ନୂଆଦିଲ୍ଲୀ: ଚୀନ୍ ଏବଂ ପାକିସ୍ତାନ ଦ୍ୱାରା ଜାରି କରାଯାଇଥିବା ସଦ୍ୟତମ ମିଳିତ ବିବୃତିକୁ ଭାରତ ସରକାର ଦୃଢ଼ ଭାବେ ପ୍ରତ୍ୟାଖ୍ୟାନ କରିଛନ୍ତି। ବିବୃତିରେ ଜମ୍ମୁ-କାଶ୍ମୀରର ଉଲ୍ଲେଖକୁ ବିରୋଧ କରିବା ସହ ଭାରତୀୟ ଭୂଖଣ୍ଡ ଦେଇ ଯାଉଥିବା ‘ଚୀନ୍-ପାକିସ୍ତାନ ଅର୍ଥନୈତିକ କରିଡର’ (CPEC) କୁ ବୈଧତା ଦେବା ପାଇଁ କରାଯାଉଥିବା ପ୍ରୟାସକୁ ନୂଆଦିଲ୍ଲୀ ଜୋରଦାର ବିରୋଧ କରିଛି।
ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ବେଜିଂ ଗସ୍ତ ଶେଷ ହେବା ପରେ ଏହି ମିଳିତ ବୟାନ ଜାରି ହୋଇଥିଲା, ଯେଉଁଥିରେ ସେ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କ ସହ ଆଲୋଚନା କରିଥିଲେ। ଏହାର ଜବାବରେ ଭାରତର ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୈସୱାଲ କହିଛନ୍ତି, “ଜମ୍ମୁ-କାଶ୍ମୀର ଏବଂ ଲଦାଖ ଭାରତର ଅଂଶ ଥିଲା, ଅଛି ଏବଂ ସର୍ବଦା ଏକ ଅଭିନ୍ନ ତଥା ଅବିଚ୍ଛେଦ୍ୟ ଅଙ୍ଗ ହୋଇ ରହିବ।” କୌଣସି ବିଦେଶୀ ରାଷ୍ଟ୍ରର ଭାରତର ଆଭ୍ୟନ୍ତରୀଣ ମାମଲାରେ ଟିପ୍ପଣୀ ଦେବାର ଅଧିକାର ନାହିଁ ବୋଲି ସେ ସ୍ପଷ୍ଟ କରିଛନ୍ତି।
ଭାରତ ପୁଣିଥରେ ସିପିଇସି (CPEC) ପ୍ରକଳ୍ପକୁ ନେଇ ଆପତ୍ତି ଉଠାଇଛି। ମନ୍ତ୍ରଣାଳୟ ଅନୁଯାୟୀ, ଏହି କରିଡରର ଏକ ବଡ଼ ଅଂଶ ପାକିସ୍ତାନ ଅଧିକୃତ କାଶ୍ମୀର (PoK) ଦେଇ ଗତି କରୁଛି, ଯାହାକୁ ପାକିସ୍ତାନ ବେଆଇନ ଭାବେ ଦଖଲ କରିଛି। ଭାରତ ନିଜର ସାର୍ବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତାକୁ କ୍ଷତି ପହଞ୍ଚାଉଥିବା ଯେକୌଣସି ପ୍ରକଳ୍ପକୁ ସମ୍ପୂର୍ଣ୍ଣ ରୂପେ ବିରୋଧ କରେ। ଏହା ସହ ୧୯୬୩ ମସିହାରେ ସାକ୍ସଗାମ ଉପତ୍ୟକାକୁ ନେଇ ଚୀନ୍-ପାକିସ୍ତାନ ମଧ୍ୟରେ ହୋଇଥିବା ବେଆଇନ ସୀମା ଚୁକ୍ତିକୁ ଭାରତ କେବେହେଲେ ସ୍ୱୀକୃତି ଦେଇନାହିଁ।
ଏହା ବ୍ୟତୀତ ବିବୃତିରେ “ସୀମାପାର ଜଳ ସମ୍ପଦ ସହଯୋଗ” ର ଉଲ୍ଲେଖକୁ ମଧ୍ୟ ଭାରତ ଖାରଜ କରିଛି। ଭାରତୀୟ ସୀମା ବ୍ୟତୀତ ଚୀନ୍-ପାକିସ୍ତାନ ମଧ୍ୟରେ କୌଣସି ସିଧାସଳଖ ସୀମା ନଥିବାରୁ ଏଭଳି ପ୍ରସଙ୍ଗ ଉଠାଇବା କେବଳ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି MEA କହିଛି। ଚୀନ୍-ପାକିସ୍ତାନ ମେଣ୍ଟ ଭୂ-ରାଜନୈତିକ ପ୍ରସଙ୍ଗରେ ଭାରତ ବିରୋଧରେ ରଣନୀତି କରୁଥିବା ବେଳେ ଭାରତ କିନ୍ତୁ ନିଜ ସାର୍ବଭୌମତ୍ୱ ପ୍ରସଙ୍ଗରେ କୌଣସି ପ୍ରକାରର ଆପୋଷ ବୁଝାମଣା କରିବ ନାହିଁ ବୋଲି ସ୍ପଷ୍ଟ ବାର୍ତ୍ତା ଦେଇଛି।