ୍ତି। ସେ ଭକ୍ତ ଦାସକୁ “ଓଡ଼ିଶା କଂଗ୍ରେସର ନେତୃତ୍ୱ ପାଇଁ ଅନଫିଟ୍” ବୋଲି ବର୍ଣ୍ଣନା କରି ଶୀଘ୍ର ସଂଗଠନୀୟ ପରିବର୍ତ୍ତନ ଦାବି କରିଛନ୍ତି।
ମୋକିମ୍ଙ୍କ ଚିଠିରେ କଣ ରହିଛି?
ଚିଠିରେ ସେ ଦଳର ନବୀକରଣ ଆବଶ୍ୟକତା ଉଲ୍ଲେଖ କରି, ଓଡ଼ିଶାରେ କଂଗ୍ରେସର ପୁନରୁଦ୍ଧାର ପାଇଁ ଭଲ ନେତୃତ୍ୱ ଦରକାର ବୋଲି କହିଛନ୍ତି। ସେ ନିଜର ଓ ପରିବାରର ଦୀର୍ଘ କଂଗ୍ରେସ ଯାତ୍ରାର ଉଦାହରଣ ଦେଇ, ଦଳ ପ୍ରତି ନିଜର ଅଙ୍ଗୀକାରକୁ ସ୍ପଷ୍ଟ କରିଛନ୍ତି।
ତାଙ୍କ କଥାରେ—
- ତାଙ୍କ ପୂର୍ବଜମାନେ ସ୍ୱାଧୀନତା ସଂଗ୍ରାମୀ ଥିଲେ,
- ତାଙ୍କ ବଡ଼ଭାଇ କଂଗ୍ରେସ ପାଇଁ ଜୀବନ ଦେଇଥିଲେ,
- ସେ ନିଜେ ଜିଲ୍ଲା ସଭାପତି, ପିସିସି କୋଷାଧ୍ୟକ୍ଷ ଓ ବାରବାଟୀ–କଟକର ବିଧାୟକ ଭାବେ ଦଳ ପାଇଁ ନିଷ୍ଠାର ସହ କାମ କରିଛନ୍ତି।
ମୋକିମ୍ କହିଛନ୍ତି ଯେ, ୩୫ ବର୍ଷ ପରେ ୨୦୧୯ ମସିହାରେ ବାରବାଟୀ–କଟକ ଆସନ ପୁଣି କଂଗ୍ରେସ ନିକଟକୁ ଫେରିଥିଲା। ୨୦୨୪ରେ ତାଙ୍କ ଝିଅ ସୋଫିଆ ଫିର୍ଦ୍ଦୋସଙ୍କ ବିଜୟକୁ ସେ କଂଗ୍ରେସ ପ୍ରତି ଲୋକଙ୍କ ଅପରିମିତ ବିଶ୍ୱାସର ପ୍ରମାଣ ବୋଲି କହିଛନ୍ତି।
ଓଡ଼ିଶା କଂଗ୍ରେସର ଏହି ନବୀନତମ ବିବାଦ ପୁଣି ଥରେ ଦଳର ଅଭ୍ୟନ୍ତରୀଣ ଦ୍ୱନ୍ଦ୍ଵକୁ ସମ୍ମୁଖସ୍ଥ କରିଦେଇଛି।