ଜମ୍ମୁ-କାଶ୍ମୀରରେ ପ୍ରକୃତିର ତାଣ୍ଡବ: ରିଆସିରେ ବାଦଲଫଟା ବର୍ଷା ଯୋଗୁଁ ଆକସ୍ମିକ ବନ୍ୟା, କିସ୍ତୱାଡ଼ରେ ସ୍କୁଲ ଛୁଟି ଘୋଷଣା

ଜମ୍ମୁ: ଜମ୍ମୁ-କାଶ୍ମୀରର ରିଆସି ଜିଲ୍ଲାର ଏକ ଗ୍ରାମରେ ବାଦଲଫଟା ବର୍ଷା ହେବା ଫଳରେ ବ୍ୟାପକ କ୍ଷୟକ୍ଷତି ଘଟିଛି। ଏହାକୁ ଦୃଷ୍ଟିରେ ରଖି ପ୍ରତିକୂଳ ପାଗ ଯୋଗୁଁ ପ୍ରଶାସନ ପକ୍ଷରୁ ଶୁକ୍ରବାର ଦିନ କିସ୍ତୱାଡ଼ ଜିଲ୍ଲାରେ ସ୍କୁଲଗୁଡ଼ିକୁ ବନ୍ଦ ରଖିବା ପାଇଁ ନିର୍ଦ୍ଦେଶ ଦିଆଯାଇଛି। ଗତ ୩ ଦିନ ମଧ୍ୟରେ ଜମ୍ମୁ ଅଞ୍ଚଳରେ ଏହା ହେଉଛି ପଞ୍ଚମ ବାଦଲଫଟା ଘଟଣା।

ସରକାରୀ ଅଧିକାରୀଙ୍କ ସୂଚନା ଅନୁଯାୟୀ, ଗୁରୁବାର ସନ୍ଧ୍ୟାରେ ରିଆସି ଜିଲ୍ଲାର ପାର୍ବତ୍ୟାଞ୍ଚଳ ବାଥୋଇରେ ବାଦଲଫଟା ବର୍ଷା ହେବା ଯୋଗୁଁ ହଠାତ୍ ଆକସ୍ମିକ ବନ୍ୟା ପରିସ୍ଥିତି ସୃଷ୍ଟି ହୋଇଥିଲା। ଏହି କାରଣରୁ ଅନେକ ଘରଦ୍ୱାର ଭାଙ୍ଗିରୁଜି ନଷ୍ଟ ହୋଇଯାଇଛି। ଏହା ପୂର୍ବରୁ ମଙ୍ଗଳବାର ଦିନ ଡୋଡା, କିସ୍ତୱାଡ଼ ଏବଂ ପୁଞ୍ଚ ଜିଲ୍ଲାରେ ୪ଟି ବାଦଲଫଟା ଘଟଣା ସାମ୍ନାକୁ ଆସିଥିଲା, ଯାହାଫଳରେ ବିଭିନ୍ନ ସ୍ଥାନରେ ରାସ୍ତାଘାଟ ବନ୍ଦ ହୋଇଯାଇଥିଲା। ତେବେ ସୌଭାଗ୍ୟବଶତଃ ଏପର୍ଯ୍ୟନ୍ତ କୌଣସି ଜୀବନହାନି ହୋଇଥିବା ସୂଚନା ମିଳିନାହିଁ।

ବାଥୋଇ ଅଞ୍ଚଳରେ ବାଦଲଫଟା ଯୋଗୁଁ ପାହାଡ଼ରୁ ପ୍ରବଳ ପାଣି ସହ ପଥର ଓ କାଦୁଅ ଆସି ଆବାସିକ ଅଞ୍ଚଳରେ ପଶିଯାଇଛି। ବନ୍ୟା ଜଳ ଘର ଗୁଡ଼ିକ ମଧ୍ୟରେ ପଶିଯିବା ଫଳରେ ଲୋକଙ୍କର ଆସବାବପତ୍ର ଓ ଘରୋଇ ସାମଗ୍ରୀ ନଷ୍ଟ ହୋଇଯାଇଛି, ଯାହା ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି କରିଛି। ସ୍ଥାନୀୟ ପ୍ରଶାସନ ଓ ଉଦ୍ଧାରକାରୀ ଦଳ ତୁରନ୍ତ ପ୍ରଭାବିତ ଅଞ୍ଚଳରେ ପହଞ୍ଚି ସାହାଯ୍ୟ ଓ ପୁନରୁଦ୍ଧାର କାର୍ଯ୍ୟ ଆରମ୍ଭ କରିଛନ୍ତି।

ରିଆସି ଜିଲ୍ଲା ବିକାଶ କମିଶନର (DDC) କହିଛନ୍ତି ଯେ ଗ୍ରାମର ଅନେକ ଘରେ ପାଣି ଓ ବର୍ଷା ଆବର୍ଜନା ପଶିଯାଇଛି। ଏହି ଘଟଣାକୁ ନେଇ ଜମ୍ମୁ-କାଶ୍ମୀରର ଉପ-ରାଜ୍ୟପାଳ (L-G) ମନୋଜ ସିହ୍ନା ଏକ୍ସ (ଟ୍ୱିଟର)ରେ ଲେଖିଛନ୍ତି, “ବାଥୋଇ ଗ୍ରାମରେ ବାଦଲଫଟା ପରେ ସ୍ଥିତିର ସମୀକ୍ଷା ପାଇଁ ରିଆସି ଡିସିଙ୍କ ସହ କଥା ହୋଇଛି।” ସେ କହିଛନ୍ତି ଯେ କ୍ଷୟକ୍ଷତି ଘଟିଥିଲେ ମଧ୍ୟ କେହି ମୃତାହତ ହୋଇନାହାନ୍ତି ଏବଂ ପ୍ରଭାବିତ ପରିବାରଗୁଡ଼ିକୁ ତୁରନ୍ତ ସହାୟତା ଯୋଗାଇଦେବାକୁ ନିର୍ଦ୍ଦେଶ ଦିଆଯାଇଛି।

ଅନ୍ୟପଟେ, କ୍ରମାଗତ ବର୍ଷା, ଖସଡ଼ା ରାସ୍ତା ଏବଂ ପାହାଡ଼ରୁ ପଥର ଖସିବା ଆଶଙ୍କାକୁ ଦୃଷ୍ଟିରେ ରଖି ଛାତ୍ରଛାତ୍ରୀ ଓ କର୍ମଚାରୀଙ୍କ ସୁରକ୍ଷା ପାଇଁ କିସ୍ତୱାଡ଼ ଜିଲ୍ଲାର ସମସ୍ତ ସରକାରୀ ଓ ବେସରକାରୀ ସ୍କୁଲକୁ ଆଜି (୦୫-୦୬-୨୦୨୬) ପାଇଁ ବନ୍ଦ ରଖିବାକୁ ଜିଲ୍ଲା ମୁଖ୍ୟ ଶିକ୍ଷା ଅଧିକାରୀ ନିର୍ଦ୍ଦେଶ ଦେଇଛନ୍ତି। ତେବେ କିସ୍ତୱାଡ଼ ସହର ଅଞ୍ଚଳରେ ଥିବା ସ୍କୁଲଗୁଡ଼ିକ ଖୋଲା ରହିବ।

ପ୍ରଶାସନ ପକ୍ଷରୁ ଜନସାଧାରଣଙ୍କୁ ସତର୍କ ରହିବାକୁ ଏବଂ ଯେକୌଣସି ଜରୁରୀକାଳୀନ ପରିସ୍ଥିତିରେ ସ୍ଥାନୀୟ କର୍ତ୍ତୃପକ୍ଷଙ୍କ ସହ ଯୋଗାଯୋଗ କରିବାକୁ ନିବେଦନ କରାଯାଇଛି।