ନୂଆଦିଲ୍ଲୀ: ବିଶ୍ୱ ଶାନ୍ତି ପ୍ରତିଷ୍ଠା କ୍ଷେତ୍ରରେ ଭାରତର ଅତୁଳନୀୟ ଅବଦାନକୁ ପୁଣି ଏକ ବଡ଼ ସ୍ୱୀକୃତି ମିଳିଛି। ଡେମୋକ୍ରାଟିକ୍ ରିପବ୍ଲିକ୍ ଅଫ୍ କଙ୍ଗୋ (DRC) ଠାରେ ଜାତିସଂଘ ଅଧୀନରେ କାର୍ଯ୍ୟରତ ୬୫୧ ଜଣ ଭାରତୀୟ ସେନା କର୍ମଚାରୀଙ୍କୁ ସେମାନଙ୍କର ଅସାଧାରଣ ସେବା ପାଇଁ ପ୍ରତିଷ୍ଠିତ ‘ଜାତିସଂଘ ପଦକ’ (United Nations Medal) ପ୍ରଦାନ କରାଯାଇଛି।
ଗତ ଶୁକ୍ରବାର (ଜୁଲାଇ ୩) ସେଠାକାର ସାକେ (Sake) ସ୍ଥିତ ସ୍ଥାୟୀ ଅପରେଟିଂ ବେସରେ ଆୟୋଜିତ ଏକ ସ୍ୱତନ୍ତ୍ର ପଦକ ପ୍ୟାରେଡ୍ ସମାରୋହରେ ଏହି ସମ୍ମାନ ପ୍ରଦାନ କରାଯାଇଥିବା ଶନିବାର ଭାରତୀୟ ସେନା ପକ୍ଷରୁ ସୂଚନା ଦିଆଯାଇଛି।ଏହି ସମାରୋହରେ ଜାତିସଂଘ ସ୍ଥିରୀକରଣ ମିଶନ (MONUSCO) ର ବରିଷ୍ଠ ଅଧିକାରୀ, ସେନା ମୁଖ୍ୟାଳୟର ପ୍ରତିନିଧି ଏବଂ ସାମରିକ କମାଣ୍ଡରମାନେ ଉପସ୍ଥିତ ଥିଲେ।
ଜାତିସଂଘର ସବୁଠାରୁ ଆହ୍ୱାନପୂର୍ଣ୍ଣ ଏବଂ ସଂକଟଜନକ ପରିବେଶରେ କାର୍ଯ୍ୟ କରି ଭାରତୀୟ ଶାନ୍ତିରକ୍ଷା ବାହିନୀ ସେମାନଙ୍କର ବୃତ୍ତିଗତ କୁଶଳତା, କାର୍ଯ୍ୟଦକ୍ଷତା ଏବଂ ଦେଶ ପ୍ରତି ଉତ୍ସର୍ଗୀକୃତ ମନୋଭାବର ପ୍ରଦର୍ଶନ କରିଛନ୍ତି।ସେନା ପକ୍ଷରୁ କୁହାଯାଇଛି ଯେ, ସେଠାରେ ଜାରି ରହିଥିବା ସଶସ୍ତ୍ର ହିଂସା ଏବଂ ଜଟିଳ ମାନବୀୟ ସଂକଟ ମଧ୍ୟରେ ଭାରତୀୟ ସେନା ନାଗରିକମାନଙ୍କ ସୁରକ୍ଷା, ଜୀବନ ରକ୍ଷା ଏବଂ ମାନବୀୟ ସହାୟତା ଯୋଗାଇବାରେ ସର୍ବଦା ଆଗଧାଡ଼ିରେ ରହିଛି। ଏହି ପଦକ ସମ୍ମାନ ବିଶ୍ୱ ଶାନ୍ତି ଓ ସୁରକ୍ଷା ପ୍ରତି ଭାରତର ଦୃଢ଼ ପ୍ରତିବଦ୍ଧତାକୁ ଦର୍ଶାଉଛି।
ଭାରତୀୟ ସେନା ବିଶ୍ୱର ସବୁଠାରୁ ନିର୍ଭରଯୋଗ୍ୟ ଶାନ୍ତିରକ୍ଷା ବାହିନୀ ଭାବେ ନିଜର ସୁନାମ ବଜାୟ ରଖିଛି।ଶେଷରେ, ଭାରତୀୟ ଶାନ୍ତିରକ୍ଷକମାନେ ଆଗକୁ ମଧ୍ୟ ଜାତିସଂଘର ନୀଳ ପତାକା ତଳେ ପୂର୍ଣ୍ଣ ସାହସିକତା ଓ ନିଷ୍ଠାର ସହ କାର୍ଯ୍ୟ କରି ଦେଶ ପାଇଁ ଗୌରବ ଆଣିବାକୁ ଶପଥ ନେଇଥିଲେ।