ନୂଆଦିଲ୍ଲୀ: ପୂର୍ବତନ ଅଭିନେତ୍ରୀ ଓ ମଡେଲ୍ Twisha Sharmaଙ୍କ ମୃତ୍ୟୁ ମାମଲାରେ ନୂଆ ତଥ୍ୟ ସାମ୍ନାକୁ ଆସିଛି। ପୁଲିସ ପଚରାଉଚରା ବେଳେ ତ୍ବିଷାଙ୍କ ସ୍ୱାମୀ Samarth Singh ଦାବି କରିଛନ୍ତି ଯେ, ଗର୍ଭପାତ ପରେ ତ୍ବିଷା ମାନସିକ ଭାବେ ଭାଙ୍ଗି ପଡ଼ିଥିଲେ ଏବଂ ଏପ୍ରିଲରେ ଗର୍ଭବତୀ ଥିବା ଜଣାପଡ଼ିବା ପରେ ତାଙ୍କ ଆଚରଣରେ ବହୁତ ପରିବର୍ତ୍ତନ ଆସିଥିଲା। ସେ ଆହୁରି କହିଛନ୍ତି ଯେ, କାରଣ ନ କହି ସେ ତ୍ବିଷାଙ୍କୁ ୭ ଲକ୍ଷ ଟଙ୍କା ଦେଇଥିଲେ।
ସିବିଆଇ ହାତକୁ ଗଲା ତଦନ୍ତ
ଭୋପାଳ ପୁଲିସଠାରୁ ମାମଲାର ତଦନ୍ତ ଦାୟିତ୍ୱ ନେବା ପରେ Central Bureau of Investigation ଏହି ଘଟଣାର ତଦନ୍ତ ଆରମ୍ଭ କରିଛି। ସୁପ୍ରିମ୍କୋର୍ଟ ନିରପେକ୍ଷ ତଦନ୍ତ ପାଇଁ ନିର୍ଦ୍ଦେଶ ଦେବାର ଗୋଟିଏ ଦିନ ପରେ ସିବିଆଇ ନୂଆ ଏଫ୍ଆଇଆର୍ ରୁଜୁ କରିଥିଲା।
Twisha Sharmaଙ୍କ ଶାଶୁଘର ପକ୍ଷରୁ ଏହାକୁ ଆତ୍ମହତ୍ୟା ବୋଲି ଦାବି କରାଯାଇଥିବାବେଳେ ତାଙ୍କ ପରିବାର ପକ୍ଷରୁ ଯୌତୁକ ନିର୍ଯାତନା ଓ ହତ୍ୟା ଅଭିଯୋଗ ଆଣାଯାଇଛି।
ପ୍ରାୟ ୧୦ ଦିନ ଧରି ଫେରାର ଥିବା ପରେ Samarth Singhଙ୍କୁ ଜବଲପୁରରୁ ଗିରଫ କରାଯାଇଥିଲା। ବର୍ତ୍ତମାନ ସେ ସାତ ଦିନିଆ ପୁଲିସ ରିମାଣ୍ଡରେ ଅଛନ୍ତି।
“ଗୃହିଣୀ ଜୀବନ ସହ ଖାପ ଖୁଆଇ ପାରୁନଥିଲେ”
ପୁଲିସ ସୂତ୍ର ଅନୁଯାୟୀ, ପଚରାଉଚରା ବେଳେ ସମର୍ଥ କହିଛନ୍ତି ଯେ ବିବାହର ପ୍ରଥମ କିଛି ମାସ ସମ୍ପର୍କ ସାଧାରଣ ଥିଲା। କିନ୍ତୁ ଏପ୍ରିଲ ୧୭ରେ ତ୍ବିଷା ଗର୍ଭବତୀ ଥିବା ଜାଣିବା ପରେ ସମ୍ପର୍କରେ ତନାତନି ଆରମ୍ଭ ହୋଇଥିଲା।
ତାଙ୍କ କହିବା ଅନୁସାରେ, ତ୍ବିଷା ପ୍ରାୟତଃ ଗ୍ଲାମର ଇଣ୍ଡଷ୍ଟ୍ରିରେ ତାଙ୍କ ପୂର୍ବ ଜୀବନକୁ ମନେପକାଉଥିଲେ ଏବଂ ଘରୋଇ ଜୀବନ ଓ ଦାୟିତ୍ୱ ସହିତ ଖାପ ଖୁଆଇବା କଷ୍ଟକର ବୋଲି କହୁଥିଲେ। ଏହାକୁ ନେଇ ଦୁହେଁଙ୍କ ମଧ୍ୟରେ ବାରମ୍ବାର ବିବାଦ ହେଉଥିଲା।
ମେ ୧୨ ରାତିରେ କ’ଣ ଘଟିଥିଲା?
ସମର୍ଥଙ୍କ ଦାବି ଅନୁଯାୟୀ, ମେ ୧୨ରେ ସବୁକିଛି ସାଧାରଣ ଥିଲା। ଦୁହେଁ ଏକାଠି ଡିନର୍ କରିଥିଲେ, ସୋସାଇଟି ପାର୍କରେ ହାଟିଥିଲେ ଏବଂ ପରେ ଟିଭି ଦେଖିଥିଲେ। ପରେ ସେ ଶୋଇବାକୁ ଯାଇଥିବାବେଳେ ତ୍ବିଷା ଫୋନ୍ରେ ପରିବାର ସହ କଥା ହେବାକୁ ତଳକୁ ଯାଇଥିଲେ।
ରାତିରେ ତ୍ବିଷାଙ୍କ ମା’ଙ୍କ ଫୋନ୍ ଆସିବା ପରେ ସେ ଓ ତାଙ୍କ ମା’ ଘର ଖୋଜିବା ସମୟରେ ଟେରାସରେ ତ୍ବିଷାଙ୍କୁ ଝୁଲୁଥିବା ଅବସ୍ଥାରେ ଦେଖିଥିବା ଦାବି କରିଛନ୍ତି। ପରେ ତାଙ୍କୁ ତୁରନ୍ତ ହସ୍ପିଟାଲକୁ ନିଆଯାଇଥିଲା, ଯେଉଁଠାରେ ଡାକ୍ତରମାନେ ମୃତ ଘୋଷଣା କରିଥିଲେ।
ସୁପ୍ରିମ୍କୋର୍ଟଙ୍କ ଗମ୍ଭୀର ଟିପ୍ପଣୀ
ଏହି ଘଟଣାକୁ ସ୍ୱତଃପ୍ରବୃତ୍ତ ଭାବେ ଗ୍ରହଣ କରି ସୁପ୍ରିମ୍କୋର୍ଟ କହିଛନ୍ତି ଯେ, ଜଣେ ଯୁବତୀଙ୍କ ସନ୍ଦେହଜନକ ମୃତ୍ୟୁ ଅତ୍ୟନ୍ତ ଗମ୍ଭୀର ବିଷୟ ଏବଂ ସ୍ୱଚ୍ଛ ତଦନ୍ତ ମାଧ୍ୟମରେ ସତ୍ୟ ସାମ୍ନାକୁ ଆସିବା ଆବଶ୍ୟକ।