ଭୁବନେଶ୍ୱର: ଓଡ଼ିଶାରେ ମହିଳା ସଶକ୍ତୀକରଣ କ୍ଷେତ୍ରରେ ଏକ ବଡ଼ ସଫଳତା ମିଳିଛି। ଧାର୍ଯ୍ୟ ସମୟର ପ୍ରାୟ ଏକ ବର୍ଷ ପୂର୍ବରୁ ରାଜ୍ୟରେ ‘ଲକ୍ଷପତି ଦିଦି’ଙ୍କ ସଂଖ୍ୟା ୨୫ ଲକ୍ଷ ଅତିକ୍ରମ କରି ଦେଶରେ ଏକ ନୂଆ ରେକର୍ଡ ସୃଷ୍ଟି କରିଛି। ବୁଧବାର ଭୁବନେଶ୍ୱରସ୍ଥିତ ମିଶନ ଶକ୍ତି ଭବନଠାରେ ଆୟୋଜିତ ରାଜ୍ୟସ୍ତରୀୟ ‘ସୁଭଦ୍ରା ଶକ୍ତି ଭିଜନ ସମିଟ୍’ରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଏହି ସୂଚନା ଦେଇଛନ୍ତି।
ଉପମୁଖ୍ୟମନ୍ତ୍ରୀଙ୍କ ସୂଚନା ଅନୁଯାୟୀ, ଓଡ଼ିଶା ସରକାର ନିଜ ଲକ୍ଷ୍ୟ ପୂରଣ କରି ରାଜ୍ୟରେ ମୋଟ ୨୬,୩୯,୯୦୯ ଜଣ ‘ଲକ୍ଷପତି ଦିଦି’ ସୃଷ୍ଟି କରିବାରେ ସଫଳ ହୋଇଛନ୍ତି। ସେ କହିଛନ୍ତି ଯେ, ୨୦୩୬ ସୁଦ୍ଧା ଓଡ଼ିଶାକୁ ଏକ ସମୃଦ୍ଧ ଓ ବିକଶିତ ଅର୍ଥନୀତିରେ ପରିଣତ କରିବା ପାଇଁ ସରକାର ସଂକଳ୍ପବଦ୍ଧ ଏବଂ ଏହି ରୂପାନ୍ତରଣରେ ମହିଳାମାନେ ପ୍ରମୁଖ ଭୂମିକା ଗ୍ରହଣ କରିବେ। ପ୍ରତ୍ୟେକ ମିଶନ ଶକ୍ତି ମହିଳାଙ୍କୁ ଆତ୍ମନିର୍ଭରଶୀଳ ଉଦ୍ୟୋଗୀ ଭାବେ ଗଢ଼ିତୋଳିବା ସରକାରଙ୍କ ପ୍ରାଥମିକତା ବୋଲି ସେ ପ୍ରକାଶ କରିଛନ୍ତି।
ଏହି ଅବସରରେ ଉପମୁଖ୍ୟମନ୍ତ୍ରୀ ମହିଳାମାନଙ୍କ ଆର୍ଥିକ ଉନ୍ନତି ପାଇଁ ବିପୁଳ ପରିମାଣର ଆର୍ଥିକ ସହାୟତା ରାଶି ପ୍ରଦାନ କରିଛନ୍ତି: ରାଜ୍ୟର ୨,୮୮,୧୯୮ ସ୍ୱୟଂ ସହାୟକ ଗୋଷ୍ଠୀ (SHG)ଙ୍କ ପାଇଁ ୧୪୭.୭୬ କୋଟି ଟଙ୍କାର ସୁଧ ରିହାତି ମଞ୍ଜୁର କରାଯାଇଛି। ୨୬ଟି ଜିଲ୍ଲାର ୨୩,୫୩୬ଟି SHG ଗୋଷ୍ଠୀଙ୍କୁ ୪୫.୭୧ କୋଟି ଟଙ୍କାର ରିଭଲଭିଂ ଫଣ୍ଡ୍ (RF) ସହାୟତା ଦିଆଯାଇଛି। ୨୭ଟି ଜିଲ୍ଲାର ୬୨୪ଟି ଗ୍ରାମ ପଞ୍ଚାୟତ ସ୍ତରୀୟ ମହାସଂଘକୁ କମ୍ୟୁନିଟି ଇନଭେଷ୍ଟମେଣ୍ଟ ଫଣ୍ଡ (CIF) ଅଧୀନରେ ୧୮୯.୫୭ କୋଟି ଟଙ୍କା ପ୍ରଦାନ କରାଯାଇଛି। ୧୫ଟି ଜିଲ୍ଲାର ଏରିଆ ଲେଭଲ୍ ଫେଡେରେସନ (ALF)କୁ ୯.୬୪ କୋଟି ଟଙ୍କାର ସହାୟତା ପ୍ରଦାନ କରାଯାଇଛି।ଏହି କାର୍ଯ୍ୟକ୍ରମରେ ଖୋର୍ଦ୍ଧା, ପୁରୀ ଓ ଯାଜପୁର ଜିଲ୍ଲାର ମହିଳା ଗୋଷ୍ଠୀଙ୍କୁ ଉପମୁଖ୍ୟମନ୍ତ୍ରୀ ନିଜ ହାତରେ ସହାୟତା ଚେକ୍ ପ୍ରଦାନ କରିଥିଲେ।
ଏହି ସମ୍ମିଳନୀରେ ଓଡ଼ିଶା ଭିଜନ-୨୦୩୬, ଲକ୍ଷପତି ଦିଦି, ମହାଲକ୍ଷପତି ଦିଦି ଏବଂ କୋଟିପତି ଦିଦି ଉଦ୍ୟୋଗୀ ସୃଷ୍ଟି କରିବା, ମହିଳାଙ୍କ ନେତୃତ୍ୱରେ ବ୍ୟବସାୟର ପ୍ରସାର, ବଜାର ସଂଯୋଗ ଏବଂ ଆର୍ଥିକ ଅନ୍ତର୍ଭୁକ୍ତୀକରଣ ଉପରେ ବ୍ୟାପକ ଆଲୋଚନା ହୋଇଥିଲା।କାର୍ଯ୍ୟକ୍ରମରେ ମିଶନ ଶକ୍ତି ବିଭାଗର କମିଶନର-ତଥା-ସଚିବ ମାନସୀ ନିମ୍ଭାଲ, ନିର୍ଦ୍ଦେଶିକା ମୋନିକା ପ୍ରିୟଦର୍ଶିନୀ ଏବଂ SLBC ଓଡ଼ିଶାର ଜେନେରାଲ ମ୍ୟାନେଜର ପ୍ରଣବ କୁମାର ବିଶ୍ୱାସଙ୍କ ସମେତ ସମସ୍ତ ୩୦ଟି ଜିଲ୍ଲାର ମିଶନ ଶକ୍ତି ପ୍ରତିନିଧିମାନେ ଉପସ୍ଥିତ ଥିଲେ।