ଭୁବନେଶ୍ୱର:
ରାଜ୍ୟର ବିଭିନ୍ନ ବିଭାଗରେ ଖାଲିଥିବା ପଦବୀ ପୂରଣକୁ ଗତିଶୀଳ କରିବା ପାଇଁ ମୁଖ୍ୟ ଶାସନ ସଚିବ Anu Gargଙ୍କ ଅଧ୍ୟକ୍ଷତାରେ ଖାରବେଳ ଭବନରେ ସଚିବସ୍ତରୀୟ ବୈଠକ ଆୟୋଜିତ ହୋଇଛି। ବୈଠକରେ “ବିକଶିତ ଓଡ଼ିଶା ୨୦୩୬ ଓ ୨୦୪୭” ଲକ୍ଷ୍ୟରେ ପ୍ରସ୍ତୁତ ୨ ବର୍ଷିଆ କାର୍ଯ୍ୟଯୋଜନାର ଅଗ୍ରଗତି ସମୀକ୍ଷା କରାଯାଇଥିଲା। ପ୍ରମୁଖ ପ୍ରଦର୍ଶନ ସୂଚକାଙ୍କ (KPI) କୁ ସରଳ କରି ନିୟମିତ ମନିଟରିଂ ମାଧ୍ୟମରେ ଲକ୍ଷ୍ୟ ପ୍ରାପ୍ତିକୁ ନିଶ୍ଚିତ କରିବାକୁ ସେ ପରାମର୍ଶ ଦେଇଥିଲେ।
ମୁଖ୍ୟମନ୍ତ୍ରୀଙ୍କ ୧୫ ଦିଗନିର୍ଦ୍ଦେଶମୂଳକ କାର୍ଯ୍ୟସୂଚୀ ଅନ୍ତର୍ଗତ ଭିଜନ ଡକ୍ୟୁମେଣ୍ଟର କାର୍ଯ୍ୟାନ୍ବୟନକୁ ସର୍ବୋଚ୍ଚ ପ୍ରାଥମିକତା ଦେବାକୁ ବୈଠକରେ ଉଲ୍ଲେଖ କରାଯାଇଥିଲା। “୩୬ ଫର ୩୬” ପ୍ରମୁଖ ପଦକ୍ଷେପ ଅଧୀନରେ ପ୍ରତ୍ୟେକ ଜିଲ୍ଲାର ସନ୍ତୁଳିତ ଓ ସମୟବଦ୍ଧ ବିକାଶ ଉପରେ ମୁଖ୍ୟ ସଚିବ ବିଶେଷ ଗୁରୁତ୍ୱ ଦେଇ ବଡ଼ ପ୍ରକଳ୍ପଗୁଡ଼ିକର ଅଗ୍ରଗତି ନିୟମିତ ଭାବେ ସମୀକ୍ଷା କରିବାକୁ କହିଥିଲେ।
ନିଯୁକ୍ତି ସମ୍ପର୍କରେ ବୈଠକରେ ଗୁରୁତ୍ୱପୂର୍ଣ୍ଣ ଆଲୋଚନା ହୋଇଥିଲା। ଆଗାମୀ ଜୁନ୍ ୨୦୨୬ ସୁଦ୍ଧା ୬୫,୦୦୦ ନିଯୁକ୍ତିର ଲକ୍ଷ୍ୟ ରାଜ୍ୟ ସରକାର ଧାରଣ କରିଛି। ନୂତନ ସରକାର ଗଠନ ପରେ ଏପର୍ଯ୍ୟନ୍ତ ୩୯,୫୦୦ ଜଣଙ୍କୁ ବିଭିନ୍ନ ବିଭାଗ ମାଧ୍ୟମରେ ନିଯୁକ୍ତି ଦିଆଯାଇଛି। ଆସନ୍ତା ୩ ମାସ ମଧ୍ୟରେ ଆଉ ୩୪,୬୪୧ ପଦବୀ ପୂରଣ ପାଇଁ ପ୍ରସ୍ତାବ ଦାଖଲ ହୋଇଥିବା ସୂଚନା ମିଳିଛି।
ଏହି ପଦବୀଗୁଡ଼ିକ ପୂରଣ ପାଇଁ Odisha Public Service Commission, Odisha Staff Selection Commission ଓ Odisha Sub-ordinate Staff Selection Commissionଙ୍କୁ ଅନୁରୋଧ ପଠାଯାଇଛି। ନିଯୁକ୍ତି ପ୍ରକ୍ରିୟାରେ ଥିବା ସମସ୍ୟା ଓ ସମାଧାନ ବିଷୟରେ ଅର୍ଥ ବିଭାଗ ପକ୍ଷରୁ ବିସ୍ତୃତ ଆଲୋଚନା କରାଯାଇଥିଲା।
ମୁଖ୍ୟ ଶାସନ ସଚିବ ବିଭାଗମାନଙ୍କୁ ନିଯୁକ୍ତି ପ୍ରକ୍ରିୟାକୁ ତ୍ୱରାନ୍ୱିତ କରିବା, ନିୟମିତ ସମୀକ୍ଷା କରିବା ଓ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗକୁ ଅଦ୍ୟତନ ତଥ୍ୟ ପ୍ରେରଣ କରିବାକୁ ନିର୍ଦ୍ଦେଶ ଦେଇଛନ୍ତି।
୨୦୨୫-୨୬ ଅର୍ଥବର୍ଷର ବଜେଟ୍ ଅନୁସାରେ ମାର୍ଚ୍ଚ ସୁଦ୍ଧା ବଜେଟ୍ ବ୍ୟୟ ଶେଷ କରିବା ଓ ରାଜସ୍ୱ ଆଦାୟ ଲକ୍ଷ୍ୟ ପୂରଣ ସମ୍ପର୍କରେ ମଧ୍ୟ ବୈଠକରେ ଆଲୋଚନା ହୋଇଥିଲା। ସାଂସଦ ଓ ବିଧାୟକମାନଙ୍କ ପ୍ରସ୍ତାବିତ ପ୍ରକଳ୍ପ ଓ ପରାମର୍ଶକୁ ଗୁରୁତ୍ୱ ସହ ଅନୁଧ୍ୟାନ କରି ତାହାର କାର୍ଯ୍ୟାନ୍ବୟନ ସ୍ଥିତି ସମ୍ପର୍କରେ ସଚିବମାନଙ୍କୁ ନିୟମିତ ତଥ୍ୟ ଦେବାକୁ ମଧ୍ୟ ନିର୍ଦ୍ଦେଶ ମିଳିଛି।
ବୈଠକରେ ଉନ୍ନୟନ କମିଶନର ଓ ଅତିରିକ୍ତ ମୁଖ୍ୟ ଶାସନ ସଚିବ Deo Ranjan Kumar Singh ସହିତ ବିଭିନ୍ନ ବିଭାଗର ଜ୍ୟେଷ୍ଠ ସଚିବମାନେ ଉପସ୍ଥିତ ଥିଲେ।