ନୂଆଦିଲ୍ଲୀ, ୨୩।୧୨: ମହିଳା ପ୍ରିମିୟର ଲିଗ୍ (WPL) ୨୦୨୬ ସିଜନ୍ ପୂର୍ବରୁ ଦିଲ୍ଲୀ କ୍ୟାପିଟାଲ୍ସ ଏକ ବଡ଼ ନିଷ୍ପତ୍ତି ନେଇ ଟିମ୍ର ନୂଆ ଅଧିନାୟକ ଭାବେ ୨୫ ବର୍ଷୀୟ ଭାରତୀୟ ଷ୍ଟାର ବ୍ୟାଟ୍ସମ୍ୟାନ୍ ଜେମିମା ରୋଡ୍ରିଗଜ୍ଙ୍କୁ ନିଯୁକ୍ତ କରିଛି। ଅକ୍ସନ୍ ପୂର୍ବରୁ ପୂର୍ବତନ ଅଧିନାୟକ ଓ ଅଷ୍ଟ୍ରେଲିଆର ଦିଗ୍ଗଜ ଖେଳାଳି ମେଗ ଲାନିଙ୍ଗଙ୍କୁ ଟିମ୍ ରିଲିଜ୍ କରିବା ପରେ ନୂଆ ନେତୃତ୍ୱ ନିର୍ବାଚନ ଆବଶ୍ୟକ ହୋଇପଡ଼ିଥିଲା।
ଦିଲ୍ଲୀ କ୍ୟାପିଟାଲ୍ସ ପ୍ରବନ୍ଧନ ଜେମିମାଙ୍କ ଉପରେ ଆସ୍ଥା ରଖି ତାଙ୍କୁ WPL ୨୦୨୬ ସିଜନ୍ ପାଇଁ ଅଧିନାୟକ ଦାୟିତ୍ୱ ଦେଇଛି। ଗତ ସିଜନରେ ସେ ଟିମ୍ର ଉପ-ଅଧିନାୟକ ଭାବେ ଦାୟିତ୍ୱ ସମ୍ଭାଳିଥିବା ସହ ନେତୃତ୍ୱ ଦକ୍ଷତା ପ୍ରମାଣ କରିଥିଲେ। WPLର ପ୍ରଥମ ସିଜନ୍ରୁ ଦିଲ୍ଲୀ ପାଇଁ ସେ ଏକ ମୁଖ୍ୟ ଖେଳାଳି ଭାବେ ଖେଳିଆସୁଛନ୍ତି ଏବଂ ଅକ୍ସନରେ ମଧ୍ୟ ଟିମ୍ର ପ୍ରଥମ ପସନ୍ଦ ଥିଲେ।
ସମ୍ପ୍ରତି ଆୟୋଜିତ ଆଇସିସି ମହିଳା ବିଶ୍ୱକପ୍ରେ ଭାରତର ଐତିହାସିକ ସଫଳତାରେ ଜେମିମା ଗୁରୁତ୍ୱପୂର୍ଣ୍ଣ ଅବଦାନ ରଖିଥିଲେ। ବଡ଼ ମଞ୍ଚରେ ଚାପ ସହ ଖେଳିବାର କ୍ଷମତା ଓ ସ୍ଥିର ପ୍ରଦର୍ଶନ ତାଙ୍କୁ ପ୍ରଥମ ଥର ପାଇଁ WPLରେ ଅଧିନାୟକ ହେବାର ସୁଯୋଗ ଦେଇଛି।
ଦିଲ୍ଲୀ କ୍ୟାପିଟାଲ୍ସ ଜର୍ସିରେ ଜେମିମା ଏପର୍ଯ୍ୟନ୍ତ ୨୭ଟି WPL ମ୍ୟାଚ୍ ଖେଳି ୧୩୯.୬୭ ଷ୍ଟ୍ରାଇକ୍ ରେଟ୍ରେ ୫୦୭ ରନ୍ ସଂଗ୍ରହ କରିଛନ୍ତି। ତିନୋଟି ସିଜନ୍ରେ ସେ ସମସ୍ତ ଫାଇନାଲ୍ ମ୍ୟାଚ୍ରେ ଟିମ୍ର ଅଂଶ ରହିଥିବା ସହ ବ୍ୟାଟିଂ ଓ ଫିଲ୍ଡିଂ—ଦୁଇଁଥିରେ ଟିମ୍କୁ ଗୁରୁତ୍ୱପୂର୍ଣ୍ଣ ସଫଳତା ଦେଇଆସିଛନ୍ତି।
ନୂଆ ଦାୟିତ୍ୱ ସମ୍ପର୍କରେ ଜେମିମା ରୋଡ୍ରିଗଜ୍ କହିଛନ୍ତି, “ଦିଲ୍ଲୀ କ୍ୟାପିଟାଲ୍ସର ଅଧିନାୟକ ହେବା ମୋ ପାଇଁ ଗର୍ବ ଓ ସମ୍ମାନର କଥା। ବିଶ୍ୱକପ୍ ବିଜୟ ପରେ ଏହି ଦାୟିତ୍ୱ ମୋ ପାଇଁ ଆଉ ଅଧିକ ବିଶେଷ, କାରଣ WPLର ପ୍ରଥମ ସିଜନ୍ରୁ ଏହି ଫ୍ରାଞ୍ଚାଇଜି ମୋ ହୃଦୟରେ ଏକ ଅଲଗା ସ୍ଥାନ ରଖିଛି।”
ଭାରତୀୟ ପ୍ରତିଭାକୁ ନେତୃତ୍ୱର ସୁଯୋଗ ଦେଇ ଦିଲ୍ଲୀ କ୍ୟାପିଟାଲ୍ସ ଏକ ସ୍ପଷ୍ଟ ସନ୍ଦେଶ ଦେଇଛି। ଜେମିମାଙ୍କ ନେତୃତ୍ୱରେ WPL ୨୦୨୬ ସିଜନ୍ରେ ଟିମ୍ ଭଲ ପ୍ରଦର୍ଶନ କରିବ ବୋଲି ଫ୍ରାଞ୍ଚାଇଜି ଆଶା ବ୍ୟକ୍ତ କରିଛି।