କୋଲକାତା: ରାଜ୍ୟସଭା ନିର୍ବାଚନ ପୂର୍ବରୁ ପଶ୍ଚିମବଙ୍ଗ ରାଜନୀତିରେ ବଡ଼ ପରିବର୍ତ୍ତନ ଦେଖାଦେଇଛି। ତୃଣମୂଳ କଂଗ୍ରେସ (ଟିଏମ୍ସି)ର ତିନିଜଣ ପୂର୍ବତନ ସାଂସଦ ସୁସ୍ମିତା ଦେବ, ସୁଖେନ୍ଦୁ ଶେଖ ରାୟ ଓ ପ୍ରକାଶ ବାରିକ ଭାରତୀୟ ଜନତା ପାର୍ଟି (ବିଜେପି)ରେ ଔପଚାରିକ ଭାବେ ଯୋଗ ଦେଇଛନ୍ତି। ଏହି ଯୋଗଦାନକୁ ମମତା ବାନାର୍ଜୀଙ୍କ ନେତୃତ୍ୱାଧୀନ ଟିଏମ୍ସି ପାଇଁ ଏକ ବଡ଼ ରାଜନୈତିକ ଝଟକା ବୋଲି ଦେଖାଯାଉଛି।
ବରିଷ୍ଠ ବିଜେପି ନେତା ଶମିକ ଭଟ୍ଟାଚାର୍ଯ୍ୟ ଏକ ସାମ୍ବାଦିକ ସମ୍ମିଳନୀରେ ଏହି ତିନି ନେତାଙ୍କ ଦଳରେ ଯୋଗଦାନ ସମ୍ପର୍କରେ ଘୋଷଣା କରିଥିଲେ। ରାଜନୈତିକ ମହଲରେ ଚର୍ଚ୍ଚା ହେଉଛି ଯେ, ବିଜେପି ସେମାନଙ୍କୁ ରାଜ୍ୟସଭାରେ ଅବଶିଷ୍ଟ କାର୍ଯ୍ୟକାଳ ପାଇଁ ପ୍ରାର୍ଥୀ କରିପାରେ। ଏହି ନିର୍ବାଚନ ପାଇଁ ନାମାଙ୍କନ ଦାଖଲର ଶେଷ ତାରିଖ ଜୁଲାଇ ୧୪ ରହିଛି।
ଏପଟେ ନ୍ୟାସନାଲିଷ୍ଟ ସିଟିଜେନ୍ସ ପାର୍ଟି ଅଫ୍ ଇଣ୍ଡିଆ (ଏନ୍ସିପିଆଇ)ର ସାଂସଦ ତଥା ପୂର୍ବତନ ଟିଏମ୍ସି ସାଂସଦ ୟୁସୁଫ୍ ପଠାନ ମଧ୍ୟ ନବାନ୍ନାରେ ପଶ୍ଚିମବଙ୍ଗ ସରକାରଙ୍କ ଶୀର୍ଷ ନେତୃତ୍ୱଙ୍କ ସହ ସାକ୍ଷାତ କରିଥିବା ଚର୍ଚ୍ଚାର ବିଷୟ ପାଲଟିଛି। ସେହିପରି ପ୍ରସିଦ୍ଧ ଅଭିନେତା ପ୍ରୋସେନଜିତ୍ ଚାଟାର୍ଜୀ ମଧ୍ୟ ପ୍ରଶାସନିକ ମୁଖ୍ୟ କାର୍ଯ୍ୟାଳୟକୁ ଯାଇ ମୁଖ୍ୟମନ୍ତ୍ରୀଙ୍କୁ ଭେଟିଥିଲେ।
ଉଲ୍ଲେଖଯୋଗ୍ୟ, ନିକଟରେ ପଶ୍ଚିମବଙ୍ଗ ଗସ୍ତ ସମୟରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ପ୍ରୋସେନଜିତ୍ ଚାଟାର୍ଜୀଙ୍କ ବାସଭବନକୁ ଯାଇ ସାକ୍ଷାତ କରିଥିଲେ। ଏହି କ୍ରମାଗତ ରାଜନୈତିକ ଘଟଣାକ୍ରମ ପଶ୍ଚିମବଙ୍ଗର ରାଜନୀତିକୁ ଆହୁରି ସରଗରମ କରିଛି।