କୋଲକାତା: ପଶ୍ଚିମବଙ୍ଗର ନୂଆ ସରକାର ରାଜ୍ୟର ସ୍କୁଲଗୁଡ଼ିକ ପାଇଁ ଏକ ନୂଆ ନିର୍ଦ୍ଦେଶ ଜାରି କରିଛନ୍ତି। ଏହାଅନୁସାରେ, ଏବେ ପ୍ରତ୍ୟେକ ସ୍କୁଲରେ ସକାଳ ପ୍ରାର୍ଥନା ସମୟରେ ଶ୍ରେଣୀ ଆରମ୍ଭ ପୂର୍ବରୁ ‘ବନ୍ଦେ ମାତରମ୍’ ଗାନ କରିବା ବାଧ୍ୟତାମୂଳକ ହେବ। ସ୍କୁଲ ଶିକ୍ଷା ବିଭାଗ ପକ୍ଷରୁ ଏନେଇ ସମସ୍ତ ସ୍କୁଲ ମୁଖ୍ୟଙ୍କୁ ନୋଟିସ୍ ଜାରି କରାଯାଇଛି। ଶୁକ୍ରବାରଠାରୁ ଏହି ନିୟମକୁ ତୁରନ୍ତ କାର୍ଯ୍ୟକାରୀ କରିବାକୁ କୁହାଯାଇଛି।
ନୋଟିସ୍ରେ କୁହାଯାଇଛି ଯେ, ସକାଳ ପ୍ରାର୍ଥନା ସମୟରେ ‘ବନ୍ଦେ ମାତରମ୍’ ଗାନ କରାଯିବା ଦ୍ୱାରା ଛାତ୍ରଛାତ୍ରୀଙ୍କ ମନରେ ଦେଶପ୍ରେମ ଓ ଜାତୀୟ ଚେତନା ବୃଦ୍ଧି ପାଇବ। ଏହା ସହ ରାଜ୍ୟର ସମସ୍ତ ସ୍କୁଲରେ ଏକ ସମାନ ପ୍ରାର୍ଥନା ପ୍ରଣାଳୀ ଚାଲୁ କରିବାକୁ ସରକାର ଚାହୁଁଛନ୍ତି।
ତେବେ ଏହି ନୂଆ ନିଷ୍ପତ୍ତି ସ୍କୁଲ କର୍ତ୍ତୃପକ୍ଷଙ୍କ ମଧ୍ୟରେ କିଛି ଦ୍ୱନ୍ଦ୍ୱ ସୃଷ୍ଟି କରିଛି। ପୂର୍ବତନ ସରକାର ସମୟରେ ସକାଳ ସଭାରେ ରାଜ୍ୟ ସଙ୍ଗୀତ ‘ବାଙ୍ଗଲାର ମାଟି ବାଙ୍ଗଲାର ଜଳ’ ଗାଇବା ବାଧ୍ୟତାମୂଳକ ଥିଲା। ଏବେ ନୂଆ ନୋଟିସ୍ରେ ଏହା ସମ୍ପର୍କରେ କୌଣସି ସ୍ପଷ୍ଟ ଉଲ୍ଲେଖ ନଥିବାରୁ ସ୍କୁଲମାନେ ଦ୍ୱିଧାରେ ପଡ଼ିଛନ୍ତି।
କିଛି ସ୍କୁଲ ଅଧ୍ୟକ୍ଷଙ୍କ କହିବା ଅନୁସାରେ, ସକାଳେ ‘ବନ୍ଦେ ମାତରମ୍’, ରାଜ୍ୟ ସଙ୍ଗୀତ ଓ ଜାତୀୟ ସଙ୍ଗୀତ—ତିନୋଟି ଗୀତ ଗାଇବାକୁ ସମୟ ଲାଗିବ ଏବଂ ଏହାର ପ୍ରଭାବରେ ଶ୍ରେଣୀ ଆରମ୍ଭରେ ବିଳମ୍ବ ହୋଇପାରେ। ତେବେ ସରକାରୀ ନିର୍ଦ୍ଦେଶ ଥିବାରୁ ସ୍କୁଲମାନେ ଏହାକୁ ପାଳନ କରିବାକୁ ବାଧ୍ୟ ହେବେ ବୋଲି ସେମାନେ କହିଛନ୍ତି।
ସୂଚନାଯୋଗ୍ୟ, କେନ୍ଦ୍ର ଗୃହ ମନ୍ତ୍ରଣାଳୟ ପୂର୍ବରୁ ‘ବନ୍ଦେ ମାତରମ୍’ର ୧୫୦ତମ ବାର୍ଷିକୀ ଅବସରରେ ଏହାକୁ ବିଭିନ୍ନ ଶିକ୍ଷାନୁଷ୍ଠାନରେ ଗାଇବାକୁ ପ୍ରୋତ୍ସାହନ ଦେଇଥିଲା। ଏବେ ପଶ୍ଚିମବଙ୍ଗ ସରକାର ଏହାକୁ ସ୍କୁଲ ସ୍ତରରେ କାର୍ଯ୍ୟକାରୀ କରିଛନ୍ତି।