ଅଯୋଧ୍ୟା: ଅଯୋଧ୍ୟା ଶ୍ରୀରାମ ଜନ୍ମଭୂମି ମନ୍ଦିରରେ ଦାନ ଅନିୟମିତତା ଅଭିଯୋଗର ତଦନ୍ତ ଆଗକୁ ବଢ଼ିବା ସହ ଆଉ ଏକ ଚିନ୍ତାଜନକ ତଥ୍ୟ ସାମ୍ନାକୁ ଆସିଛି। ସ୍ୱତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି)ର ପ୍ରାଥମିକ ଯାଞ୍ଚରେ କେତେକ କର୍ମଚାରୀ ନକଲି ଦାନ ରସିଦ ବ୍ୟବହାର କରି ଭକ୍ତଙ୍କଠାରୁ ଅର୍ଥ ଆଦାୟ କରୁଥିବା ସନ୍ଦେହ ପ୍ରକାଶ ପାଇଛି। ଏହି ଅର୍ଥ ଟ୍ରଷ୍ଟର ଆଧିକାରିକ ଖାତାକୁ ଯିବା ପରିବର୍ତ୍ତେ ଆତ୍ମସାତ୍ କରାଯାଉଥିବା ଅଭିଯୋଗ ହୋଇଛି।
ତଦନ୍ତକାରୀ ଅଧିକାରୀଙ୍କ ସୂଚନା ଅନୁସାରେ, ମନ୍ଦିର ପରିସରରେ କେତେକ ବ୍ୟକ୍ତି ଆଧିକାରିକ ରସିଦ ବୋଲି ଦର୍ଶାଇ ଭକ୍ତମାନଙ୍କୁ ନକଲି ରସିଦ ପ୍ରଦାନ କରୁଥିଲେ। ଭକ୍ତମାନେ ସେଗୁଡ଼ିକୁ ସତ ବୋଲି ବିଶ୍ୱାସ କରି ଦାନ କରୁଥିଲେ ମଧ୍ୟ ସେହି ଅର୍ଥ ସରକାରୀ ରେକର୍ଡରେ ଜମା ହେଉନଥିଲା। ପ୍ରାରମ୍ଭିକ ତଦନ୍ତରୁ ଏହି ପ୍ରକ୍ରିୟା ଦୀର୍ଘଦିନ ଧରି ଚାଲିଥିବା ସହ ଏଥିରେ ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ଥାଇପାରେ ବୋଲି ସନ୍ଦେହ କରାଯାଉଛି।
ଏସ୍ଆଇଟି ସିସିଟିଭି ଫୁଟେଜ୍, ଦାନ ରେଜିଷ୍ଟର, ରସିଦ ବହି ଏବଂ ଆର୍ଥିକ କାଗଜପତ୍ରର ଯାଞ୍ଚ କରିବା ସମୟରେ ଅନେକ ଅସଙ୍ଗତି ଚିହ୍ନଟ କରିଛି। କିଛି ରସିଦର କ୍ରମିକ ସଂଖ୍ୟା ଆଧିକାରିକ ରେକର୍ଡ ସହ ମେଳ ଖାଉନଥିବା ବେଳେ ଅନେକ ଦାନର କୌଣସି ହିସାବ ମଧ୍ୟ ମିଳିନାହିଁ। ନକଲି ରସିଦ କେଉଁଠାରେ ଛପାଯାଇଥିଲା ଏବଂ ଏହି ଚକ୍ରରେ କିଏ କିଏ ସମ୍ପୃକ୍ତ ଥିଲେ, ସେନେଇ ଖୋଳତାଡ଼ ଜାରି ରହିଛି।
ଏହା ପୂର୍ବରୁ ମନ୍ଦିରର ଦାନ ବାକ୍ସରୁ ଅର୍ଥ ଚୋରି ଅଭିଯୋଗରେ କେତେକ କର୍ମଚାରୀଙ୍କୁ ଗିରଫ କରାଯାଇଥିଲା। ବର୍ତ୍ତମାନ ନକଲି ରସିଦ ଜରିଆରେ ଦାନ ଆଦାୟ ଅଭିଯୋଗ ସାମ୍ନାକୁ ଆସିବା ପରେ ତଦନ୍ତର ପରିସର ଆହୁରି ବ୍ୟାପକ କରାଯାଇଛି। ସମସ୍ତ ଆର୍ଥିକ କାରବାରର ସ୍ୱତନ୍ତ୍ର ଅଡିଟ୍ ସହ ସନ୍ଦେହଭାଜନ କର୍ମଚାରୀଙ୍କୁ ପଚରାଉଚରା କରାଯାଉଥିବା ସୂଚନା ମିଳିଛି।