ରାଉରକେଲା: ସୁନ୍ଦରଗଡ଼ ଜିଲ୍ଲାରେ ସାତ ମାସ ତଳେ ବିକ୍ରି ହୋଇଯାଇଥିବା ଏକ ଶିଶୁ ପୁତ୍ରକୁ ଉଦ୍ଧାର କରାଯାଇଛି। ଚାଇଲ୍ଡଲାଇନ୍ ଅଧିକାରୀମାନେ ବରଗଡ଼ର ଏକ ବନ୍ଦ ଘରୁ ଏହି ଶିଶୁକୁ ଉଦ୍ଧାର କରିଛନ୍ତି। କୋଇଡା ବ୍ଲକ ପାଟମୁଣ୍ଡା ଅଞ୍ଚଳର ଜଣେ ମହିଳା ଗତ ଅଗଷ୍ଟ ୩୧ ତାରିଖରେ ରାଉରକେଲା ସରକାରୀ ଡାକ୍ତରଖାନାରେ ଏହି ଶିଶୁକୁ ଜନ୍ମ ଦେଇଥିଲେ। ଅଭିଯୋଗ ଅନୁଯାୟୀ, ଶିଶୁଟିକୁ ୫୦,୦୦୦ ଟଙ୍କାରେ ବିକ୍ରି କରିଦିଆଯାଇଥିଲା। ଏହି ଖବର ଗଣମାଧ୍ୟମରେ ପ୍ରକାଶ ପାଇବା ପରେ ଶିଶୁ ମଙ୍ଗଳ ସମିତି (CWC) ଏବଂ କୋଇଡା CDPO ଏକ ଟିମ୍ ଗଠନ କରି ତଦନ୍ତ ଆରମ୍ଭ କରିଥିଲେ।
ତଦନ୍ତରୁ ଜଣାପଡିଛି ଯେ, ମଧ୍ୟସ୍ଥିମାନେ ମା’ଠାରୁ ଶିଶୁଟିକୁ କିଣି ପରେ ବରଗଡ଼ର ଏକ ନିଃସନ୍ତାନ ଦମ୍ପତିଙ୍କୁ ୧.୯୦ ଲକ୍ଷ ଟଙ୍କାରେ ବିକ୍ରି କରିଦେଇଥିଲେ।ଦୀର୍ଘ ମାସର ଅନୁସନ୍ଧାନ ପରେ ଅଧିକାରୀମାନେ ବରଗଡ଼ ସ୍ଥିତ ସେହି ଦମ୍ପତିଙ୍କ ଘରେ ଚଢାଉ କରି ଶିଶୁଟିକୁ ଉଦ୍ଧାର କରିଛନ୍ତି।
ବରଗଡ଼ ଶିଶୁ ମଙ୍ଗଳ ସମିତି ଏ ସମ୍ପର୍କରେ ସୁନ୍ଦରଗଡ଼ କର୍ତ୍ତୃପକ୍ଷଙ୍କୁ ସୂଚନା ଦେଇଛନ୍ତି। ଶିଶୁଟିକୁ ଖୁବଶୀଘ୍ର ସୁନ୍ଦରଗଡ଼ ଜିଲ୍ଲା ମୁଖ୍ୟାଳୟକୁ ଅଣାଯିବ ବୋଲି ଅଧିକାରୀମାନେ ଜଣାଇଛନ୍ତି। ସମସ୍ତ ଆଇନଗତ ପ୍ରକ୍ରିୟା ଶେଷ ହେବା ପରେ ଅଧିକ ସୂଚନା ପ୍ରଦାନ କରାଯିବ।