ଭୁବନେଶ୍ୱର, ୧୪/୧୨:
ଓଡ଼ିଶାର ବିଧାୟକମାନଙ୍କ ଦରମା ବୃଦ୍ଧି ଏବେ ସାଧାରଣ ଆଲୋଚନାର ମୁଖ୍ୟ ବିଷୟ ହୋଇଉଠିଛି। ଗରିବ ରାଜ୍ୟ ଭାବେ ପରିଚିତ ଓଡ଼ିଶାରେ ବିଧାୟକଙ୍କ ମାସିକ ଦରମା ଓ ଭତ୍ତା ମିଶି ₹୩,୪୫,୦୦୦ କୁ ପହଞ୍ଚିବା ପରେ ଲୋକମାନଙ୍କ ମଧ୍ୟରେ ଭାରି ଅସନ୍ତୋଷ ଦେଖାଦେଇଛି। ଚାଖଟି ଠାରୁ ଆରମ୍ଭ କରି ସୋସିଆଲ ମିଡିଆ ପର୍ଯ୍ୟନ୍ତ—ସବୁଠି ଏହି ନିଷ୍ପତ୍ତିକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ ପାଉଛି।
ବିଧାନସଭାରେ ଦରମା ବୃଦ୍ଧି ସମ୍ପର୍କିତ ବିଲ୍ ପାରିତ ହେବା ସମୟରେ କମ୍ୟୁନିଷ୍ଟ ପାର୍ଟିର ଏକମାତ୍ର ବିଧାୟକ ଲକ୍ଷ୍ମଣ ମୁଣ୍ଡା ଏହାକୁ ବିରୋଧ କରିଥିଲେ। ବର୍ତ୍ତମାନ ଦରମା ବୃଦ୍ଧିକୁ ନେଇ ସରକାରୀ ଓ ବିରୋଧୀ ଦଳର ବିଧାୟକମାନଙ୍କ ମଧ୍ୟରେ ମତଭେଦ ସ୍ପଷ୍ଟ ହୋଇଯାଇଛି। କେହି ଦରମା ନ ନେବାକୁ କହୁଥିବା ବେଳେ, ଅନ୍ୟ କେହି ଏହାକୁ ଗରିବଙ୍କ ପାଇଁ ଦାନ କରିବା ପ୍ରସ୍ତାବ ରଖୁଛନ୍ତି।
ଏହି ପରିପ୍ରେକ୍ଷିତରେ ବିରୋଧୀ ଦଳ ନେତା ଓ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଦରମା ବୃଦ୍ଧି ଗ୍ରହଣ ନକରିବାକୁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିବା ପରେ ରାଜ୍ୟ ରାଜନୀତିରେ ନୂଆ ଝଡ଼ ସୃଷ୍ଟି ହୋଇଛି। ଏହାକୁ ନେଇ ଭାଜପା ଓ କଂଗ୍ରେସ—ଉଭୟ ଦଳ ନବୀନ ପଟ୍ଟନାୟକଙ୍କ ଉପରେ ଆକ୍ରମଣ ଜୋରଦାର କରିଛନ୍ତି। ସେମାନଙ୍କ ଅଭିଯୋଗ ଯେ, ବିଧାନସଭାରେ ଆଲୋଚନା ସମୟରେ ଆପତ୍ତି ଉଠାଇନଥିବା ନେତା ଏବେ ଲୋକଦେଖାଣିଆ ରାଜନୈତିକ ବୟାନ ଦେଉଛନ୍ତି।
ବରିଷ୍ଠ ଭାଜପା ନେତା ଜୟନାରାୟଣ ମିଶ୍ର କହିଛନ୍ତି ଯେ, ୨୪ ବର୍ଷ ଧରି କ୍ଷମତାରେ ଥିବା ସମୟରେ ନବୀନ ପଟ୍ଟନାୟକ ଚାହାଁଥିଲେ ଏପରି ନିଷ୍ପତ୍ତି ନେଇପାରିଥାନ୍ତେ। ସେ ବିଜୁ ପଟ୍ଟନାୟକଙ୍କ ଏକ ଟଙ୍କା ଦରମା ପ୍ରଥାକୁ ସ୍ମରଣ କରି ଏହାକୁ ‘ରାଜନୈତିକ ନାଟକ’ ବୋଲି ଅଭିହିତ କରିଛନ୍ତି। ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହ ଦେଓ ମଧ୍ୟ ପ୍ରଶ୍ନ ଉଠାଇଛନ୍ତି ଯେ, ବିଲ୍ ଉପରେ ଆଲୋଚନା ସମୟରେ ପୂର୍ବତନ ମୁଖ୍ୟମନ୍ତ୍ରୀ କାହିଁକି ଗୃହରେ ଆପତ୍ତି ଉଠାଇଲେ ନାହିଁ।
କଂଗ୍ରେସ ମଧ୍ୟ ସମାନ ମତ ପ୍ରକାଶ କରିଛି। କଂଗ୍ରେସ ବିଧାୟକ ପବିତ୍ର ସାଉଁଟା କହିଛନ୍ତି ଯେ, ବିଲ୍ ପେଶ ହେବା ସମୟରେ ବିଜେଡିର ସଦସ୍ୟମାନେ ଉପସ୍ଥିତ ଥିଲେ ଓ ଏହାକୁ ସମର୍ଥନ କରିଥିଲେ। ଏବେ ଦରମା ବୃଦ୍ଧିକୁ ବିରୋଧ କରିବାକୁ ସେ ‘ରାଜନୈତିକ ଷ୍ଟଣ୍ଟ’ ବୋଲି ବର୍ଣ୍ଣନା କରିଛନ୍ତି।
ଅନ୍ୟପଟେ, କେନ୍ଦ୍ରାପଡ଼ାର ବିଜେଡି ବିଧାୟକ ଗଣେଶ୍ୱର ବେହେରା ଦରମା ବୃଦ୍ଧିକୁ ସମର୍ଥନ କରି କହିଛନ୍ତି ଯେ, ଦଳ ଗୃହରେ ବିଲ୍କୁ ସମର୍ଥନ କରିଥିବାରୁ ଏହାକୁ ବିରୋଧ କରିବାର ପ୍ରଶ୍ନ ଉଠେନାହିଁ।
ରିପୋର୍ଟ ଅନୁଯାୟୀ, ବର୍ତ୍ତମାନ ଓଡ଼ିଶାର ବିଧାୟକମାନେ ଦେଶରେ ସର୍ବାଧିକ ମାସିକ ଦରମା ପାଉଛନ୍ତି। ଏହି ପ୍ୟାକେଜରେ ₹୯୦,୦୦୦ ମୂଳ ଦରମା ସହ ନିର୍ବାଚନମଣ୍ଡଳୀ ଓ ସଚିବାଳୟ ଖର୍ଚ୍ଚ, ଯାନବାହନ ଓ ଯାତ୍ରା ଭତ୍ତା, ଏବଂ ଡାକ୍ତରୀ, ବିଜୁଳି, ଟେଲିଫୋନ୍ ଖର୍ଚ୍ଚ ଅନ୍ତର୍ଭୁକ୍ତ ରହିଛି। ଏହି ବୃଦ୍ଧି ପରେ ଓଡ଼ିଶା ମହାରାଷ୍ଟ୍ର, ତେଲେଙ୍ଗାନା, ହରିଆଣା ଓ ଉତ୍ତର ପ୍ରଦେଶ ଭଳି ରାଜ୍ୟଗୁଡ଼ିକୁ ପଛେ ଛାଡ଼ି ସର୍ବାଧିକ ଦରମା ଦେଉଥିବା ରାଜ୍ୟ ତାଲିକାର ଶୀର୍ଷରେ ପହଞ୍ଚିଛି।