ନୂଆଦିଲ୍ଲୀ, ୨୭ ଡିସେମ୍ବର: ଡିଜିଟାଲ୍ ଭୁଗତାନର ଯୁଗରେ UPI ଏବେ ସବୁଠୁ ଲୋକପ୍ରିୟ ମାଧ୍ୟମ ହୋଇଉଠିଛି। ଦୈନନ୍ଦିନ କିଣାକଟାରୁ ଆରମ୍ଭ କରି ଅନଲାଇନ୍ ଶପିଂ ପର୍ଯ୍ୟନ୍ତ, ସମସ୍ତେ UPI ଉପରେ ନିର୍ଭର କରୁଛନ୍ତି। ତେବେ ଅନେକ ସମୟରେ ଆକାଉଣ୍ଟ୍ରେ ପର୍ଯ୍ୟାପ୍ତ ଟଙ୍କା ନଥିବାରୁ ପେମେଣ୍ଟ୍ ବିଫଳ ହେବା ସମସ୍ୟା ସାମ୍ନାକୁ ଆସେ। ଏହି ଅସୁବିଧାକୁ ଦୂର କରିବା ପାଇଁ ଭାରତପେ ଓ ଯସ୍ ବ୍ୟାଙ୍କ ମିଶି ଏକ ନୂଆ ସେବା ଆରମ୍ଭ କରିଛନ୍ତି — ‘Pay Later with BharatPe’।
ଏହି ନୂଆ ସୁବିଧା ମାଧ୍ୟମରେ ଉପଭୋକ୍ତାମାନେ UPI ଦ୍ୱାରା ଭୁଗତାନ କରିବା ବେଳେ ଆକାଉଣ୍ଟ୍ରେ ଟଙ୍କା ନଥିଲେ ମଧ୍ୟ ଉଧାରରେ ପେମେଣ୍ଟ୍ କରିପାରିବେ। NPCIର UPI ସିଷ୍ଟମ୍ ଉପରେ ଆଧାରିତ ଏହି ସେବା ସମ୍ପୂର୍ଣ୍ଣ ସୁରକ୍ଷିତ ଓ ବିଶ୍ୱାସଯୋଗ୍ୟ ବୋଲି କମ୍ପାନି କହିଛି।
କାଗଜପତ୍ର ବିନା ତୁରନ୍ତ କ୍ରେଡିଟ୍
‘Pay Later’ ସେବାର ମୁଖ୍ୟ ବିଶେଷତା ହେଉଛି — ଏଥିପାଇଁ ଅଲଗା ଭାବେ ଲୋନ୍ କିମ୍ବା କ୍ରେଡିଟ୍ କାର୍ଡ୍ ପାଇଁ ଆବେଦନ କରିବାକୁ ପଡ଼େ ନାହିଁ। ଭାରତପେ ଆପ୍ରେ Pay Later ବିକଳ୍ପ ବାଛି ଯସ୍ ବ୍ୟାଙ୍କର KYC ପ୍ରକ୍ରିୟା ସମ୍ପନ୍ନ କଲେ, କିଛି ମିନିଟ୍ ମଧ୍ୟରେ କ୍ରେଡିଟ୍ ସୀମା ଅନୁମୋଦନ ମିଳିଯାଏ। ଏହା ପରେ ଯେକୌଣସି QR କୋଡ୍ ସ୍କାନ୍ କରି କିମ୍ବା ଅନଲାଇନ୍ ଭୁଗତାନ କରିହେବ।
୪୫ ଦିନ ପର୍ଯ୍ୟନ୍ତ ସୁଧମୁକ୍ତ ସମୟ
ଏହି ସେବାର ସବୁଠୁ ଆକର୍ଷଣୀୟ ଦିକ୍ ହେଉଛି ୪୫ ଦିନର ଇଣ୍ଟରେଷ୍ଟ୍-ଫ୍ରି ପିରିୟଡ୍। ଏହି ସମୟ ସୀମା ଭିତରେ ଯଦି ଉପଭୋକ୍ତା ସମ୍ପୂର୍ଣ୍ଣ ଟଙ୍କା ଫେରସ୍ତ କରିଦିଅନ୍ତି, ତେବେ କୌଣସି ସୁଧ ଦେବାକୁ ପଡ଼ିବ ନାହିଁ। ମାସ ଶେଷରେ ଦରମା ଆସୁଥିବା ଲୋକମାନଙ୍କ ପାଇଁ ଏହା ବେଶ ଉପକାରୀ ହେବ।
EMIରେ ମଧ୍ୟ ଭୁଗତାନ ସୁବିଧା
ଯଦି ୪୫ ଦିନ ମଧ୍ୟରେ ସମ୍ପୂର୍ଣ୍ଣ ଟଙ୍କା ଶୋଧ କରିବା ସମ୍ଭବ ନୁହେଁ, ତେବେ ୩ ରୁ ୧୨ ମାସ ପର୍ଯ୍ୟନ୍ତ EMI ରେ ଭୁଗତାନ କରିବାର ସୁବିଧା ମଧ୍ୟ ରହିଛି। ଏହାଦ୍ୱାରା ଏକାଥରକେ ଆର୍ଥିକ ଚାପ ପଡ଼େ ନାହିଁ।
ଛୋଟ ବ୍ୟବସାୟୀଙ୍କ ପାଇଁ ଲାଭ
ଏହି Pay Later ସେବା କେବଳ ସାଧାରଣ ଗ୍ରାହକ ନୁହେଁ, ଛୋଟ ଦୋକାନଦାର ଓ ବ୍ୟବସାୟୀଙ୍କ ପାଇଁ ମଧ୍ୟ ବଡ଼ ସାହାଯ୍ୟକାରୀ। ବ୍ୟାଙ୍କ ଲୋନ୍ର ଜଟିଳ ପ୍ରକ୍ରିୟା ବିନା ତୁରନ୍ତ ଡିଜିଟାଲ୍ କ୍ରେଡିଟ୍ ମିଳିଥିବାରୁ ସେମାନେ ସହଜରେ ମାଲ କିଣି ବ୍ୟବସାୟ ବଢ଼ାଇପାରିବେ।
ରିୱାର୍ଡ୍ର ଅତିରିକ୍ତ ସୁବିଧା
ଭାରତପେ UPI ମାଧ୍ୟମରେ ପ୍ରତ୍ୟେକ ଭୁଗତାନରେ ଉପଭୋକ୍ତାମାନେ Zillion Coins ରୂପେ ରିୱାର୍ଡ୍ ପାଇବେ। ଏହି କଏନ୍ଗୁଡ଼ିକୁ ପରେ ଶପିଂ, ଭାଉଚର କିମ୍ବା ବିଲ୍ ପରିଶୋଧରେ ବ୍ୟବହାର କରାଯାଇପାରିବ।
ଭାରତପେ ଓ ଯସ୍ ବ୍ୟାଙ୍କର ଏହି ନୂଆ ସହଯୋଗ UPIକୁ ଆହୁରି ଶକ୍ତିଶାଳୀ କରିବା ସହ ଡିଜିଟାଲ୍ କ୍ରେଡିଟ୍କୁ ସାଧାରଣ ଲୋକଙ୍କ ପାଖକୁ ଆଣିଦେଇଛି।