ପୁନେ: ନୀଟ୍ (NEET-UG 2026) ପ୍ରଶ୍ନପତ୍ର ଲିକ୍ ମାମଲାରେ କେନ୍ଦ୍ରୀୟ ତଦନ୍ତ ବ୍ୟୁରୋ କୁ ଆଉ ଏକ ବଡ଼ ସଫଳତା ମିଳିଛି। ବୁଧବାର ଦିନ ସିବିଆଇ ଏହି ମାମଲାରେ ସମ୍ପୃକ୍ତ ଥିବା ଆଉ ଦୁଇଜଣ ଅଭିଯୁକ୍ତଙ୍କୁ ଗିରଫ କରିଛି। ଏହାକୁ ମିଶାଇ ଏହି ହାଇପ୍ରୋଫାଇଲ୍ ସ୍କାମରେ ଗିରଫ ହୋଇଥିବା ଲୋକଙ୍କ ସଂଖ୍ୟା ୧୩ରେ ପହଞ୍ଚିଛି।
ଗିରଫ ହୋଇଥିବା ଦୁଇ ଅଭିଯୁକ୍ତ ହେଲେ ଲାତୁରର ଜଣେ ଡାକ୍ତର ମନୋଜ ଶିରୁରେ ଏବଂ ପୁନେସ୍ଥିତ ‘ଅଭଙ୍ଗ ପ୍ରଭୁ ମେଡିକାଲ ଏକାଡେମୀ’ (APMA) କୋଚିଂ ସେଣ୍ଟରର ପଦାର୍ଥ ବିଜ୍ଞାନ ଅଧ୍ୟାପକ ତେଜସ ହର୍ଷଦକୁମାର ଶାହ।
ସିବିଆଇ ଅଧିକାରୀଙ୍କ ସୂଚନା ଅନୁଯାୟୀ, ଗିରଫ ଡାକ୍ତର ମନୋଜ ଶିରୁରେ ଏହି ସ୍କାମର ମୁଖ୍ୟ ସୂତ୍ରଧର ବା “କିଙ୍ଗପିନ୍” କୁହାଯାଉଥିବା ପି.ଭି. କୁଲକର୍ଣ୍ଣିଙ୍କଠାରୁ ରସାୟନ ବିଜ୍ଞାନ ପ୍ରଶ୍ନପତ୍ର ଆଣିଥିଲେ। ଏହି ପ୍ରଶ୍ନପତ୍ରକୁ ସେ ଅନ୍ୟ ଜଣେ ଅଭିଯୁକ୍ତ କୋଚିଂ ସେଣ୍ଟର ମାଲିକଙ୍କ ପୁଅ ସହ ଆଉ ଦୁଇଜଣ ଛାତ୍ରଙ୍କୁ ଯୋଗାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ।
ଅନ୍ୟପଟେ, କୋଚିଂ ସେଣ୍ଟରର ଅଧ୍ୟାପକ ତେଜସ ହର୍ଷଦକୁମାର ଶାହ, ପୂର୍ବରୁ ଗିରଫ ହୋଇଥିବା ମନୀଷା ହାଭାଲଦାରଙ୍କଠାରୁ ଲିକ୍ ହୋଇଥିବା ପଦାର୍ଥ ବିଜ୍ଞାନ ପ୍ରଶ୍ନପତ୍ର ହାସଲ କରିଥିଲେ।
୪୯ଟି ସ୍ଥାନରେ ଚଢ଼ାଉ, ଅନେକ ସାମଗ୍ରୀ ଜବତ
ଏହି ବଡ଼ ଦୁର୍ନୀତିର ଚେର କେଉଁ ପର୍ଯ୍ୟନ୍ତ ଲମ୍ବିଛି ଏବଂ ଏହା ପଛରେ ଥିବା ଷଡ଼ଯନ୍ତ୍ରକୁ ପଦାର୍ଥକୁ ଆଣିବା ପାଇଁ ସିବିଆଇ ଦେଶର ବିଭିନ୍ନ ପ୍ରାନ୍ତରେ ୪୯ଟି ସ୍ଥାନରେ ଚଢ଼ାଉ କରିଛି। ଏହି ସମୟରେ ଅନେକ ଆପତ୍ତିଜନକ ଦଲିଲ୍, ଲାପଟପ୍ ଏବଂ ମୋବାଇଲ୍ ଫୋନ୍ ଜବତ କରାଯାଇଛି। ବର୍ତ୍ତମାନ ଜବତ ସାମଗ୍ରୀଗୁଡ଼ିକର ବିସ୍ତୃତ ଯାଞ୍ଚ ଚାଲିଛି।
ସୂଚନାଯୋଗ୍ୟ ଯେ, ଗତ ମେ ୧୨ ତାରିଖରେ କେନ୍ଦ୍ର ଶିକ୍ଷା ମନ୍ତ୍ରଣାଳୟର ଉଚ୍ଚଶିକ୍ଷା ବିଭାଗ ପକ୍ଷରୁ ମିଳିଥିବା ଲିଖିତ ଅଭିଯୋଗ ଆଧାରରେ ସିବିଆଇ ଏହି ମାମଲା ରୁଜୁ କରିଥିଲା। ମାମଲା ରୁଜୁ ହେବା ସଙ୍ଗେ ସଙ୍ଗେ ସ୍ୱତନ୍ତ୍ର ଟିମ୍ ଗଠନ କରାଯାଇ ଦେଶବ୍ୟାପୀ ସନ୍ଦିଗ୍ଧମାନଙ୍କୁ ସେମାନଙ୍କ ଆସ୍ଥାନରୁ ଉଠାଇ ଜେରା କରାଯାଉଛି।
ଏହି ସବୁ ସହରରୁ ଗିରଫ ହେଲେଣି ଅଭିଯୁକ୍ତ
ସିବିଆଇ କହିଛି ଯେ ଏପର୍ଯ୍ୟନ୍ତ ଗିରଫ ହୋଇଥିବା ୧୩ ଜଣ ଅଭିଯୁକ୍ତ ଦେଶର ବିଭିନ୍ନ ପ୍ରମୁଖ ସହର ଯଥା:
- ଦିଲ୍ଲୀ
- ଜୟପୁର
- ଗୁରୁଗ୍ରାମ
- ନାସିକ
- ପୁନେ
- ଲାତୁର
- ଅହଲିୟାନଗର (ଅହମ୍ମଦନଗର) ରୁ ରହିଛନ୍ତି।
ତଦନ୍ତରୁ ଏହା ମଧ୍ୟ ସ୍ପଷ୍ଟ ହୋଇଛି ଯେ, ପରୀକ୍ଷା ପୂର୍ବରୁ କେଉଁ ଅସଲ ଉତ୍ସ ରୁ କେମିଷ୍ଟ୍ରି, ବାୟୋଲୋଜି ଏବଂ ଫିଜିକ୍ସ ପ୍ରଶ୍ନପତ୍ର ଲିକ୍ କରାଯାଇ ବଣ୍ଟାଯାଇଥିଲା, ତାହା ସିବିଆଇ ଚିହ୍ନଟ କରିସାରିଛି। ସିବିଆଇ ଏହି ମାମଲାରେ ଏକ ନିରପେକ୍ଷ, ସମ୍ପୂର୍ଣ୍ଣ ଏବଂ ବୃତ୍ତିଗତ ତଦନ୍ତ ପାଇଁ ପ୍ରତିଶ୍ରୁତିବଦ୍ଧ ବୋଲି ଦୋହରାଇଛି। ବର୍ତ୍ତମାନ ସୁଦ୍ଧା ଅଧିକ ତଦନ୍ତ ଜାରି ରହିଛି ଏବଂ ଆଗକୁ ଅନେକ ବଡ଼ ଖୁଲାସା ହେବାର ସମ୍ଭାବନା ରହିଛି।