ଅହମଦାବାଦ: ୨୦୦୮ ମସିହାର ଅହମଦାବାଦ ସିରିଏଲ୍ ବୋମା ବିସ୍ଫୋରଣ ମାମଲାରେ ଗୁଜରାଟ ହାଇକୋର୍ଟ ମଙ୍ଗଳବାର ଐତିହାସିକ ରାୟ ଶୁଣାଇଛନ୍ତି। ସ୍ପେଶାଲ କୋର୍ଟ ୨୦୨୨ ମସିହାରେ ଦେଇଥିବା ୩୮ ଜଣ ଦୋଷୀଙ୍କ ମୃତ୍ୟୁଦଣ୍ଡ ଏବଂ ଅନ୍ୟ ୧୧ ଜଣଙ୍କ ଆଜୀବନ କାରାଦଣ୍ଡକୁ ହାଇକୋର୍ଟ କାଏମ ରଖିବା ସହ ଦଣ୍ଡାଦେଶ ବିରୋଧରେ ଦାଖଲ ସମସ୍ତ ଅପିଲକୁ ଖାରଜ କରିଦେଇଛନ୍ତି।
୩୮ ଦୋଷୀଙ୍କ ମୃତ୍ୟୁଦଣ୍ଡ ବଜାୟ
ଜଷ୍ଟିସ ଏ.ଆଇ. କୋଗଜେ ଏବଂ ଜଷ୍ଟିସ ସମୀର ଦାଭେଙ୍କ ଖଣ୍ଡପୀଠ ନିମ୍ନ ଅଦାଲତଙ୍କ ରାୟକୁ ସମ୍ପୂର୍ଣ୍ଣ ବୈଧ ବୋଲି ଦର୍ଶାଇଛନ୍ତି। ରାୟରେ ଆତଙ୍କବାଦୀ ସଂଗଠନ ଇଣ୍ଡିଆନ୍ ମୁଜାହିଦ୍ଦିନ (IM) ସହ ସମ୍ପୃକ୍ତ ୩୮ ଜଣ ଦୋଷୀଙ୍କ ଫାଶୀ ସଜା ଏବଂ ୧୧ ଜଣଙ୍କ ଆଜୀବନ କାରାଦଣ୍ଡକୁ ବଜାୟ ରଖାଯାଇଛି।
୭୦ ମିନିଟ୍ରେ ୨୧ ସ୍ଥାନରେ ହୋଇଥିଲା ବିସ୍ଫୋରଣ
୨୬ ଜୁଲାଇ ୨୦୦୮ରେ ଅହମଦାବାଦ ସହରର ୨୧ଟି ସ୍ଥାନରେ ମାତ୍ର ୭୦ ମିନିଟ୍ ମଧ୍ୟରେ କ୍ରମାଗତ ବୋମା ବିସ୍ଫୋରଣ ଘଟିଥିଲା। ଏହି ଆକ୍ରମଣରେ ୫୬ ଜଣଙ୍କ ପ୍ରାଣହାନି ଘଟିଥିବା ବେଳେ ୨୦୦ରୁ ଅଧିକ ଲୋକ ଆହତ ହୋଇଥିଲେ। ବିସ୍ଫୋରଣ ସମୟରେ ସହରର କେତେକ ହସ୍ପିଟାଲକୁ ମଧ୍ୟ ଆତଙ୍କବାଦୀମାନେ ଟାର୍ଗେଟ୍ କରିଥିଲେ, ଯାହା ଘଟଣାକୁ ଆହୁରି ଭୟାବହ କରିଥିଲା।
୨୦୨୨ର ରାୟକୁ ମିଳିଲା ହାଇକୋର୍ଟଙ୍କ ମୋହର
ଦୀର୍ଘ ଶୁଣାଣି ପରେ ୨୦୨୨ ମସିହାରେ ସ୍ପେଶାଲ କୋର୍ଟ ୩୮ ଜଣ ଅଭିଯୁକ୍ତଙ୍କୁ ମୃତ୍ୟୁଦଣ୍ଡ ଏବଂ ୧୧ ଜଣଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ। ସେହି ରାୟକୁ ଚ୍ୟାଲେଞ୍ଜ କରି ହାଇକୋର୍ଟରେ ଅପିଲ ହୋଇଥିଲା। ତେବେ ଗୁଜରାଟ ହାଇକୋର୍ଟ ସମସ୍ତ ଅପିଲକୁ ଖାରଜ କରି ସ୍ପେଶାଲ କୋର୍ଟଙ୍କ ରାୟକୁ ବଜାୟ ରଖିଛନ୍ତି।