ଭୁବନେଶ୍ବର: ଶ୍ରୀଜଗନ୍ନାଥ ସଂସ୍କୃତି ଓ ପରମ୍ପରାର ସୁରକ୍ଷା ଦିଗରେ ଏକ ବଡ଼ ସଫଳତା ମିଳିଛି। ଉତ୍ତର ପ୍ରଦେଶର ହାପୁଡ଼ଠାରେ ଆସନ୍ତା ଜୁନ୍ ୧୪ ତାରିଖରେ ଅନୁଷ୍ଠିତ ହେବାକୁ ଥିବା ପ୍ରସ୍ତାବିତ ରଥଯାତ୍ରାକୁ ସ୍ଥଗିତ ରଖାଯାଇଛି। ଶ୍ରୀଜଗନ୍ନାଥ ମନ୍ଦିର ପ୍ରଶାସନ (SJTA), ପୁରୀ ପକ୍ଷରୁ ଏହି ଅସମୟ ରଥଯାତ୍ରାର ସମୟ ଏବଂ ପାରମ୍ପରିକ ରୀତିନୀତି ଉଲ୍ଲଂଘନକୁ ନେଇ ଦୃଢ଼ ଆପତ୍ତି ପ୍ରକାଶ କରାଯିବା ପରେ ଏହି ନିଷ୍ପତ୍ତି ନିଆଯାଇଛି।
ଧାର୍ଯ୍ୟ ସମୟ ପୂର୍ବରୁ ରଥଯାତ୍ରା ଆୟୋଜନକୁ ନେଇ ବିବାଦ ଦେଖାଦେବା ପରେ, ହାପୁଡ଼ର ‘ଭଗବାନ ଶ୍ରୀ ଜଗନ୍ନାଥ ରଥଯାତ୍ରା ସେବା ସମିତି’ କର୍ତ୍ତୃପକ୍ଷ ସ୍ଥାନୀୟ ଜିଲ୍ଲା ପ୍ରଶାସନ ନିକଟରେ ନିଜର ଲିଖିତ ସମ୍ମତି ପ୍ରଦାନ କରିଛନ୍ତି। ପାରମ୍ପରିକ ନୀତିକାନ୍ତିକୁ ସମ୍ମାନ ଜଣାଇ ସେମାନେ ଏହି କାର୍ଯ୍ୟକ୍ରମକୁ ସ୍ଥଗିତ ରଖିବାକୁ ରାଜି ହୋଇଛନ୍ତି। ଏହି ବିକାଶ ସମ୍ପର୍କରେ ହାପୁଡ଼ ଜିଲ୍ଲା ପ୍ରଶାସନ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡକ୍ଟର ଅରବିନ୍ଦ କୁମାର ପାଢ଼ୀଙ୍କୁ ଆନୁଷ୍ଠାନିକ ଭାବେ ଅବଗତ କରାଇଛି।
ହାପୁଡ଼ ପ୍ରଶାସନର ଏହି ତ୍ୱରିତ ପଦକ୍ଷେପକୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡକ୍ଟର ଅରବିନ୍ଦ କୁମାର ପାଢ଼ୀ ସ୍ୱାଗତ କରିଛନ୍ତି। ଧାର୍ମିକ ପରମ୍ପରାର ପବିତ୍ରତା ରକ୍ଷା କରିଥିବାରୁ ସେ ଜିଲ୍ଲା ମାଜିଷ୍ଟ୍ରେଟ୍ଙ୍କୁ ପ୍ରଶଂସା କରିଛନ୍ତି।
ଡକ୍ଟର ପାଢ଼ୀ ସୋସିଆଲ ମିଡିଆ ପ୍ଲାଟଫର୍ମ ‘X’ ରେ ପୋଷ୍ଟ କରି ଲେଖିଛନ୍ତି: “ପବିତ୍ର ରଥଯାତ୍ରାର ମର୍ଯ୍ୟାଦା ଓ ପରମ୍ପରା ରକ୍ଷା ଦିଗରେ ତୁରନ୍ତ ଏବଂ ଚିନ୍ତାଶୀଳ ପଦକ୍ଷେପ ଗ୍ରହଣ କରିଥିବାରୁ ଆମେ @DmHapur ନିକଟରେ କୃତଜ୍ଞ। ମହାପ୍ରଭୁଙ୍କ ଆଶୀର୍ବାଦ ସମସ୍ତଙ୍କ ଉପରେ ରହିଥାଉ।
ସୂଚନାଯୋଗ୍ୟ ଯେ, ପାରମ୍ପରିକ ତିଥି ପୂର୍ବରୁ ହାପୁଡ଼ରେ ରଥଯାତ୍ରା ଆୟୋଜନ କରାଯାଉଥିବାରୁ ଶ୍ରୀମନ୍ଦିର ପ୍ରଶାସନ ଏହାକୁ ବିରୋଧ କରିଥିଲା। ଏହି ଅସମୟ ଉତ୍ସବକୁ ରୋକିବା ପାଇଁ ହାପୁଡ଼ ଜିଲ୍ଲା ପ୍ରଶାସନର ହସ୍ତକ୍ଷେପ ଲୋଡ଼ି ଏସଜେଟିଏ (SJTA) ପକ୍ଷରୁ ପୂର୍ବରୁ ଏକ ଚିଠି ଲେଖାଯାଇଥିଲା। ଶାସ୍ତ୍ରୀୟ ଓ ପାରମ୍ପରିକ ତିଥି ଅନୁଯାୟୀ, ଚଳିତ ବର୍ଷ ପୁରୀରେ ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ରଥଯାତ୍ରା ଜୁଲାଇ ୧ body ତାରିଖରେ ଅନୁଷ୍ଠିତ ହେବାକୁ ସ୍ଥିର ହୋଇଛି।