ପୁରୀ: ପବିତ୍ର Ratha Yatra ପାଇଁ ଆଜିଠାରୁ ଆରମ୍ଭ ହେଲା ରଥ ନିର୍ମାଣ ପ୍ରକ୍ରିୟା। ଶୁଭ Akshaya Tritiya ଅବସରରେ Jagannath Temple ସମ୍ମୁଖରେ ହୋମଯଜ୍ଞ କରାଯାଇ ତିନିରଥ ନିର୍ମାଣ ଅନୁକୂଳ କରାଯାଇଛି।
ଶ୍ରୀବିଗ୍ରହଙ୍କ ଆଜ୍ଞାମାଳ ଆସି ଲାଗିବା ପରେ ଶ୍ରୀନଅର ସମ୍ମୁଖରେ ନିର୍ମିତ ଯଜ୍ଞଶାଳାରେ ଶାସ୍ତ୍ରୋକ୍ତ ବିଧିରେ ଯଜ୍ଞ ସମ୍ପନ୍ନ ହୋଇଥିଲା। ଦେଉଳ ପୁରୋହିତ, ରାଜଗୁରୁ ଓ ବ୍ରାହ୍ମଣମାନଙ୍କ ଉପସ୍ଥିତିରେ ଧଉରା କାଠ ରଖି ହୋମଯଜ୍ଞ କରାଯାଇଥିଲା। ବନଯାଗର ଇଷ୍ଟଦେବତା ନୃସିଂହଙ୍କୁ ଆରାଧନା କରାଯାଇ ଯଜ୍ଞାହୁତି ଦିଆଯାଇଥିଲା।
ଏହି ଅବସରରେ ମଦନମୋହନ, ଶ୍ରୀଦେବୀ ଓ ଭୂଦେବୀଙ୍କ ଚଳନ୍ତି ପ୍ରତିମା ମଣି ବିମାନରେ ବିଜେ କରିଥିଲେ ଏବଂ ରଥକାଠ ଦିଗକୁ ମୁହଁ କରି ରହି ଆଗାମୀ ଯାତ୍ରା ପାଇଁ ପ୍ରସ୍ତୁତି ନିହାରିଥିଲେ। ପଞ୍ଚମହାଦେବ ଓ ଅନ୍ୟାନ୍ୟ ଦେବଦେବୀଙ୍କ ଉପସ୍ଥିତିରେ ପୂଜା ପର୍ବ ଆୟୋଜିତ ହୋଇଥିଲା।
ପରେ ବିଧିଅନୁଯାୟୀ ମା’ ଦକ୍ଷିଣକାଳୀଙ୍କ ମନ୍ତ୍ରରେ ଅଭିମନ୍ତ୍ରିତ କୁରାଢ଼ି ଦ୍ୱାରା ଧଉରା କାଠକୁ ସ୍ପର୍ଶ କରି ରଥ ନିର୍ମାଣର ଶୁଭାରମ୍ଭ କରାଯାଇଥିଲା। ନନ୍ଦିଘୋଷ, ତାଳଧ୍ବଜ ଓ ଦେବଦଳନ ରଥ ପାଇଁ ନିଯୁକ୍ତ ମୁଖ୍ୟ ମହାରଣାମାନେ ନଡ଼ିଆ ବାଡ଼େଇ ରଥ କାମ ଆରମ୍ଭ କରିଥିଲେ।
ଆସନ୍ତାକାଲିଠାରୁ ରଥର ତୁମ୍ବ ତିଆରି ସହ ନିର୍ମାଣ କାର୍ଯ୍ୟ ତ୍ୱରାନ୍ବିତ ହେବ। ଭଉଁରିରେ ରଥ ଚକଡେରା ଆରମ୍ଭ ହୋଇ ଶୀତଳ ଷଷ୍ଠୀ ପର୍ଯ୍ୟନ୍ତ ଏହା ଚାଲିବ।
ଏହି ପବିତ୍ର ଅବସରରେ ମନ୍ଦିର ପ୍ରଶାସନ ଓ ଜିଲ୍ଲା ପ୍ରଶାସନର ଅଧିକାରୀମାନେ ରଥକାଠକୁ ମୁଣ୍ଡିଆ ମାରି ରଥ ନିର୍ମାଣ କାର୍ଯ୍ୟ ସଫଳ ହେବାକୁ ପ୍ରାର୍ଥନା କରିଥିଲେ।
ଏହା ସହିତ ପବିତ୍ର ରଥଯାତ୍ରା ପାଇଁ ପୁରୀରେ ଆନୁଷ୍ଠାନିକ ଭାବେ ପ୍ରସ୍ତୁତି ଆରମ୍ଭ ହୋଇଯାଇଛି, ଯାହା ପ୍ରତିବର୍ଷ ଲକ୍ଷାଧିକ ଭକ୍ତଙ୍କୁ ଆକର୍ଷିତ କରେ।