ଜେରୁଜେଲମ୍: ଇରାନରେ ଚାଲିଥିବା ଦେଶବ୍ୟାପୀ ବିକ୍ଷୋଭକୁ ଦମନ କରିବା ପାଇଁ ସରକାର ଦମନମୂଳକ କାର୍ଯ୍ୟାନୁଷ୍ଠାନ ଚଳାଇଥିବା ଅଭିଯୋଗ ଉଠିଛି। ଗିରଫ ବିକ୍ଷୋଭକାରୀମାନଙ୍କୁ ମାଡ଼ ମାରିବା ଓ ଭୟ ଦେଖାଇ ଇସ୍ରାଏଲ କିମ୍ବା ଆମେରିକାଠାରୁ ଟଙ୍କା ନେଇ ଦେଶବିରୋଧୀ ଷଡ଼ଯନ୍ତ୍ରରେ ଜଡିତ ଥିବା ସ୍ୱୀକାର କରାଯାଉଥିବା ଦାବି କରାଯାଇଛି।
ଇରାନର ସରକାରୀ ଗଣମାଧ୍ୟମରେ ପ୍ରସାରିତ କିଛି ସ୍ୱୀକାରୋକ୍ତି ଭିଡିଓରେ ଗିରଫ ବ୍ୟକ୍ତିମାନଙ୍କୁ ହାତକଡ଼ି ପିନ୍ଧାଯାଇଥିବା ଓ ମୁହଁକୁ ବ୍ଲର କରାଯାଇଥିବା ଦେଖାଯାଇଛି। ଏହି ଭିଡିଓଗୁଡ଼ିକରେ ନାଟକୀୟ ପୃଷ୍ଠଭୂମି ସଙ୍ଗୀତ ସହ ବିକ୍ଷୋଭକାରୀମାନେ ସୁରକ୍ଷା ବାହିନୀ ଉପରେ ଆକ୍ରମଣ କରୁଥିବା ଓ ସମ୍ପତ୍ତି ନଷ୍ଟ କରୁଥିବା କ୍ଲିପ୍ ଦେଖାଯାଉଛି। କର୍ତ୍ତୃପକ୍ଷଙ୍କ ଦାବି ଅନୁସାରେ, ଏହି ଆକ୍ରମଣରେ କେତେକ ଘରୋଇ ଅସ୍ତ୍ରଶସ୍ତ୍ର ବ୍ୟବହୃତ ହୋଇଛି।
ଇରାନ ସରକାର କହିଛି ଯେ, ଏହି ସ୍ୱୀକାରୋକ୍ତିଗୁଡ଼ିକ ଦେଶବ୍ୟାପୀ ବିକ୍ଷୋଭ ପଛରେ ବିଦେଶୀ ଷଡ଼ଯନ୍ତ୍ର ଥିବାର ପ୍ରମାଣ। ଅନ୍ୟପକ୍ଷେ ବିକ୍ଷୋଭକାରୀ ଓ ମାନବାଧିକାର ସଂଗଠନମାନେ ଅଭିଯୋଗ କରିଛନ୍ତି ଯେ, ଗିରଫ ବ୍ୟକ୍ତିମାନଙ୍କଠାରୁ ମାନସିକ ଓ ଶାରୀରିକ ନିର୍ଯାତନା ମାଧ୍ୟମରେ ବାଧ୍ୟତାମୂଳକ ସ୍ୱୀକାରୋକ୍ତି ନିଆଯାଇଛି।
ଆମେରିକାଭିତ୍ତିକ ‘ହ୍ୟୁମ୍ୟାନ୍ ରାଇଟ୍ସ ଆକ୍ଟିଭିଷ୍ଟ ନ୍ୟୁଜ୍ ଏଜେନ୍ସି’ ଦାବି କରିଛି ଯେ, ଏପରି ସ୍ୱୀକାରୋକ୍ତି ପରେ ମୃତ୍ୟୁଦଣ୍ଡ ସମେତ ଗୁରୁତର ଶାସ୍ତି ହେବାର ଆଶଙ୍କା ରହିଛି। ସଂଗଠନର ଡେପୁଟି ଡାଇରେକ୍ଟର ସ୍କାଏଲାର ଥମ୍ପସନ କହିଛନ୍ତି ଯେ, ଏହା ଇରାନରେ ଦୀର୍ଘଦିନ ଧରି ଚାଲିଥିବା ଏକ ପ୍ରଚଳିତ ଢାଞ୍ଚା।
ଇରାନୀୟ କର୍ତ୍ତୃପକ୍ଷ ଏହି ବିକ୍ଷୋଭକୁ ଆମେରିକା ଓ ଇସ୍ରାଏଲ ପ୍ରାୟୋଜିତ ‘ଦଙ୍ଗା’ ବୋଲି ବର୍ଣ୍ଣନା କରିଛନ୍ତି। ବୈଦେଶିକ ମନ୍ତ୍ରୀ ଅବ୍ବାସ ଆରାଘଚି କହିଛନ୍ତି ଯେ, ହିଂସା ଘଟଣାର ପଛରେ ବିଦେଶୀ ହସ୍ତକ୍ଷେପ ରହିଛି, କାରଣ ଇରାନୀୟମାନେ କଦାପି ମସଜିଦରେ ନିଆଁ ଲଗାଇବେ ନାହିଁ।
ଡିସେମ୍ବର ୨୮ରୁ ବିକ୍ଷୋଭ ଆରମ୍ଭ ହେବା ପରେ ସରକାରୀ ଟେଲିଭିଜନରେ ଅତି କମ୍ରେ ୯୭ଟି ସ୍ୱୀକାରୋକ୍ତି ପ୍ରସାରଣ ହୋଇଥିବା ଜଣାପଡ଼ିଛି, ଯାହାକୁ ମାନବାଧିକାର କର୍ମୀମାନେ ଗଭୀର ଚିନ୍ତାଜନକ ବୋଲି ଅଭିହିତ କରିଛନ୍ତି।