କାଠମାଣ୍ଡୁ: ନେପାଳର ରାଜନୀତିରେ ଏକ ଐତିହାସିକ ପରିବର୍ତ୍ତନ ଦେଖାଦେଇଛି। Balendra Shah ମାତ୍ର ୩୫ ବର୍ଷ ବୟସରେ ଦେଶର ୪୦ତମ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ଏହା ସହିତ ସେ ନେପାଳର ସର୍ବକନିଷ୍ଠ ପ୍ରଧାନମନ୍ତ୍ରୀ ହିସାବରେ ଇତିହାସ ରଚିଛନ୍ତି।
Ram Chandra Poudel ଶୁକ୍ରବାର କାଠମାଣ୍ଡୁରେ ଆୟୋଜିତ ଏକ ଭବ୍ୟ ଉତ୍ସବରେ ବାଲେନ୍ଦ୍ର ଶାହଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ଏହି ଅବସରରେ ହିନ୍ଦୁ ଓ ବୌଦ୍ଧ ଧର୍ମୀୟ ପାରମ୍ପରିକ ରୀତିନୀତି ଅନୁସରଣ କରାଯାଇଥିଲା। ପବିତ୍ର ରାମ ନବମୀ ଅବସରରେ ଶଙ୍ଖନାଦ ଓ ମନ୍ତ୍ରୋଚ୍ଚାରଣ ମଧ୍ୟରେ ଶପଥ ଗ୍ରହଣ ଉତ୍ସବ ଅନୁଷ୍ଠିତ ହୋଇଥିଲା।
ଚଳିତ ମାସରେ ହୋଇଥିବା ନିର୍ବାଚନରେ ବାଲେନ୍ଦ୍ର ଶାହଙ୍କ ନେତୃତ୍ୱାଧୀନ ଦଳ ଭାରୀ ବିଜୟ ହାସଲ କରିଥିଲା। ୨୭୫ ଆସନରୁ ୧୮୨ଟି ଜିତି ସେମାନେ ପ୍ରାୟ ଦୁଇ-ତୃତୀୟାଂଶ ମତାଧିକ୍ୟ ହାସଲ କରିଥିଲେ, ଯାହା ତାଙ୍କୁ ସରକାର ଗଠନ ପାଇଁ ଶକ୍ତିଶାଳୀ ଅବସ୍ଥାନରେ ରଖିଥିଲା।
ବାଲେନ୍ଦ୍ର ଶାହ ପୂର୍ବରୁ କାଠମାଣ୍ଡୁର ମେୟର ଥିବା ସହିତ ଜଣେ ପ୍ରସିଦ୍ଧ ରାପର ଭାବେ ମଧ୍ୟ ପରିଚିତ। ସେ ତାଙ୍କ ସଙ୍ଗୀତ ମାଧ୍ୟମରେ ସରକାରୀ ବ୍ୟବସ୍ଥାର ଅନ୍ତର୍ନିହିତ ଅସୁବିଧାକୁ ଉଜାଗର କରିଥିଲେ, ଯାହା ତାଙ୍କୁ ଯୁବପିଢି ମଧ୍ୟରେ ବିଶେଷ ଲୋକପ୍ରିୟତା ଦେଇଥିଲା।
୧୯୯୦ ମସିହାରେ କାଠମାଣ୍ଡୁରେ ଜନ୍ମଗ୍ରହଣ କରିଥିବା ବାଲେନ୍ଦ୍ର ଶାହ ଜଣେ ଷ୍ଟ୍ରକଚରାଲ ଇଞ୍ଜିନିୟର ହୋଇଥିବା ସତ୍ତ୍ୱେ, ସାମାଜିକ ଓ ରାଜନୀତିକ ପରିବର୍ତ୍ତନ ପାଇଁ ସେ ନିଜକୁ ରାଜନୀତିରେ ନିୟୋଜିତ କରିଥିଲେ।
ନୂଆ ପ୍ରଧାନମନ୍ତ୍ରୀ ଭାବେ ବାଲେନ୍ଦ୍ର ଶାହଙ୍କ ନେତୃତ୍ୱ ନେପାଳର ରାଜନୀତିରେ ନୂଆ ଦିଗ ଆଣିବ ବୋଲି ଆଶା କରାଯାଉଛି।