ନୂଆଦିଲ୍ଲୀ:
ବିଜେପିର ନୂତନ ରାଷ୍ଟ୍ରୀୟ ଅଧ୍ୟକ୍ଷ ନୀତିନ ନବୀନ ମଙ୍ଗଳବାରଠାରୁ ଦୁଇ ଦିନିଆ ପଶ୍ଚିମବଙ୍ଗ ଗସ୍ତରେ ଯିବେ। ଜାନୁଆରି ୨୭ ଓ ୨୮ ତାରିଖରେ ସେ ଦୁର୍ଗାପୁର ଏବଂ ଆସାନସୋଲ ଗସ୍ତ କରିବେ। ରାଷ୍ଟ୍ରୀୟ ଅଧ୍ୟକ୍ଷ ଦାୟିତ୍ୱ ଗ୍ରହଣ ପରେ ଏହା ତାଙ୍କର ପ୍ରଥମ ପଶ୍ଚିମବଙ୍ଗ ଗସ୍ତ।
ସୂଚନା ଅନୁଯାୟୀ, ନୀତିନ ନବୀନ ଏପରି ଅଞ୍ଚଳକୁ ଗସ୍ତ ପାଇଁ ବାଛିଛନ୍ତି ଯେଉଁଠାରେ ଅଧିକାଂଶ ଭୋଟର ଅଣ-ବଙ୍ଗାଳୀ, ବିଶେଷକରି ବିହାର ମୂଳର ଭୋଟର ଅଛନ୍ତି। ଦୁର୍ଗାପୁର ଓ ଆସାନସୋଲ ଉଭୟ ଅଞ୍ଚଳ ପଶ୍ଚିମ ବର୍ଧମାନ ଜିଲ୍ଲା ଅନ୍ତର୍ଗତ।
ଗସ୍ତକାଳୀନ ସମୟରେ ନୀତିନ ନବୀନ ବିଭିନ୍ନ କାର୍ଯ୍ୟକ୍ରମରେ ଯୋଗଦେବା ସହ ଦଳୀୟ ସାଂଗଠନିକ ବୈଠକ କରିବେ। ଏହା ସହ ସେ ବିଜେପିର ବରିଷ୍ଠ ନେତା ଓ କାର୍ଯ୍ୟକର୍ତ୍ତାଙ୍କ ସହ ଆଲୋଚନା କରି ଦଳୀୟ ରଣନୀତିକୁ ମଜବୁତ କରିବେ।
ପଶ୍ଚିମବଙ୍ଗରେ ବିଜେପିର ରାଜନୈତିକ ସମୀକରଣ
୨୦୧୯ ଲୋକସଭା ନିର୍ବାଚନରେ ବିଜେପି ବର୍ଧମାନ-ଦୁର୍ଗାପୁର ଓ ଆସାନସୋଲ ଆସନ ଜିତିଥିଲା। କିନ୍ତୁ ୨୦୨୪ ଲୋକସଭା ନିର୍ବାଚନରେ ଏହି ଦୁଇଟି ଆସନ ତୃଣମୂଳ କଂଗ୍ରେସ ହାତକୁ ଯାଇଥିଲା। ବର୍ତ୍ତମାନ ବର୍ଧମାନ-ଦୁର୍ଗାପୁରର ସାଂସଦ କୀର୍ତ୍ତି ଆଜାଦ ଓ ଆସାନସୋଲର ସାଂସଦ ଶତ୍ରୁଘ୍ନ ସିହ୍ନା, ଉଭୟେ ବିହାର ମୂଳର।
୨୦୨୧ ବିଧାନସଭା ନିର୍ବାଚନରେ ପଶ୍ଚିମ ବର୍ଧମାନର ୯ଟି ଆସନ ମଧ୍ୟରୁ ୬ଟି ଆସନ ତୃଣମୂଳ କଂଗ୍ରେସ ଜିତିଥିଲା। ଆଗାମୀ ୨୦୨୬ ନିର୍ବାଚନକୁ ଦୃଷ୍ଟିରେ ରଖି ବିଜେପି ଏହି ଅଞ୍ଚଳଗୁଡ଼ିକରେ ବିହାର-ମୂଳ ଭୋଟରଙ୍କୁ କେନ୍ଦ୍ର କରି ରଣନୀତି ତୟାରି କରୁଛି।