କ୍ୱେଟା: ବାଲୋଚିସ୍ତାନର ବିଭିନ୍ନ ଜିଲ୍ଲାରେ ପାକିସ୍ତାନୀ ସେନା ଉପରେ ବଡ଼ ଧରଣର ଆକ୍ରମଣ ହୋଇଛି। ଏକ ବାଲୋଚ୍ ସଶସ୍ତ୍ର ଗୋଷ୍ଠୀ ପାକିସ୍ତାନୀ ବାହିନୀ ବିରୋଧରେ ୧୦ଟି ଅପରେସନ୍ କରିଥିବା ଦାବି କରିଛି। ଏହି ଆକ୍ରମଣରେ ୧୦ ଜଣ ସେନା କର୍ମଚାରୀ ଏବଂ ଚାରି ଜଣ କଥିତ “ରାଷ୍ଟ୍ରୀୟ ଏଜେଣ୍ଟ” ପ୍ରାଣ ହରାଇଥିବା ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି।
ବାଲୋଚିସ୍ତାନ ଲିବରେସନ ଫ୍ରଣ୍ଟ (BLF) ର ମୁଖପାତ୍ର ମେଜର ଗ୍ୱାହରାମ ବାଲୋଚ ଏହି ଆକ୍ରମଣ ପାଇଁ ନିଜ ସଂଗଠନକୁ ଦାୟୀ କରିଛନ୍ତି। ବାଲୋଚିସ୍ତାନର ଖାରାନ୍, ୱାଶୁକ୍, ଆୱାରାନ୍, କେଚ୍ ଏବଂ ମାଷ୍ଟୁଙ୍ଗ ଜିଲ୍ଲାରେ ଏହି ଅପରେସନ୍ ଚାଲିଥିଲା। ପାକିସ୍ତାନର ଫ୍ରଣ୍ଟିୟର କୋର୍ସ (FC) ଚେକପୋଷ୍ଟ, ସାମରିକ ଶିବିର, ସେନା କନଭୟ ଏବଂ ସଡ଼କ ନିର୍ମାଣ କମ୍ପାନୀର ସୁରକ୍ଷା କର୍ମୀଙ୍କୁ ଲକ୍ଷ୍ୟ କରି ଏହି ଆକ୍ରମଣ କରାଯାଇଥିଲା।
ଗାଜି ରୋଡ୍ରେ ଥିବା FC ଚେକପୋଷ୍ଟକୁ ରକେଟ୍ ଏବଂ ଗ୍ରେନେଡ୍ ଲଞ୍ଚର ସାହାଯ୍ୟରେ ଆକ୍ରମଣ କରାଯାଇଥିଲା। ଫଳରେ ସେନାର ବହୁଳ କ୍ଷୟକ୍ଷତି ହୋଇଛି।ନାଗ-ଗ୍ରାରୀ ଅଞ୍ଚଳରେ ଏକ ଗୋପନୀୟ ଅପରେସନ କରି ଦୁଇ ଜଣ “ଡେଥ୍ ସ୍କ୍ୱାଡ୍ ଏଜେଣ୍ଟ”ଙ୍କୁ ହତ୍ୟା କରାଯାଇଥିବା BLF ଦାବି କରିଛି।
ତିରତିଜ୍ ଅଞ୍ଚଳରେ ଥିବା ସେନା ଶିବିର ଉପରେ ସ୍ନାଇପର ଆକ୍ରମଣ କରାଯାଇଥିଲା। ଏଥିରେ ଜଣେ ସୈନିକ ନିହତ ହୋଇଥିବା ବେଳେ ଭାରୀ ଅସ୍ତ୍ରଶସ୍ତ୍ର ବ୍ୟବହାର କରି ଶିବିରକୁ କ୍ଷତି ପହଞ୍ଚାଯାଇଥିଲା।କ୍ୟାଡେଟ୍ କଲେଜ ଚେକପୋଷ୍ଟ ନିକଟରେ ସ୍ୱୟଂଚାଳିତ ଅସ୍ତ୍ରରେ ଆକ୍ରମଣ କରି ଦୁଇ ଜଣ ସୈନିକଙ୍କୁ ହତ୍ୟା କରାଯାଇଥିଲା ଏବଂ ପରେ ହାଇୱେ ଅବରୋଧ କରାଯାଇଥିଲା।
ଖାଦ କୋଚା ଅଞ୍ଚଳରେ ଆଜିଜ୍ ଚେକପୋଷ୍ଟ ଉପରେ ଆକ୍ରମଣ କରି ୪ ଜଣ ପାକିସ୍ତାନୀ ସୈନିକଙ୍କୁ ହତ୍ୟା କରାଯାଇଥିବା ଦାବି ହୋଇଛି। BLF ପକ୍ଷରୁ କୁହାଯାଇଛି ଯେ, ଆକ୍ରମଣ ସମୟରେ ସେମାନେ ସେନାର ଅସ୍ତ୍ରଶସ୍ତ୍ର ଜବତ କରିଛନ୍ତି ଏବଂ ସିସିଟିଭି କ୍ୟାମେରା ଗୁଡିକୁ ନଷ୍ଟ କରିଦେଇଛନ୍ତି। ଏହାସହ ଟୁମ୍ପ ଅଞ୍ଚଳରେ ପାକିସ୍ତାନୀ ସେନା ପାଇଁ ଗୁପ୍ତଚର ବୃତ୍ତି କରୁଥିବା ଅଭିଯୋଗରେ ଦୁଇ ଜଣ ବ୍ୟକ୍ତିଙ୍କୁ ମଧ୍ୟ ମୃତ୍ୟୁଦଣ୍ଡ ଦିଆଯାଇଛି।