ୱାସିଂଟନ: ଇରାନରେ ହିଂସାତ୍ମକ ପ୍ରତିବାଦ ଓ ଅସ୍ଥିର ପରିସ୍ଥିତି ଲଗାତାର ବଢ଼ୁଥିବା ପରିପ୍ରେକ୍ଷିତରେ ଆମେରିକା ନିଜ ନାଗରିକଙ୍କ ପାଇଁ ଏକ କଠୋର ଯାତ୍ରା ଆଡଭାଇଜରି ଜାରି କରିଛି। ଆମେରିକାର ଭର୍ଚୁଆଲ୍ ଦୂତାବାସ ପକ୍ଷରୁ ସ୍ପଷ୍ଟ ଭାବେ କୁହାଯାଇଛି ଯେ, ଇରାନରେ ଥିବା ସମସ୍ତ ଆମେରିକୀୟ ନାଗରିକ ଯଥାଶୀଘ୍ର ଦେଶ ଛାଡ଼ିବାକୁ ପଦକ୍ଷେପ ନିଅନ୍ତୁ।
ଆଡଭାଇଜରିରେ ଗିରଫଦାରୀ, ଆହତ ହେବା, ସୁରକ୍ଷା ବ୍ୟବସ୍ଥାର କଠୋରତା ଏବଂ ଯୋଗାଯୋଗ ସେବାରେ ବାଧା ସମ୍ପର୍କରେ ସତର୍କ କରାଯାଇଛି। ଇରାନ ସରକାର ମୋବାଇଲ୍ ଫୋନ୍, ଲ୍ୟାଣ୍ଡଲାଇନ୍ ଏବଂ ଜାତୀୟ ଇଣ୍ଟରନେଟ୍ ନେଟୱାର୍କର ଆକ୍ସେସ୍କୁ ସୀମିତ କରିଥିବା ମଧ୍ୟ ଆଡଭାଇଜରିରେ ଉଲ୍ଲେଖ ରହିଛି।
ଆମେରିକୀୟ ନାଗରିକମାନଙ୍କୁ ଆର୍ମେନିଆ କିମ୍ବା ତୁର୍କୀ ମାର୍ଗରେ ଇରାନ ଛାଡ଼ିବାକୁ ପରାମର୍ଶ ଦିଆଯାଇଛି ଏବଂ ଯୋଗାଯୋଗ ପାଇଁ ବିକଳ୍ପ ଉପାୟ ବ୍ୟବହାର କରିବାକୁ କୁହାଯାଇଛି। ରିପୋର୍ଟ ଅନୁଯାୟୀ, ଏହି ପ୍ରତିବାଦ ଘଟଣାରେ ଏପର୍ଯ୍ୟନ୍ତ ୬,୬୦୦ରୁ ଅଧିକ ଲୋକଙ୍କ ମୃତ୍ୟୁ ଘଟିଥିବା ବେଳେ ୧୦,୬୮୧ ଜଣଙ୍କୁ ଗିରଫ କରାଯାଇଛି।
ଏହାସହିତ ଅନେକ ଏୟାରଲାଇନ୍ସ ଇରାନକୁ ଏବଂ ଇରାନରୁ ଉଡ଼ାଣ ସେବା ସୀମିତ କିମ୍ବା ବାତିଲ କରିଥିବା ସୂଚନା ମିଳିଛି। କିଛି ବିମାନ ସଂସ୍ଥା ଜାନୁଆରି ୧୬ ପର୍ଯ୍ୟନ୍ତ ସେବା ସ୍ଥଗିତ ରଖିଥିବା ବେଳେ, ଆଗାମୀ ଦିନରେ ମଧ୍ୟ ଇଣ୍ଟରନେଟ୍ ବିଭ୍ରାଟ ଜାରି ରହିପାରେ ବୋଲି ଆମେରିକା ସତର୍କ କରିଛି।